MARKA 12

1Cuticun tahchunhnâkin an sinah chim hram a thawk. Mipa nih mitsur a cin i a kulh, a nennâk khor a cawh i parthlâm a sak. Dûm congtu hna kutah i hlawhfa dingin a chiah i ram hlapi ah a tlawng. 2A thei lawh cân a phâk tikah, a covo lâk dingin dûm congtu hna sinah sinum pakhat a thlah. 3Anih cu an rak tlaih i an velh hnuah kut lawngin an kirter. 4Sinum dang a thlah ṭhân, a nih zong cu lungin an rak cheh, alu an rak pemh i fakpi i an hrem hnu ah an kirter ṭhân. 5Midang a thlah ṭhân i an rak thah, midang zong a cheu an rak velh i a cheu an rak thah hna. 6Cuticun fapa pakhat, a dawt ngaimi a ngei. Anih zong cu a thlah. Zeicatiah ka fapa cu an rak upat deuh lai, tiah a ruah. 7Asinain dûm congtu hna nih, “Hipa hi ro cotu a si. Ra u, that u sih, cun a co hngami ro kha kanmah ta a si ko lai,” tiah an ti. 8Cuticun an i kalpi i an thah i dûm lengah an hlawnh. 9“Cucaah dûm ngeitu nih zeitindah a ti hna lai? Ara lai i dûm congtu hna cu a hloh dih hna lai i midang kut ah dûm cu a pêk lai. 10Hi Cathiang hi nan rel bal lo maw? ‘In satu hna duh lomi lung kha, cucu a kil i santlai bik lung a si. 11Cucu Bawipa tuahmi a si, kan mithmuh ah khuaruahhar a si, tihi,’ tiah a ti. 12Amah kha tlaih an timh, asinain mizapi an ṭih hna, anmah ralchanh in a chimmi tahchunhnâk kha an fiang. Cun an chuahtâk i an kal. 13A bia in an tlaih khawh nâkhnga Farasih le Herod mi kha a sinah an thlah. 14A sin an phâk tikah, “Cawnpiaktu, miding na si, uar khunmi zong na ngei lo, thleidan zong na ngei lo. Biatak in Pathian bia na cawnpiak tawn. Sizar sin i ngunkhuai pek hi phungning a si maw si lo dah? 15Kan pe hnga maw pe lo? tiah an ti. Asinain an depdetning kha a hngalh i, “Zeiruangahdah nanka hniksak, ngamu kha ka pe ulaw, ka rak zoh lai,” tiah a ti hna. 16An ratpi i, “Hihi aho milem le aho min dah a si?” tiah a ti. Annih nih, “Sizar,” tiah an ti. 17Jesuh nih, “Sizar thil cu Sizar pe ulaw, Pathian thil cu Pathian sinah pe ngat u,” tiah a ti i mak an ti ngai ngai. 18Thawhṭhannâk a um lo, titu Sadusih mi kha a sinah an ra i bia an hal. 19“Cawnpiaktu, Moses nih, ‘Mi nih fa ngeih loin a nupi a thihtâk ahcun, a unau nih ci a thlahpiak lai,” tiah a kan ṭial piak. 20Cubangin unau pasarih an um; a upa bik nih nupi a ngei i ci thlah loin a thi. 21A pahnihnâk pa nih ai lak i ci thlah loin a thi ṭhân, a pathumnâk pa zong cubantuk cu a si. 22Cuticun unau pasarih hna cu ci thlah loin an thi i a donghnâk ah minu zong cu a thi ve. 23Asiah thawhṭhân ni ah aho nupi dah a si hnga? An dihlak nupi le a si fawn,” tiah an ti. 24Jesuh nih, “Cathiang le Pathian thiltikhawhnâk nan hngalh lo caah nan palh tawnnâk cu a si. 25Zeitintiah thihnâk in thawhter an si hnuah, nupi pasal an i ngei ti lai lo, van i vanmi hna bantuk