Matewus 13
13
Seŋ zi siŋka maini midini ɗif zi sûûɗi seyem
Mark. 4.1-9; Luk. 8.4-8
1War mefeŋ ni dama Yesu a niya anene warni dalam par a sumna ɵimaɗi yem-ra-n'abai. 2Firiɗi ɗai viya a tapasi sini, haa a niya warni hulum n'abai a sumna warni. Firiɗi ɗai e simni amai wulani daŋ par.
3A miɗiɗi wazagai viya war seŋ zi siŋka maini a muɗa: Tili ɗif zi sûûɗi seyem a hala edi aŋ suuɗaŋ azumai. 4Won hlai n'a na suuɗaŋ seyem zamai a yaka ɵimaɗi futi, wala zi ɗufli a halasi a sumaŋ. 5Zamai a yaka midini hlai zi kriyit, hlai n'a nava afti abai kai, a diya witaw, buri aftini a hulum kai. 6Amma won hlai na futi te diyasi amai te yaŋ edi, buri sirdaini aŋ kai, a siita edi. 7Zamai a yaka arbani hedek, hedek a wula amai a rozoŋ. 8Zamai a yaka arni afti na pɗem, a wa ali, zamai a za miya, zamai a za doogo doogo ɵaara, zamai a za doogo doogo hu lai. 9Ni na ɵimaɗi zi ɵini a na, aga a ɵina.
Yesu a muɗa war seŋ zi siŋka maini buri maɗa?
Mark. 4.10-12; Luk. 8.9-10
10Ɗai zi hitri e hili sini e miɗini, ku muɗa siɗi war seŋ zi siŋka maini buri ma ɗa? 11A waya seŋ a miɗiɗi, buri a sa siki tiki aŋ siɗa wazagai zi ŋoiyai na wiiɗi paini fuŋ-n'Alaw, amma a sa siɗi nagai kai. 12Buri ni na wiini a na, aga a sa sini pra, aga a va abai gara lai, amma ni na wiini aŋ kai, walani n'a na, hanɗa aga a yima edi sini par lai. 13Buri nɵa mu ɓaka seŋ siɗi war seŋ si siŋka maini, buri e tili paŋktai e tili kai, buri e ɵini paŋktai e ɵini kai, e ɵini ezini edi kai. 14Buriɗi nagai, seŋ na wuze na wiini Esaya a va li, n'a muɗa:
Aga ki ziɓiri, amma aga ki ɵini kai,
aga ki tili, amma aga ki siɗi wala ktai kai.
15Buri agulɗi ɗai hanɗa a diŋra diŋir,
ɵimaɗi a bunda a ɵina yum yum, e dûgû arɗi duk,
kapai e tili gaini arɗi kai, e ɵini gaini ɵimaɗi kai,
e siɗi ezini seŋ gaini hiiniɗi kaalai,
kapai e siɗi aŋ wiyisi hiiniɗi sini Alaw kai, kapai a zûûliɗi kai.
16Amma ɵeɗ midini arki, buri arki a tala, buri ɵimaki lai, ɵimaki a ɵina. 17Buri jre, mu miɗiki, ɗai na min Alaw gaiɗi na jre-ɗikat viya e piyi aŋ tili wazagai na ki tiliŋ, amma nagai e tiliŋ kai, aŋ ɵini wazagai na ki ɵiniŋ, amma e ɵiniŋ kai.
