Sakariyas 11
11
Afti zi spak, aga a tuura edi
1Huwuŋ na Liban, mala min magalaku edi,
hina afu a ya luwuŋ Sedre na wiiku ɗa edi.
2Tuku luwuŋ Sipre, ɗuula, buri luwuŋ Sedre ɗa a kɵa su,
buri ɓa luwaŋai na juva gara ɗa a fuɗa azumai ca.
Ɗûûli! Tiki luwaŋai, seŋ na war Basan
buri jur na ɗif a na ka a niya arbani kai ɗa, a fuɗa azumai ca paŋ.
3Ziɓiri tuwi na wiiɗi ɗai zi giɗimi,
buri hlai na juf na wiiɗi ɗa a tuura edi kok.
Ziɓiri nûûmi na wiini ali gurnai,
buri luwaŋai na ŋoya pini ɵimani Yurdan ɗa a vada edi vat.
Ɗai zi giɗimi na sulu
4EPIƊ-ƊAI, Alaw na wiya a na muɗa maini nɵa: Si simi wiini adumai n'a na baya fiɗi ɗa. 5Nagai n'e wûriŋ e fiɗiŋ gaini seŋ midiɗi kai, nagai n'e cikiliŋsi edi ɗa, e miɗi kol sini EPIƊ-ƊAI, mi zi farai li. Ɗai n'e giɗimiŋ ɗa, ktai na hiina haw buriɗi aŋ kai. 6Aga mu hiina haw buriɗi ɗai na midiɗi yai ɗa kir kai. A miɗi na sini EPIƊ-ƊAI par. Buri nɵa, aga mu siɗi ɗai war tiɗi marɗi, war tiɗi paakaiɗi lai; paakai aga e tûûri afti ɗa edi, aga mu pliɗi edi war tiɗi par kai. 7Nɵa mu bunda aŋ ɗif zi gɗam na wiini fara na wiini adumai na ɗai zi sakala e kiŋ aŋ fiɗi. Mu mula maraŋa zi gɗam ta sulu. Na ktai mu siɗi yiki ɓa: “Pɗemi”, na ktai ɓa “Bonu” lai. Nɵa mu tika pa aŋ giɗima fara hanɗa lai. 8Ɗai zi giɗimi na hu mu birgiɗi, war tile ni ktai, asakal par, adumai ɗa a tikaŋa ma ta, ta ɗe, mu baza min bis lai. 9Nɵa, mu miɗini: aga mu giɗimuku kir ka, adumi na te firya te mra, te mra wiiɗi, na te firya te ŋa edi, te ŋa wiiɗi, n'a hina li ɗa ɗe, a luma marni wiini lai. 10Nɵa mu tikiti amaraŋaiŋa na yikiti ɓa “Pɗemi” mu hiɗiti edi, aŋ ɗukla bonu n'EPIƊ-ƊAI a zaŋ gaiɗi ɗai paŋ ɗa. 11War yivai ni haa, bonu a ɗukla daf, nagai n'e cikili adumai n'e tiliŋa, a yima midiɗi ɓa a seŋ na wiini EPIƊ-ƊAI. 12Nɵa mu miɗiɗi: na ɓa a tala arki pɗem ɗa, siŋa vrakŋa ta, na ɓa ki diri kai ɗe, seŋ aŋ kaalai. E siŋa vrakŋa. A na sulai doogo doogo hu. 13EPIƊ-ƊAI a muɗaŋa: pokoŋ edi wiiɗi nagai n'e hiliyi kawakai ɗa, buri hanɗa a vrak na pɗem na nagai e kitiŋ buriya. Mu mula sulai na doogo doogo hu ɗa, mu siŋni wiini ɗif n'a hiliya kawakai amlai war tempel na wiini EPIƊ-ƊAI ɗa. 14Asakal par mu hiɗiti amaraŋaiŋa na yikiti ɓa “Bonu” edi, kapai zigel n'arbaɗi Yuda gaiɗi Izrayel ɗa a vada edi.
15EPIƊ-ƊAI a muɗaŋa: Za suku aŋ ɗif zi giɗimi na tatala nɵa. 16Buri nɵa, aga mu kasi ɗif zi giɗimi midiɗi yai hanɗa: adumi na te wula li edi, jaani kai, na te ŋa li edi, aga a piyiti kaalai, na te nava wuruk li ɗa, a zûûliti kai, na te na nga ɗa, a siɗi simi kai. Aga a luma farai na gaini liki, tetrek n'ezini a ɗuklaŋ edi kaalai.
17Haw gara buriɗi ɗai zi giɗimi n'e nifi kai ɗa,
n'e hini farai ɗa ɵar,
a juva ɓa kaɵkar a ɗukla tini edi
a cûtini arni na wus ɗa,
a juva ɓa tini te mra wiiɗi,
a juva ɓa arni na wus te dogo lai.
Currently Selected:
Sakariyas 11: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
