MARKA 1

1Pathian Fapa, Jesuh Krih thawngṭha hramthawknâk: 2Profet hna cauk chungah, “Ngaihmanh, ka lamkal na hmaiah ka thlah, anih nih nahmai ah nalam a timhlamh lai” 3Ramcar i aunâk aw nih, “BAWIPA lam sial ulaw, a lam kha dinter u, tiah an rak ṭial bang khan. 4Johan cu ramcar ah Baptisma pe ding le sual ngaihthiamnâk dingah ngaihchihnâk Baptisma kong chim dingah a ra. 5Cuticun Judia rammi vialte le Jerusalem khuachung mi kha a sinah an ra i an sualnâk i phuangin Jordan tiva ah Baptisma a rak pêk hna. 6Johan cu kalauk hmul in â thuam, saphaw taisawm â sawmh i khaubawk le ram khuaihliti kha a rawl a si. 7Anih nih, “Ka hnu ah keimah nâk ngandeuh ara lio, kun i a kedan hri phoihawk hmanh ah kâ tlak lo. 8Kei nih ti in Baptisma kan pêk hna, asinain anih nih Thiang Thlarau ah baptisma an pêk hna lai,” tiah a chim tawn. 9Cu cân ah Jesuh cu Galili ram i Nazaret khua in a ra i Jordan tiva ah Johan sinah Baptisma a in. 10Cun ti chungin a chuah le cângkâ van â ong i Thlarau kha ṭhuro bangin a cung i a rung ṭum kha a hmuh. 11Van in aw a rung chuak i, “Nangmah hi ka dawtmi Fapa, na cungah kâ lawm ngai ngai,” tiah a ti. 12Hmakhat teah Thlarau nih Amah cu ramcar ah a kalter. 13Cun ramcar ah ni sawmli chung satan tukforh in a um. Saram lakah khua asa i vancungmi nih a rian an ṭuanpiak. 14Johan thong i an thlak hnuah, Jesuh cu Pathian pennâk thawngṭha chimin, Galili ram a rak phân. 15“Cân cu a tling cang, Pathian pennâk zong a nai cang. I ngaihchih u law ṭhawngṭha hi zum u,” tiah a ti. 16Cun Galili rili kam i a kal lioah, Simon le a unau Andria sur an vorh lio kha a hmuh hna, zeitintiah nga tlaitu an si. 17Jesuh nih, “Ka zul u law minung tlaitu ah kan ser hna lai,” tiah a ti. 18Hmakhatteah an sur kha kaltâk in an zulh. 19Cu hmun in tlawmpal a kal tikah Zebedi fapa Jeim le a unau Johan kha a hmuh hna, an sur an thlawp i tilawng chungah an um. 20Hmakhatteah a kawh hna i anpa Zebedi le hlawhfa an rawihmi hna he tilawng ah kaltak in an zulh. 21Cuticun Kapernaum khua ah an lut i Sabbath ni ah Sinagog ah lut in a cawnpiak hna. 22Nawlbia cawnpiaktu hna bantuk si loin nawlngei ngai in a cawnpiak hna ca-ah an khuaruah a har ngai ngai. 23Cubangin sinagog chungah thlarau thur tlaihmi pakhat a rak um i 24anih nih, “Kanmah tein kan umter! Nazaret Jesuh, nang le kannih zeidah kan i pehtlaihnâk a um? A kan hrawktu dingah na ra cang maw? Nang kan hngalh ko, Pathian Mithiang na si,” tiah a au. 25Asinain Jesuh nih, “Dai tein um law, a chungin chuak,” tiah a sîk. 26Cun thlarau thur nih a therter thluahmah i aw thangpi i ai pah in a chuak. 27An dihlak in mak an ti ngaingai, “Hihi zei thil ko dah a si? Zeibantuk cawnpiaknâk thar dah a si? Zeitintiah nawlngei ngai in thlarau thur tiangin nawl a pêk hna i an zulh,” tiah anmah le anmah an i caih. 28A rauh hlanah a thawng cu Galili ram vialte ah a thang dih. 29Cubangin Sinagog i an rak chuah le cângkâ Jeim le Johan he, Simon le Andria inn ah an lut. 30Simon nupi nu cu raifanh in a zaw i a it ko; cun a kong cu Jesuh an rak chimh colh. 31Cun a ra i a kutah a tlaih i a thawhter. Hmakhatteah a tak lin a dai i rawl a chuanpiak hna. 32Zanlei ni a tlâk hnuah mizaw vialte le khuachia nih a tuahmi kha a sinah an ratpi hna. 33Khuachung mi hna cu inkâ hram tiangin an i pum. 34Zawtnâk phunkip i a zawmi kha a damter hna i khuachia tampi a ṭhawl hna. Khuachia hna an holh zong a siang hna lo, zeicatiah Amah kha an hngalh. 35A thaizing khua dei hlanin a tho i hna thiannâk hmunah kal in cuka ah thla a cam. 36Cun Simon le asin i a ummi hna nih Amah kha an kawl. 37An hmuh tikah, “Mi vialte nih an in kawl lengmang,” tiah an ti. 38Anih nih, “Pawngkam khua hna ah khin phung ka chim khawh nâkhnga kal hna u sih, cucu ka chuahchan a si,” tiah a ti hna. 39Cun Galili ram vialte a ṭol dih i an sinagog ah phung chimin, khuachia zong a ṭhawl hna. 40A sinah thinghmuimi pakhat a ra i, “Na duh ahcun naka thianter khawh,” tiah a hmai ah khuk bilin a nawl lengmang. 41Jesuh nih a zângfah ngaingai, a hun banh i a tongh hnuah, “Ka duh ko, rak thiang cang,” tiah a ti. 42A chim dih le cângkâ a thinghmui nih a kaltâk i a thiang colh. 43Phuan lo dingin fak piin nawl a pêk hnuah a kalter cawlh, 44A sinah, “Aho sin hmanh ah chim hlah; asinain va kal law, tlângbawi sinah va zohter, nâ thenhnâk caah Moses nih a rak chim bang khan va pe, na dam cang tiah an rak theihfian nâkhnga, tiah a ti. 45Asinain anih cu a chuak i zalong ngaiin a phuan thluahmah. Curuangah Jesuh cu langhngan in khua chungah a lut kho lo; hmun king lei tu a panh i ka kip in Amah kha an panh.

Currently Selected:

MARKA 1: HAKABSI

Highlight

Copy