Matewus 2
2
Ɗai zi hiila na piɗi futi na dawai par e hilisi aŋ ɗûgûli Yesu
1Yesu a wa a Betlehem war Yuda war sarti na Herod aŋ warɗi pai, won hlai n'a wa li, ɗai zi hiila na piɗi futi na dawai par e cûsi a Yeruzalem, 2e zilbi e miɗi: paiɗi Yudiyakai n'a wa tiyana aŋ wata ɗa? Buri mi tilitisi maɵikini midini afti na piɗi futi na dawai par, mi hilisi buri mi hûrgû azumai wuzani. 3Hlai na pai Herod a ɵina labar hanɗa, a turla marwai, ni gaiɗi ɗai na Yeruzalem ɗa paŋ. 4A tipiɗisi paakai n'abakai zi ɓaka paŋ gaiɗi ɗai n'e ɗû wazagai n'arbaɗi ɗai buri a zilbiɗi midini hlai na Kristu aga a wa woni ɗa. 5E miɗini, a Betlehem na war Yuda, buri ɗif na mini Alaw ktai a ɗosi nɵa:
6Tuku Betlehem na war aftini Yuda,
tuku ku na agwi arbani fuŋ n'abakai na war Yuda kai zaŋ,
buri warku par Lawan ktai aga a wa, aga a za aŋ ɗif zi giɗimi na wiiɗi ɗaiŋa Izrayel,
7Asakal hanɗa Herod a yikiɗi ɗai zi hiila war ŋoyai, a zilbiɗi midini hlai na maaɵiki te siŋka arɗi ɗa. 8Asakal par a ɵiniɗi a Betlehem, a muɗa: Hili ki zilbi gaini hangal burini arwagwi ɗa, hlai na ki niviŋsi li ɗa; ki hilisi ki miɗiŋa, kapai ta lai mu hala mu hurga azumai wuzani lai. 9Won hlai n'e ɵini seŋni pai e hili wiiɗi, nɵa maaɵiki n'e tilitisi midini afti na piɗi futi na dawai par te ɵa wuzaɗi haa te cosi te ɗiya midini hlai n'arwagwi aŋ woni ɗa. 10Won hlai n'e tiliti maaɵiki, firiyi n'abai a yimiɗi. 11E niyi amlai warni dalam e tili arwagwi gaiɗi Maria n'emini, e hûrgû azumai wuzani. E mili godaiɗi edi, e sini or, gaini wala zi ɗûgûdi zi lûgûzi, gaini mir lai aŋ like. 12Asakal par Alaw a gidiɗi war weseŋ si pɵi buri e wiyi sini Herod kai, e wiyi aha midini aftiɗi ɗa warɗi futi zamai.
Pri n'edi war Egipte
13Won hlai n'e hili li, ɗif zi ɵeŋ na wiini Epiɗ-ɗai a siŋka sini arni Yosef war weseŋ zi pɵi a muɗa: Faka amai, ku tika arwagwi gaiɗi emini, lawa war Egipte, ku sumna woni haa mu muɗuku ɗi haw, buri Herod aga a paya aŋ fuɗa arwagwi ɗa edi. 14Yosef a faka amai duvuk, a tika arwagwi gaiɗi emini a hala gaiɗi war Egipte. 15A sumna woni haa sini mrini Herod, a za nɵa kapai wala n'EPIƊ-ƊAI a muɗaŋ mini ɗif na mini Alaw aga a va amai, won hlai n'a muɗa ɓa: war Egipte par mu yikasi ahiya.
Fiɗi n'edi na wiiɗi aliyagoi n'agogoi na war Betlehem
16Won hlai na Herod a tala ɓa ɗai zi hiila e zi rhai sini li, a bunda gaini hiy n'abai. A ɵiniɗi ɗai edi aŋ fiɗiɗi aliyagoi na maɵagai na war Betlehem gaini afti na ɵimaɗi paŋ edi, aliyagoi n'e zi buza sulu gaiɗi n'e zi buza sulu kai hai lai, sini mefeŋ n'a nava labar miɗi ɗai zi hiila warni ɗa. 17Won hlai ni seŋ na Yeremiyas, ɗif na mini Alaw a muɗaŋ a va amai, won hlai n'a muɗa ɓa:
18Wule a wa war Rama,
tuwi gaini hama n'abai,
te tûwiɗi aliɗi na te Rakel,
te dara arai zi pi kai,
buri nagai e ɗa kir kai.
Edi warɗi Egipte par Yosef a wayasi aha Nazaret
19Asakal mrini Herod par, ɗif zi ɵeŋ na wiini Epiɗ-ɗai a siŋka sini arni Yosef war weseŋ zi pɵi war Egipte, 20a muɗa: Faka amai, tika arwagwi gaiɗi emini, hala midini aftiɗi Izrayel, buri nagai n'e piyi suŋfani arwagwi ɗa e mri ya. 21Yosef a faka amai a tika arwagwi gaiɗi emini a wayasi aha midini aftiɗi Izrayel. 22Amma won hlai n'a ɵina ɓa Arkelawus a na aŋ pai war Yudiya war balamni Herod n'epini ɗa, a huna buri a hala woni. Amma Alaw a miɗini gaini war weseŋ zi pɵi buri a hala a sumna war Galeliya. 23Asakal par a hala a za dalamni war fuŋ n'abai ktai yikini Nazaret, kapai wala na ɗai na mini Alaw e miɗiŋ ɗa a va amai, kapai aga a yika ɓa ɗif na Nazaret.
Currently Selected:
Matewus 2: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
