MARKA 2

1Ni zeimawzat hnu ah Kapernaum khua ah a lut i innah a um ko ti kha theih a si. 2Chikkhatteah mibu cu a tom tom in an rak chuak i innkâ hram tiang umnâk um lo tiangin an khat i phung a chimh hna. 3Cuticun mizeng pakhat mi pali nih an rak zawnh i a sinah an ratpi. 4Mi an tamtuk caah a pawng an phanhpi kho lo; inn cung kha an ṭheh i mizeng cu a ihkhun he an run ṭhumh. 5Jesuh nih an zumhning a hmuh tikah, mizeng sinah, “Ka fapa, na sualnâk ngaihthiam a si cang,” tiah a ti. 6Cuka i a ṭhumi lakah nawlbiacawnpiaktu hna nih an lung in an ruah i 7“Hipa nih hin zeicadah(Pathian) cawhdehnâk bia a chim? Pathian dah ti lo ahodah sualnâk a ngaithiam kho?” tiah an ti. 8Hmakhatteah Jesuh nih cubantuk i an ruahmi kha a thlarau in a rak hngalh i an sinah, “Zeiruangahdah cubantuk thil cu nan lung in nan ruah? 9Mizeng sinah, ‘Na sualnâk ngaihthiam a si cang ti le ‘Tho law na ihphah la in ke in kal cang,’ timi ah a zeidah chim a fawi deuh? 10Sihmanhsehlaw leicung ah hin Mi Fapa nih sual ngaihthiamnâk a ngei tiah nan hngalh khawh nâkhnga,” tiah a ti i mizeng sinah, 11“Tho law, na ihphah la in na innah tlung,” tiah a ti. 12Chikkhatteah a tho i a ihphah zualin an dihlak hmuhah a chuak cawlh, an dihlak in mak an ti ngaingai. “Hi bantuk hi kan hmu bal lo!” tiin Pathian an thangṭhat. 13Cuticun a chuak i rili kamah a kal, mibu vialte kha a sinah an ra i a rak cawnpiak hna. 14Â chawhpah ah, Levi, Alfai fapa ngunkhuai khawlhnâk hmun i a ṭhut ko kha a hmuh i, “Ka zul,” tiah a ti. Cuticun a tho i a zulh cawlh. 15Cubangin Levi in i rawl a ei lio ah, ngunkhuai khawltu le misual tampi nih Jesuh le lamkaltu kha rawl an dûmpi hna, an tam ngai i Amah kha an zulh. 16Misual le ngunkhuai khawltu hna rawl a eipi mi kha an hmuh tikah, nawlbiacawnpiaktu le Farasih hna nih a lamkaltu sinah, “Zeicadah ngunkhuai khawltu le misual hna sin ah a ei din,” tiah an ti. 17Jesuh nih cucu a rak theih i “Ngandammi nih sibawi an herh lo i a zawmi nih an herh. Mi dingmi hna kawh awkah ka ra lo, asinain misual hna ngaihchihter dingah ka ra” tiah a ti hna. 18Johan zultu le Farasi hna nih rawl an ulh tawn. Annih cu an ra i, “Johan le a zultu hna nih rawl an ulh tawn, zeiruangah dah na zultu hna nih an ulh ve lo,” tiah an ti. 19Jesuh nih, “Mo ngeitu cu a hawi le sin i a um lio ahcun mo ngeitu hawi le nih rawl an ul bal maw? An sin i mo ngeitu a um chung pauh cu rawl an ul lai lo. 20Asinain mo ngeitu kha an sin in lâk a si cân a phân te lai, cu cân ah cun an ulh te lai. 21Ahohmanh nih puanhlun a tlekmi puanthar in an belh bal lo, an belh ahcun a thar nih a hlun kha a hnuh lai i kau chin chin in a tlek lai. 22Ahohmanh nih mitsur hang chiahnâk saphaw thawl hlunah mitsur hang thar an rawn bal lo, an rawn ahcun mitsur hang thar nih saphaw thawl hlun kha kuai lakin a tawn lai i mitsur hang a tle dih lai i a thawl zong a kuai dih lai. Cucaah mitsur hang thar cu saphaw thawl thar ah an rawn tawn,” tiah a ti hna. 23Voikhat cu Sabbath ni ah changvut hmun an kal lio ah lamkaltu hna nih changvut vui kha ṭawh an thawk. 24Farasi hna nih, “Zohhmanh, zeiruangahdah Sabbath ni ah a thiang lomi kha an tuah,” tiah an ti. 25Anih nih, “David le a hawi le chambau le rawlṭâm in an um lio ah an tuahmi kha nan rel bal lo maw? 26Abiathar tlângbawi nganbik a si lioah Pathian inah a luh i tlângbawi hna dah ti lo, midang ca i ei a thiang lomi changreu a ei i a hawi le zong a pêk hna kha?” tiah a ti. 27Anih nih, “Sabbath hi minung caah ser a si i minung hi Sabbath caah ser a si lo. 28Cucaah Mi Fapa hi Sabbath Bawi zong a si,” tiah a ti.

Currently Selected:

MARKA 2: HAKABSI

Highlight

Copy