Malakiyas 1
1
1Hanɗa a miɗi n'EPIƊ-ƊAI a miɗiŋni wiini Malakiyas buri a miɗiŋɗi wiiɗi aliɗi Izrayel.
EPIƊ-ƊAI a diriti Izrayel
2EPIƊ-ƊAI a muɗa: Mu diriki gara,
amma tiki ki miɗiŋa ɓa:
ku diriyi gara ɗa war a maɗa?
Ta EPIƊ-ƊAI mu zilbiki ɗa ɓa:
Ezaw ɗa a tawalni Yakob kai ɗi?
Gai hanɗa paŋ ɗa mu dara Yakob,
3mu bula gaw sini Ezaw,
mu tuura hlai zi huwuŋ na wiini Ezaw ɗa edi,
pra mu sa afti na wiini edi wiini barka ceŋ-ceŋ n'edi war basga na kaɗataŋ.
4Na ɓa Edomitekai, pinziba na wiini Ezaw, e miɗi li ɓa: ɗai e kirpiyi,
amma aga mi rgi fuŋyi n'abakai n'a tuura edi ɗa amai ɗa,
EPIƊ-ƊAI zi spak paŋ a na muɗa maini nɵa:
e rgiŋ wiiɗi, aga mu hoŋ azumai pra,
ɗai aga e ɵiɗi yiki ɓa: “Afti na wiini meefeŋ”,
pinziba n'EPIƊ-ƊAI aŋ gaini, gaini hiy n'abai, ɵa haa kureɗ.
5Arki aga a talaŋ,
aga ki miɗi gaini miki lai ɓa:
EPIƊ-ƊAI ɗa a abai,
haa edi par duɓani afti na wiiɗi Izrayel.
EPIƊ-ƊAI a ɓiriɗi paakai zi ɓaka
6EPIƊ-ƊAI zi spak paŋ a muɗa siɗi paakai zi ɓaka maini nɵa:
Ahi paŋ a sa hormo wiini epini,
ɗif zi sda paŋ wiini epin-gezani lai,
nɵa na ɓa ta m'Api,
hormoŋa ɗa aŋ wata ɗa?
Na ɓa m'Epin-gezaki,
ki ɗa hûniŋa ɗi?
Tiki paakai zi ɓaka,
na ki miisi yikiŋa,
amma ki miɗi: mi miisuku maɵa maɵa ɗa ɗa?
7Ki kisi wazagai zi simi na haharai miɗini gûwiŋ zi ɓaka na wiya,
ki miɗi pra ɓa:
mi zi zi hihir suku ɗa war a maɗa?
A na ɗa gaini miɗi na ki miɗi ɓa:
gûwiŋ zi ɓaka na wiini EPIƊ-ƊAI a nafa kai.
8EPIƊ-ƊAI zi spak paŋ a na muɗa maini nɵa:
Won hlai na ki zi ɓaka gaini farai na malvanai,
ki zi ɗa a meefeŋ kai ɗi?
Zaw ɓa ki kisi na daŋlaŋai, zaw zi veglek,
ki hiini ɓa a meefeŋ kai ɗi?
Ka wala na mai hanɗa ɵa wiini Lawan haw le
aga a yimaŋ tuku ɗi?
Aga a yumuku sini pɗem ɗi?
9Tiyana ɗa, mu siiwiki, siiwiŋa Ta Alaw na wiiki
kapai mu hiina haw buriki,
wala hanɗa a halasi siki par,
aga mu yimiki gaini firiyi ɗi? Zaw kai.
A miɗi na sini EPIƊ-ƊAI zi spak paŋ par.
10EPIƊ-ƊAI zi spak paŋ a muɗa:
Arbaki par ɗa ɗif
n'aga a ɵa mini hlai ka,
kapai ki yi afu kadai meere
warni gûwiŋ zi ɓaka na wiya kai ɗa asiya ɗa?
Firyiŋa midiki kaalai,
ɓakaki na ki ziŋ ɗa ɗe a saŋa firiyi kaalai.
11A muɗa pra: Piɗi futi na dawai par par haa piɗi futi na koskoi ta,
pinzibaɗi ɗai paŋ, e siɗiti abaiŋa.
War hlai paŋ ɗai e yi wazagai zi ɗûgûdi zi lûgûzi buriya, e kisi ɗa a ɓaka na hilu, buri ɓa pinziba paŋ a siɗiti abaiŋa ya, a miɗi na sini EPIƊ-ƊAI zi spak paŋ par. 12Amma tiki ki ziŋa aŋ meefeŋ kiɗi tiki gaini miɗi na ɓa: gûwiŋ zi ɓaka na wiini EPIƊ-ƊAI a nafa kai, simi na woni ɗe a na hihir lai. 13A muɗa: Ki ɗa miɗi pra ɓa: a kayai na maɵa ɗa? Jaaki gaiɗi abaiŋa kai, ki kisi aŋ ɓaka ɗa a farai zi hill, na daŋlaŋai, na veglekkai lai, like na maini hanɗa nɵa ɗa mu yimaŋ tiki par ɗi? 14Haw miɗini ni zi mihill n'aŋ gaini farai na pɗamai war farani, amma a saŋa aŋ like ɗa a wala na veglek blaŋ, haw burini, buri Ta mu pai n'abai, pinzibaɗi ɗai paŋ e hûniŋa.
Currently Selected:
Malakiyas 1: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
