MARKA 5

1Cuticun tiva ral, Gadarin mi hna ramah an phân. 2Tilawg chungin an chuah hnu ah, mi pakhat, thlarau thur a ngeimi, thlân chungin a rak chuakmi nih hmakhatteah a rak ton, 3cupa cu thlânah a um tawn i ahohmanh nih an ṭêmbawh kho lo, cikcîn hmanh in an ṭêmbawh kho lo, 4hrêng le cikcîn zongin an ṭêm tawn. Cikcîn kha a chah dih i hrêng zong a khiah dih hna; ahohmanh nih an hrem kho lo. 5Chun zan hlan in thlân le tlâng cungah a ai tawn i lung in amah le amah â ah tawn. 6Anih nih hlat piin Jesuh a hmuh tikah a rak tli i a biak. 7Aw thangpi in a au, “Jesuh, Pathian Cungnungbik Fapa, kei le nang nih zeidah pehtlainâk kan ngeih? Dân ka tat sawh hlah, tiah Pathian min in kan nawl,” tiah a ti. 8Zeitintiah Amah nih, “Nang, thlarau thurpa, mipa chung in chuak tuah,” a rak ti diam cang. 9Anih nih, “Na min zeidah a si,” tiah a hal, “Ka min cu tampi a si, zeicatiah tampi kan si,” tiah a ti. 10Cu ram in a ṭhawl hna nâkhnga lo biatak tein an nawl. 11Cuka hrawng tlang pangah vawkrual tampi rawl kawl in an tlong. 12Cubangin khuachia nih vawkrual sinah kalin an chungah kan luh khawh nâkhnga nawl kan pe ko tiah an nawl. 13Jesuh nih nawl a pêk hna. Cuticun thlarau thur kha an chuak i vawk chungah an lut, (thonghnih hrawng an si); cuticun vawkrual hna cu lungpangah an zuang i tili chungah lut in an thi dih. 14Vawk a zuatu kha an zâm i khuachung le a pawngkam ramah cu kong cu an thanh. Cuticun cu thil zoh awkah mi kha an ra. 15Jesuh sin an rak phâk tikah, khuachia tampi nih a tlaihmi pa, hnipuan i hruk in lungfim te i a ṭhut ko kha an hmuh i an ṭih ngaingai. 16Cun thil umtuning a rak hmutu hna nih khuachia tuahmi pa cung i thil a cangmi le vawk kong kha mi an chimh hna. 17Cu hna nih Amah cu an ram chuahtâk dingin an nawl. 18Tilawng i cit â timh tikah, khuachia tuahmi pa nih Jesuh sin i um peng dingin a nawl. 19Asinain Jesuh nih a senh lo, “Na inah na hawi le sinah va tlung law Bawipa nih na ca i an tuahpiakmi a lianhnganning le an zângfahnâk kong hi va chim hna,” tiah a ti. 20A kal i Dekapolis khua ah Jesuh nih a ca i thil a tuahpiakmi lianhnganning kha a tlang aupi i mi vialte nih mak an ti ngaingai. 21Jesuh cu tilawng in varal a rak phâk ṭhân tikah mi tampi an ra, Amah cu tidil kamah a um ko rih. 22Cun zohhmanh sinagog uktu hna lak i mi pakhat, a min Jairu timi a ra, a hmuh le cângkâ a ke hramah a bawk i 23“Ka fanu ngakchiate a thi dengmang i na rat i a cungah na kut na chuan ahcun a dam ko lai,” tiah a nawl. 24Jesuh nih a zulh i mi tampi nih an zulh i an hnor lengmang. 25Cubangin nu pakhat cu kum hleihnih chung thichuak zawtnâk in a zaw, 26sibawi tampi sinah â zohkhenh cang. A ngeihmi vialte zong a dih cang i ṭhat deuh lei si loin a zual chin chin. 27Cunu nih Jesuh kong a rak theih tikah mibu karlak ah a hnulei in a ra i a puan kha a tongh. 28Zeitintiah a puan hmanh kha tawng ninglaw, damter ka si ko lai, tiah a lungin a ti. 29Chikkhatteah a thichuak cu a dam cawlh, a zawtnâk in ka dam ti cu amah nih a hngalh. 30Jesuh nih a chungin thiltikhawhnâk a chuak, ti kha a hngalh i mizapi kha a zoh len hna i “Hodah ka puan a tawng?” tiah a ti. 31Asinain a lamkaltu hna nih, “Mizapi nih hi tlukin an in hnorngen lengmang hi na hmu ko nain, zeitindah ahonihdah aka tawng, na ti khawh ê? tiah an ti. 32Asinain cu thil a tuahtu hmuh duhah anih cu â mer lengmang ko. 33Cutikah minu nih a tuahpiakmi thil kha hngalin, ṭih le ther buin a ra i a hmaiah a bawkin a umtuning vialte kha a chimh dih. 34Anih nih, “Ka fanu, na zumhnâk hi na dampi. Hnangam tein kal law, na zawtnâk in va dam cang,” tiah a ti. 35Bia a chim lioah, sinagog uktu inn in mi an ra i, “Na fanu a thi cang. Zeiruangahdah cawnpiaktu hi na buaiter ko rih lai? tiah an ti. 36Jesuh nih an chimmi kha a rak theih tikah, sinagog uktu sinah, “Na thin phang hlah, zum ko,” tiah a ti. 37Peter le Jeim le Jeim unau Johan dah ti lo cu ahohmanh zulh a siang hna lo. 38Cuticun sinagog hotu inn an phâk tikah, a ṭap lenmi hna le, a ai thluahmahmi le ai tuai lenmi kha a hmuh hna. 39A luh tikah, “Zeiruangahdah hnâ nan cheh i nan ṭah? Ngakchia cu a thi lo, â hngilhmi a si,” tiah a ti. 40Annih nih an rak nihsawh. Asinain an dihlak in a chuahter hna, ngakchia nu le pa le a sin i a ummi lawng â kalpi hna i ngakchia umnâk ah an lut. 41Cuticun ngakchia kut kha a tlaih i, “Talitha kumi!” tiah a ti. Cucu, “Nute, tho tuah kan ti,” tinâk a si. 42Hmakkhatteah nu ngakchia te cu a tho i a kal; amah cu kum hleihnih mi a si. Cun annih cu a ngan ngaimi khuaruahharnâk nih a tlaih hna. 43Asinain cu thil cu ahohmanh chim lo dingin fakpi in nawl a pêk hna, cun nute cu eiawk pe dingin a chimh hna.

Currently Selected:

MARKA 5: HAKABSI

Highlight

Copy