Sakariyas 13
13
1War mefeŋ ni, yem zi liiwi aga a luɓasi edi, aŋ ma tuwur gaini hihir na wiini dalamni David gaiɗi ɗai na Yeruzalem ɗa edi.
Alaw aga a vidiɗi alawai zi rgi gaiɗi ɗai na min Alaw na jrekai kai ɗa edi
2War mefeŋ ni ɗa, aga mu vidiɗi alawai zi rgi edi midini afti par, ɗif aga a yikaŋ mini kir kai. Aga mu birgiɗi ɗai na min Alaw na jrekai kai, gaini seze na wiini hihir ɗa lai edi, a miɗi na sini EPIƊ-ƊAI zi spak paŋ par. 3Na ɓa ɗif a na za sini aŋ ɗif na min Alaw ɗaai ɗa, epini gaiɗi emini, n'e wiŋ mal ɗa, aga e miɗini ɓa: Girna ku ba ta, buri ku muɗa war yikini EPIƊ-ƊAI na ɗa a eles. Epini gaiɗi emini n'e wiŋ ɗa mal aga e fiɗiŋ edi, na ɓa a na za sini aŋ ɗif na min Alaw ɗa. 4War mefeŋ ni, ɗif na min Alaw paŋ siyer aga a yimaŋ burini wazagai n'a siŋka arni, won hlai n'a na muɗa seŋ na wuze edi ɗa. Aga e wi sapa z'ayirni adumai siɗi kir kai, kapai e tipi gaiɗi ɗai na doogo paŋ ɗa. 5Ɗif na min Alaw paŋ aga a ɓuɓura mini ɓa: ta mu ɗif na min Alaw kai, mu hirma na gai hirmi. Mu za sda na wiini epin-geza haa war agwiya par. 6Nɵa ɗai aga e miɗini ɓa: wuruk n'a na sini didikku ɗa a siŋka ɗa a ma ɗa? Aga a waya seŋ ɓa mu navaŋsi ahaɗi marmakaiya par.
EPIƊ-ƊAI aga a siŋka edi arɗi ɗai gaglai ɓa a Alaw
7Kaɵkar faka amai sini ɗifŋa zi gɗam ɗa,
sin marmaya na siɗi agula ɗa,
a miɗi na sin EPIƊ-ƊAI zi spak paŋ par.
Fuɗa ɗif zi giɗimi ɗa edi,
hina adumai ɗa a ɵara edi,
nɵa aga mu fuɗa alini n'agogoi ɗa edi.
8Buri nɵa, midini afti paŋ,
war ɓrawni wala azi hu ɗa, gal na sulu aga a fuɗa edi,
amma gal na ktai n'a hina, aga a sumna karni.
a miɗi na sini EPIƊ-ƊAI par.
9Gal na ktai n'a hina ɗa, aga mu waŋ arni afu,
aga mu zaŋ edi hilu maini arzaŋ n'e hiliyiŋ ɗa nɵa,
aga mu titimaŋ gaini afu maini ɗif n'a hiliya or ɗa nɵa.
Gal hanɗa aga a siiwaŋa
ta aga mu ɵina siiwani lai.
Aga mu muɗa ɓa: Hanɗa e ɗi ɗai na wiya,
nagai aga e miɗi ɓa: Alaw na wiyi ɗa a EPIƊ-ƊAI.
Currently Selected:
Sakariyas 13: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
