Malakiyas 2
2
EPIƊ-ƊAI a ziɗi zaida wiiɗi paakai zi ɓaka burini wala n'aga a za siɗi ɗa
1EPIƊ-ƊAI zi spak paŋ a na miɗiɗi wiiɗi paakai zi ɓaka maini nɵa:
2Na ɓa ki yimi seŋŋa kai,
ki siŋa kol gaiɗi agulki paŋ kaalai ɗa,
aga mu hinasi tuusa midiki,
ɓiki na mu ziki ɵinini-ha miɗini aga mu bundaŋ buriki aŋ tusa,
aga mu zaŋ nɵa buri ɓa arbaki ɗif n'a za sdani gai futini nɵa aŋ kai.
3Mu tika pa ya aŋ ziɗi gir wiiɗi pinzibaki ɗa,
aga mu poko eveŋni farai,
na ki yiŋ aŋ ɓaka warni zini fetki ɗa amai arki,
e pûkûki edi gaini paŋ lai.
4Kapai ki yimi ɓa,
Ta n'EPIƊ-ƊAI zi spak paŋ mu ziki zaida hanɗa
pin deweleni bonu na mu zaŋ gaiɗi Levi ɗa, kapai a tuura edi kai.
5Bonuŋa hanɗa, a sumna gaini,
a suŋfa, a ɵeɗ.
Mu siŋɗi ɓa kapai e hûniŋa,
nagai e hûniŋa lai.
E jiriyi wuza lai.
6E hitri edi ɗa a gadai na jre,
eles a guna war miɗi kai,
e piyi gaya war ɗikat, gaini jre,
e bindisi ɗai viya edi warni payaiɗi na meefeŋ par.
7Siɗi na wiini EPIƊ-ƊAI a hitraŋ edi ɗa a pai zi ɓaka,
gadai na kapai ɗai e zi pini e zilbiŋ ɗa tini lai,
buri ɓa ni a ɵeŋ
na wiini EPIƊ-ƊAI zi spak paŋ.
8Amma tiki ki zi pini seŋ hanɗa kai,
ki wili ɗai viya edi gaini gadaiki na meefeŋ,
bonu na mu zaŋ gaiɗi Levitekai ki tûûriŋ kok,
a miɗi na sini EPIƊ-ƊAI zi spak paŋ par.
9Amma tiyana ɗa, aga mu siki edi
min miisi gaini tikini siyer,
wuzani arɗi ɗai paŋ.
Buri ki zi pini gadai na wiya kai,
ki ɗa zi ɓraw arbaɗi ɗai lai,
gaini gadai ɗa.
Wazagai na sulu n'a tuura bonu
10Tumu paŋ ɗa Apumu a ktai kai ɗi?
A rgumu ɗa a Alaw ni ktai kai ɗi?
Nɵa mu miisimu marmu arbaɗi marmu buri ma ɗa?
mu tuurumu bonu n'arbani Alaw gaiɗi tamaimu ɗa buri ma ɗa?
11Ɗai na Yuda e zi pini miɗiɗi kai,
e zi wala na hihir aha midini afti na Izrayel, aha war Yeruzalem lai.
E tili hlai na sɗik na wiini EPIƊ-ƊAI n'a daraŋ gara ɗa aŋ wala kadai, e mili falakai n'e hûrgû azumai wuzani alawai na zamai. 12Ɗif n'a za maini nɵa a pɗem ɓa EPIƊ-ƊAI a vada pinzibani edi warɗi Izrayel par, gaini ni n'a kasi ɓaka wiini EPIƊ-ƊAI zi spak paŋ burini lai ɗa.
13Wala n'ag'aŋ sulu na ki ziŋ ɗa a hanɗa:
ki vi gûwiŋ zi ɓaka na wiini EPIƊ-ƊAI gaini tuwi,
ki tuwi, ki ɵi hama siki lai,
buri ɓa EPIƊ-ƊAI a na tika hangalni sini ɓakaki kai,
a na yima wala tiki par kir kaalai.
14Ki zilbi siki ɓa, a za nɵa buri maɗa?
Buri tuku ku ha wala muku wuzani EPIƊ-ƊAI,
ɓa aga ku sumna war jre gaiɗi muni na ku tikiti war gawlaku,
na ku za bonu gaiɗi, ku paya gaiɗi lai.
Paŋktai ku hiniti edi mak.
15EPIƊ-ƊAI a tipiki ktai war neŋ-si, war seze lai kai ɗi?
Tipi na ktai hanɗa a firiya ɗa a maɗa?
A ali na tini Alaw par n'a za ha midini kai ɗi?
Ki giɗimi siki pɗem,
ɗif a hiniti munini n'a tikiti war gawlani par ɗa edi kai.
16EPIƊ-ƊAI, Alaw na wiiɗi Izrayel a na muɗa maini nɵa:
bidiɗi muni, a wala na meefeŋ gara,
a na kal kal maini ɗif n'a za kaarai ɗa nɵa.
Nɵa aga ki tiki hangalki ta,
kapai ki bidiɗi falakaiki kai.
EPIƊ-ƊAI aga a ɵina ɵeŋni
17Ki ɗa kiyi EPIƊ-ƊAI gaini seŋki zi miɗi,
ki miɗi ɓa:
Mi kiyiŋ ɗa war maɗa?
Ki kiyiŋ ɗa won hlai na ki ɗa miɗi ɓa: Ɗif n'a za meefeŋ ɗa,
a ɗif n'EPIƊ-ƊAI a daraŋ ɗa,
EPIƊ-ƊAI a dara ɗa a ɗif na mai hanɗa ɵa.
pra ki zilbi ɓa Alaw n'a ziti sariya na jre ɗa aŋ wata dam ɗa?
Currently Selected:
Malakiyas 2: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