Yesu a muɗa edi ezini seŋ zi siŋka maini midini ɗif zi sûûɗi seyem
Mark. 4.13-20; Luk. 8.11-15
18Seŋ zi siŋka maini burini ɗif zi sûûɗi seyem te siŋka edi maini nɵa. 19Won hlai na ɗif a ɵina seŋ midiɗi pai, amma a ɵina ezini edi kai, na meefeŋ a halasi a mula wazagai n'a suuɗa warɗi agulni par, hanɗa a ni n'a nava sûûɗini seyem ɵimaɗi futi. 20Amma ni n'a nava sûûɗini seyem war hlai zi kriyit, a ni n'a ɵina seŋ, tizaw tar a yimaŋ gaini firiyi. 21Amma sirdai warni kai, a safa burini hlai n'agwi kadai, gir gaini ɓarai a fakasi li burini seŋ ɗa, a wa sini edi tar. 22Ni n'a nava sûûɗini seyem arbani hedek, hanɗa a ni n'a ɵina seŋ, amma hiini na wiiɗi yai hanɗa gaini tanai na wiini farai a roso seŋ ɗa warni, a wa ali kai. 23Amma ni n'a nava sûûɗini seyem arni afti na pɗem ɗa, a ni n'a ɵina seŋ, a ɵina ezini edi lai, a wa ali, zamai a sa azi miya, zamai azi doogo doogo ɵaara, zamai doogo doogo hu lai.
Evek na meefeŋ n'arbani algama
24Seŋ zi siŋka maini na zamai a muɗaŋ edi siɗi a muɗa: paini fuŋ -n'Alaw te na maini ɗif n'a suuɗa seyem na pɗem war vowaini. 25Amma won hlai na ɗai e kili weseŋ, gawni halasi a suuɗa evek na meefeŋ arbani algama, a hala wiini 26Amma won hlai na seyem a diya amai, a wa ali, evek na meefeŋ a siŋka sini edi lai. 27Nɵa ɗai zi sida na wiini epin-dalam e hilisi e miɗini, api, ko suuɗa war vowaiku a seyem na pɗem kai ɗi? Evek na meefeŋ a halasi arbani wata par ɗa? 28A miɗiɗi, gaw ktai a za hanɗa. Ɗai si sida e miɗini, ku dara ɓa mi hili mi rɗiŋ edi ɗi? 29Amma a muɗa, zaw kai, kapai ki rɗi algama amai, won hlai na ki tipi evek amai ɗa kai. 30Hiniŋ sulu paŋ a wula ktai, haa hlai zi hiɗi, won hlai na hlai zi hiɗi a cosi li, aga mu miɗiɗi wiiɗi ɗai zi hiɗi, tipi evek na meefeŋ avut ki rgiŋ buri ki yiŋ edi, amma ki mili algama warni vreŋa.
Seyemni seneve
Mark. 4.30-32; Luk. 13.18-19
31A muɗa seŋ zi siŋka maini na zamai siɗi pra, a muɗa: Paini fuŋ-n'Alaw te na maini seyemni Seneve na ɗif ktai a suuɗaŋ warni vowaini. 32Ni, n'agwiyeŋe kadai arbani seyem paŋ, amma won hlai n'a wula amai li, ni a abai a suwa sugoi paŋ, a bunda aŋ luwuŋ haa wala zi ɗufli n'arbani hlai n'amai a halasi a yima gutni amai sin graŋni.
Is
Luk. 13.20-21
33A miɗiɗi seŋ si siŋka maini na zamai a muɗa: Paini fuŋ-n'Alaw te maini is na muni te tikaŋ, te koŋ arni daramni avudi hu, haa is a niya arni paŋ.
Yesu a muɗa war seŋ zi siŋka maini
Mark. 4.33-34
34Wazaagai hanɗa paŋ Yesu a muɗaŋ wiini firiɗi ɗai war seŋ zi siŋka maini, a miɗiɗi seŋ kai sai war seŋ zi siŋka maini. 35Kapai wala na ɗif na mini Alaw a muɗaŋ ɗa, a va amai n'a muɗa: 36Mu dara mu mala ma amai war seŋ zi siŋka maini, mu dara mu muɗa edi wazagai n'a na war ŋoyai war piɗi yai zi tiki par.
