Sakariyas 12
12
Ɗai e cikiti Yeruzalem, EPIƊ-ƊAI a piliti edi tiɗi par
1Zaida na wiini EPIƊ-ƊAI.
Seŋ na wiini EPIƊ-ƊAI midiɗi Yeruzalem.
A miɗi na sini EPIƊ-ƊAI par, ni n'a za hlai n'amai
a ziti yai lai;
n'a sa suŋfa wiini ɗif amlai warni lai:
2Aga mu binditi Yeruzalem maiɗi wala zi ci n'a turla ɗai, buriɗi nagai na ɵimaɗi paŋ. Yuda nɵa lai, won hlai na ɗai aga e cikiti Yeruzalem ɗa. 3War mefeŋ ni ɗa, aga mu binditi Yeruzalem aŋ ahi-fuŋ, na ɗai aga e piyi aŋ tikiŋ amai. Asiya ɗi paŋ n'a paya futi li aŋ tikaŋ amai ɗa, aga a siɗa girni sini. Nɵa pinzibaɗi ɗai na midiɗi yai paŋ aga e diŋgisi midiɗi. 4War mefeŋ hanɗa, a miɗi na sini EPIƊ-ƊAI par, aga mu turla plasaiɗi zi gaw ɗa paŋ, nagai n'e simni duɓani aga e miɗi vulum vulum lai. Amma ɗai na Yuda ɗa, aga mu mula ara midina, plasai na wiiɗi pinziba na zamai ɗa paŋ aga mu ŋilva arni ɗa. 5N'abakai na war Yuda aga e yimi ɓa gdaŋ na wiiɗi ɗai na Yeruzalem ɗa, a na sin EPIƊ-ƊAI zi spak, Alaw na wiiɗi par. 6War mefeŋ ni ɗa aga mu bindiɗi n'abakai na war Yuda kal kal maini afu n'a tika pini jur n'abai nɵa, maini afu zi dû n'e piŋ pini broko nɵa. Nagai aga e vidiɗi pinziba na ɵimaɗi paŋ edi, war gal na sek lai, na sek lai. Amma Yeruzalem aga te hina war balamɗi n'avut ɗa ɵa, wala a titimiti kai.
7Avut, EPIƊ-ƊAI aga a kurɗa fuŋ zamai na war Yuda edi, kapai kol na wiini pinzibani David gaini kol na wiiɗi ɗai na Yeruzalem a suwa na wiiɗi ɗai na Yuda gai hlaiɗi paŋ kai. 8War mefeŋ hanɗa, EPIƊ-ƊAI aga a wa tini edi midiɗi ɗai na Yeruzalem paŋ, aŋ giɗimiɗi, na hurofai arbaɗi aga e bindi gdaŋai maini David nɵa. Pinzibani David lai aga a bunda arɗi maini Alaw nɵa. A bunda wuzani arɗi ɵeŋ na wiini EPIƊ-ƊAI na wuzaɗi su nɵa.
Tuwi midini afti paŋ
9War mefeŋ hanɗa aga mu faka amai aŋ vidiɗi ɗai paŋ n'e hilisi aŋ cikiti Yeruzalem ɗa edi. 10Nɵa aga mu ma seze zi yum gaini zi siiwa lai miɗini pinzibani David gaiɗi ɗai na Yeruzalem. Nagai aga e bindisi arɗi sa ta, n'e ɓiliŋa. Aga e tuwiŋa maini n'e tuwi ahi n'aŋ tini epini ktai nɵa. Aga e tuwi haa viya maini n'e tuwi ahi n'a wa avut ɗa nɵa. 11War mefeŋ ni tuwi n'aga a za war Yeruzalem ɗa, aga a za abai kal-kal maini tuwi na ɗai e tuwi Hadad-Rimmon war hlai na plas na Megido ɗa nɵa. 12Midini afti na Yuda, piɗi humuni paŋ aga a tuwa kiini kiini.
Piɗi humuni na wiini David edi kiiɗi
maɵagai kiiɗi falakai kiiɗi lai,
piɗi humuni na wiini Natan edi kiiɗi
maɵagai kiiɗi, falakai kiiɗi lai,
13piɗi humuni na wiini Levi edi kiiɗi
maɵagai kiiɗi, falakai kiiɗi lai,
piɗi humuni na wiini Simeiedi kiiɗi
maɵagai kiiɗi, falakai kiiɗi lai,
14Na zamai paŋ e ziŋ ɵa lai, piɗi humuni paŋ edi kiiɗi, kiiɗi,
maɵagai kiiɗi, falakai kiiɗi lai.
Currently Selected:
Sakariyas 12: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
