MARKA 3

1Cun sinagog ah a lut ṭhân i cuka ah mi pakhat kutzeng a rak um. 2Sual an phawt khawh nâkhnga, Sabbath ni ah a damter lai le damter lai lo kha an ngiat ko. 3Anih nih kutzeng sinah, “Hmai ah rak chuak,” tiah a ti. 4Cuticun an sinah, “Sabbath ni ah ṭhatter maw thiang chiatter? nunnâk khamh maw thiang thah dah?” tiah a hal hna. Asinain dai tein an um. 5Thinhung ngaiin a zoh hna, an lung a khawntuk ruang i lung fak ngaingai in, cu pa sinah cun, “Na kut thlir,” tiah a ti. A hun thlir tikah a kut cu khatte lei bantuk in a dam. 6Farasih kha an chuak i Herod minung hna he i fonh zau in Amah an thah khawh nâkhnga khua an khâng. 7Asinain Jesuh cu a lamkaltu hna he rili lei ah an kal. Cuticun Galili ram le Judia ram le, 8Jerusalem le Idumia ram le Jordan varal le, Tair le Sidon khua hna in khuaruahhar a tuahmi kong an rak theih tikah a sinah mi tampi an ra. 9Zapi nih hna an hnawhtuk sual nâkhnga lo tilawng pakhat rak timtuah dingin lamkaltu kha a chimh hna. 10Zeitintiah mi tampi a rak damter cang hna caah zawtnâk a ngeimi pauh nih Amah kha tongh cio an timh. 11Thlarau thur zong nih an hmuh tikah, a hmai ah an bawk i, “Nang cu Pathian Fapa na si,” tiah an au tawn. 12Asinain anih nih a konglam phuanglo dingin ralrin a pêk tawn hna. 13Cun tlâng cungah a kai i a duhmi pauh kha a kawh hna i a sinah an ra. 14Cuticun anmah chungin mi hleihnih a ruah hna i annih cu a sinah um peng ding le phungchim i a thlah ding an si caah, 15khuachia ṭhawl khawhnâk le mizaw damter khawhnâk a pêk hna; 16Cu hna cu, Simon, Peter tiah min a sakmi, 17Zebedi fapa Jeim le Jeim unau Johan, cuhna cu, ‘Boanerges’ A ti hna, cucu ‘Khuari fale’ tinâk a si. 18Andria, Filip, Bartholomi, Matthai, Thomas, Alfai fapa Jeim, Thadia, Kanaan mi Simon le 19Amah rawitu Judas Iskariot an si. Cun inn chungah an lut. 20Mibu kha an ra ṭhân i rawl hmanh siarem tein an ei kho lo. 21A chungle nih an theih tikah, “A hrut cang a si cu,” tiah Amah lak awkah an rak pawk. 22Jerusalem khua in a rami nawlbiacawnpiaktu hna nih, “Belzebul he â pehtlaimi a si. Khuachia bawi a si caah pei khuachia a ṭhawl khawh ko cu,” tiah an rak ti ve. 23Jesuh nih a auh hna i tahchunhnâk in, “Satan nih zeitindah Satan cu a ṭhawl khawh lai? 24Bawi pennâk zong amah le amah â doh ahcun zeitindah a pennâk a hmunh khawh lai? 25Chungkhar zong an i doh ahcun cu chungkhar cu a dir kho lai lo. 26Satan zong amah le amah â doh i â ralchanh ahcun a dir kho lai lo. A lo ral ko lai. 27Ahohmanh nih miṭhawng innah lut in cu miṭhawngpa cu an ṭem hmasat lo ahcun a chawva cu an lâkpiak kho lai lo. An ṭem hnu lawngah cu inn cu an bauh khawh lai. 28Biataktein kan chimh hna, minung fapa hna sualnâk vialte le (Pathian) an cawhdehnâk vialte zong ngaihthiam an si ko lai, 29asinain Thiang Thlarau cawhdehtu cu ngaihthiam an si kho lai lo, zungzal thiamlo conâk cu an co ding a si,” tiah a chimh hna. 30“Thlarau thur he an i peh” an ti ruangah cu bia cu a chimnâk a si. 31Cuticun a nu le a nau le kha an ra i lengah dir in Amah kotu mi an fial. 32A pawngah mizapi an ṭhu i a sinah, “Zohhmanh, lengah na nu le na nau le nih an in kawl,” tiah an ti. 33Anih nih, “Ka nu le ka nau le cu ahodah an si?” tiah a leh hna. 34A pawng i a ṭhumi hna cu a hei zoh hna i, “Ka nu le ka nau le cu hi hna hi an si,” 35Zeitintiah Pathian duhnâk a tuahmi pauh cu, ka nau le, ka far le, ka nu le an si,” tiah a ti.

Currently Selected:

MARKA 3: HAKABSI

Highlight

Copy