an si lai. 26Mithi hna an tho ṭhân timi kongah, Moses cauk nan rel bal lo maw? Burbûk ah khan Pathian nih, “Kei cu Abraham Pathian, Isaak Pathian, Jacob Pathian ka si,” a timi kha, nan rel bal lo maw? 27Anih cu mithi Pathian a si lo, minung Pathian a si. Cucaah ngan tukin nan palh,” tiah a leh hna. 28Nawlbia cawnpiaktu mi pakhat a ra i an i alnâk kha a rak ngai ve. An halmi zong palhnâk um loin a leh hna ti zong a theih, “Nawl pêkmi lakah a hmasabik zei dah?” tiah a hal. 29Jesuh nih, “Nawl pek hmasabik cu hihi a si, “Maw, Israel hna, ngai hmanh u, BAWIPA kan Pathian cu BAWIPA pakhat a si. 30BAWIPA na Pathian cu, na lungthin dihlak, na thlarau dihlak, na ruahnak dihlak, na ṭhawnnâk dihlak in na dawt lai. Hihi nawlpek hmasa bik a si. 31Pahnihnâk amah bantuk cu hihi a si. “Nangmah nâ dawt bangin na innpa na dawt lai.” Hi hna nâk i a ngan deuhmi Nawlpêk a um ti lo,” tiah a ti. 32Nawlbia cawnpiaktu nih a sinah, “A ṭha, cawnpiaktu. Biatak na chim, Pathian cu pakhat a si, Amah hlei a dang an um lo. 33Lungthin dihlak, hngalhnâk dihlak, thlarau dihlak le ṭhawnnâk dihlak i Amah dawt le, mah i dawt bang i innpa dawt cu pêkchanhnâk le pum khangh thawinâk nâkin a ṭha deuh,” tiah a ti. 34Cubangin mipa nih fim ngaiin a lehmi Jesuh nih a theih tikah, “Pathian pennâk he nâ hlat lo,” tiah a ti. Cu hnu cun ahohmanh nih bia an hal ngam ti lo. 35Ṭempal i a cawnpiak hna lioah Jesuh nih, “Nawlbiacawnpiaktu hna nih zeitindah Krih cu David Fapa an ti khawh? 36Zeitintiah David hrimhrim nih Thiang Thlarau thawngin, ‘BAWIPA nih ka Bawipa sinah, “Na ral hna na ke tangah ka chiah hlan tiang ka orhlei ah ṭhu,” tiah a rak ti. 37Amah David hmanh nih, ‘Bawipa’ tiah a kawh ahcun, zeitindah a fapa cu a si khawh? Mizapi le zatlâng hna nih lunglawm ngaiin a chimmi kha an ngaih tawn. 38Cun a cawnpiaknâk ah hitihin a chim, “Nawlbiacawnpiaktu hna chungin i ralring u, annih nih angkifual aih i len le, market hmun i kut tlaih kha an tlaihchan. 39Sinagog i ṭhutnâk ṭhabik i ṭhut le, rawl danghnâk i ṭhutnâk ṭha i ṭhut an i cuh tawn. 40Nuhmei chawva an ei i zapi hlennâk ah thla saupi in an cam tawn. Hi mi hna thiamlo conâk hi a ngan ngaingai te lai,” tiah a ti. 41Cubangin Jesuh cu thawhlawm kuang ralden ah a ṭhu i thawhlawm kuang i mi nih thawhlawm an thlakmi kha a rak zoh. Mirum hna nih tam ngaiin an thlak. 42Cuticun a hnu ah nuhmei sifak ngaimi a ra, dar tangka pahnih piahra tluk a simi khi a thlak ve. 43Jesuh nih a lamkaltu kha a kawh hna i “Biataktein kan chimh hna, thawhlawm kuangah a thlatu vialte ah hi nuhmei sifaknu thlakmi a tambik, 44zeitintiah hi hna nih hin an ngeih hlei an thlak, anih nih cun a ngeichun, a nunpi dingmi kha a thlak,” tiah a ti.

Currently Selected:

MARKA 12: HAKABSI

Highlight

Copy