Sakariyas 14
14
Hatam n'asakal gaini gizini EPIƊ-ƊAI
1Mefeŋ na wiini EPIƊ-ƊAI a ŋasi gobi, tiki ɗai na Yeruzalem.
A mefeŋ na ɗai aga e ɓûrwi wazagaiki arki sini ɵa ca.
2Aga mu diŋgiɗisi pinzibaɗi ɗai paŋ
aha war Yeruzalem buri hatam;
Aga e tiki fuŋ n'abai ɗa,
aga e virmi dalamai ɗa,
e fini gaiɗi falakai ɗa gaini gdaŋ.
galɗi ɗai ɗa aga e kiɗi edi midini afti zamai,
amma piɗi n'a hina ɗa,
aga e vidi edi war fuŋ n'abai ɗa par kai.
3Buri nɵa, EPIƊ-ƊAI aga a niya war hatam gaiɗi ɗai hanɗa,
aga a hitimiɗi war mefeŋ ni ɗa
maini n'a na zaŋ kureɗ war mefeŋ zi hatam ɗa nɵa.
4War mefeŋ ni ɗa,
aga a mula ezini miɗini huwuŋ zi luwuŋ olive,
na te na wuzaɗi Yeruzalem par, piɗi futi na dawai par sek.
Huwuŋ zi luwuŋ olive aga te ɓurwa sulu, arba kal kal,
piɗi futi na dawai par haa piɗi futi na koskoi ta,
huduk n'abai aga a ɓula war hlai ni ɗa.
Galɗi huwuŋ na ktai aga a hala azumai sek,
na ktai ɗa, war gal n'amai sek ɗa lai.
5Tiki aga ki pri edi war huduk hanɗa ɗaw, buri ɓa a na haa Atsal ta. Aga ki pri edi maini na ki pri edi wuzani jiriyini afti n'a za war sarti na na wiini Oziyas pai na Yuda ɗa nɵa.
Asakal par, EPIƊ-ƊAI, Alaw na wiya aga a halasi,
gaiɗi ɗai na sɗik na wiini n'e zi ɵeŋni pini.
6War mefeŋ ni ɗa,
wazagai n'a sa gaglai aŋ kir kai,
hlai aga a za maɵaɗi,
maɗai zi glas aga a wa lai.
7Mefeŋ ni ɗa a na kiini ɗa pal,
a siɗaŋ ɗa a EPIƊ-ƊAI ktai.
Duvuk warni kaalai, girvudi kaalai;
amma koskoi sek ɗa, gaglai aga a luɓasi.
8War mefeŋ ni ɗa,
yem zi liiwi aga a niyasi aha war Yeruzalem par, a ka
gal na ktai aga a ka war yem-ra n'abai zi manta, piɗi futi na dawai sek,
galni na ktai, war yem-ra n'abai na Mediteraneya, piɗi futi na koskoi sek lai.
A buza aŋ ka ɵa,
afat maa kal, apiya maa kal.
9EPIƊ-ƊAI aga a ŋa aŋ pai midiɗi yai paŋ.
War mefeŋ ni ɗa, EPIƊ-ƊAI ɗa a ni ktai, a hina a wa ɗa a yikini ktai lai.
10Afti na ɵimaɗi Yeruzalem ɗa paŋ aga a yima azumai kal-kal, siɗi Geba par haa a Rimmon ta, war gal n'amai par tiɗi Yeruzalem; Yeruzalem aga te luba amai war balamɗi dama, war min magala na wiini Benyamin par haa min magala na wel ɗa ta, haa min magala na koŋni hlai ta, sini poriyo na wiini Hananiyel haa sin hlai na wiini pai n'e cipiɗi emel gaini vin woni ɗa ta.
11Ɗai aga e simni war fuŋ n'abai hanɗa,
wala n'a glasi tusa arbaɗi aga a za kir kai,
Yeruzalem aga te sumna ɵeɗ.
12Ɗai paŋ n'e kiɗisi askarai na wiiɗi aŋ hitimi gaiɗi Yeruzalem ɗa, gir n'EPIƊ-ƊAI aga a tikiŋɗi midiɗi a na maini nɵa: neŋ siɗi aga a hofa won hlai n'e ɗa miɗini eziɗi yaw hai, arɗi aga a hofa amlai war waŋni, alisiɗi te hofa amlai miɗi lai.
13War mefeŋ ni ɗa,
EPIƊ-ƊAI ɗai aga a miliɗi hunai piɗi abai gara,
ɗif paŋ aga a furɗa maini na gaini, buri e dibi was,
ɗif paŋ a paya mini maini.
14Ɗai na Yuda aga e tipi gaiɗi ɗai na Yeruzalem war hatam.
Nɵa aga e mili wazagai na wiiɗi pinziba na ɵimaɗi paŋ:
maini or ɵa, arzaŋ ɵa, sapakai ɗa, a pɵa kai.
15Gir hanɗa aga a za sini plasai, sini plasai z'atoŋo, sini ɵigini, ablehökai gaini wazagai n'ezini puɗu puɗu n'a na war kaŋ na wiiɗi gawɗi ɗa lai paŋ; a gir na mai maini ɵa.
16Nɵa nagai paŋ n'e hini li piɗi pinzibaɗi n'e ɗi ka hitimiti Yeruzalem ɗa,
aga e hilisi amai a Yeruzalem buza buza paŋ,
aŋ hûrgû azumai wuzani pai, EPIƊ-ƊAI zi spak paŋ,
buri e ziti fet na wiini gumu.
17Amma pinziba na midiɗi yai n'e hili amai Yeruzalem buri e hûrgû azumai wuzani pai, EPIƊ-ƊAI zi spak paŋ ɗa kai ɗa, faŋ aga a ɵa midini aftiɗi kai. 18Na ɓa ɗai n'Egipte e diri e hili amai a Yeruzalem kai, na ɓa e hili kai ɗa, faŋ aga a ɵa midiɗi kai. Hanɗa a gir n'EPIƊ-ƊAI aga a hinaŋsi midiɗi pinziba n'e diri e hili amai aŋ zi fet na wiini gumu kai ɗa. 19Hanɗa a gir n'e tikiŋɗi midiɗi Egipte, na wiiɗi pinziba paŋ n'a dara hala amai buri a ziti fet na wiini gumu kai ɗa, a za ɵa lai.
20War mefeŋ ni ɗa, sini adeŋeleŋ na wulani plasai ɗa, aga e ɗû maini nɵa: “A wiini EPIƊ-ƊAI”, dognokai n'amlai war dalam na wiini EPIƊ-ƊAI aga a bunda sɗik maini kup zi yimi fel gaini na war hlai zi ɓaka ɗa nɵa. 21Dognokai na war Yeruzalem gaiɗi Yuda paŋ aga a sa edi aŋ wiini EPIƊ-ƊAI zi spak paŋ. Nagai paŋ n'aga e hilisi aŋ zi ɓaka ɗa, aga e diŋ ɗa warni. War mefeŋ ni ɗa, ɗif zi cakala a hina amlai war dalam na wiini EPIƊ-ƊAI zi spak paŋ kir- kai.
Currently Selected:
Sakariyas 14: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