Yesu a muɗa edi ezini seŋ zi siŋka maini miɗini evek na meefeŋ n'arbani algama
37Asakal hanɗa a hiniɗi ɗai e hili, a niya warni dalam. Ɗaini zi hitri e hilisi sini e miɗi, siŋkiyi seŋ zi siŋka maini miɗini evek na war vowai ɗa. A waya seŋ a muɗa: Ni n'a suuɗa seyem na pɗem hanɗa a Ahini ɗif. 38Vowai te yai, seyem na pɗem hanɗa e ɗi aliɗi pai, amma evek e ɗi alini na meefeŋ. 39Gaw n'a suuɗa hanɗa a Mat, hlai zi hiɗi a dibiɗi yai. Ɗai zi hiɗi e ɗi ɗai zi ɵeŋ na war fuŋ-n'Alaw. 40Maini evek a tapa a ya arni afu, nɵa lai aga a za war dibiɗi yai. 41Ahini ɗif aga a ɵiniɗisi edi ɗaini zi ɵeŋ na war fuŋ-n'Alaw, nagai aga e tipi edi warɗi paini par wazagai zi tanai paŋ gaiɗi nagai n'e zi woɗi futini ɗikat kai. 42Aga e ɵiŋkiɗi warni waŋ z'afu, woni a tuwi gaini hirɗini sisiyeŋ. 43Nagai na jre ɗa aga e ŋili maiɗi futi nɵa warɗi pai na wiini Epiɗi. Ni na ɵimaɗi a na aga a ɵina.
Godai na ni ŋûyi
44Paini fuŋ-n'Alaw te na maini godai na gai ŋûyi cok warni vowai na ɗif ktai a navaŋ a ŋoyaŋ. War firiyini a hala a wurasi wazaagaini paŋ edi a wura vowai ni ɗa.
Aiduwi na wûriɗi abai
45Paini fuŋ-n'Alaw te na pra maini ɗif zi cakala, n'a paya aidaw na pɗamai. 46Won hlai n'a niviti aiduwi na wûriɗi abai ɗa li, a hala edi a wura wazagaini paŋ edi, a wûriti.
Ava
47Paini fuŋ-n'Alaw pra te na maini ava n'a ɵiŋka agoɗom n'a diŋga pinzibani hilif paŋ. 48Won hlai n'a va li, e sipiŋ amai gadaŋ, e simni azumai e mili na pɗamai warni magaza, amma na maafanai e pûkûŋ edi. 49Maini nɵa aga a za war dibiɗi yai. Ɗai zi ɵeŋ na war fuŋ-n'Alaw aga e hili edi e ɓûrwiɗi na maafanai edi siɗi na jrekai par. 50E ɵiŋkiɗi warni waŋ z'afu, woni a tuwi gaini hirɗini sesiyeŋ.
Gadai na hahakai gaini na walakai
51Ki ɵini ezini seŋ hanɗa edi paŋ ɗi? E miɗini, nkam. 52A miɗiɗi, buri nɵa, ɗif zi ɗû wazagai na asiya asiya paŋ n'a bunda aŋ ɗif zi hitri na wiiɗi pai n'Alaw, a na maini epin-dalam n'a ka edi warni godaini par wazagai na hahakai gaini wazagai na walakai.
War Nasaret e bili Yesu arɗi kai
Mark. 6.1-6; Luk. 4.16-30
53Won hlai na Yesu a vada seŋ zi siŋka maini hanɗa, a hina hlai ni, a hala edi woni par. 54A halasi midini aftini, a hitriɗi warni sinagogneɗi, haa e bindi hiyak. E miɗi, ɗif hanɗa a nava yel nɵa gaini sda na zi spak na nɵa wata par ɗa? 55Hanɗa a ahini ɗif zi kilɗi luwuŋ kai ɗi? Emini yikiɗi Maria kai ɗi? Tawalakaini a Yakob gaini Yosef gaini Simun gaini Yudas kai ɗi. 56Tawalakaini na falakai, nagai paŋ e ɗa gaiyi won na paŋ kai ɗi? Ɗif hanɗa a nava wazagai nɵa paŋ wata par ɗa? 57A bunda aŋ wala zi dibi buriɗi. Amma Yesu a miɗiɗi: Ɗif na mini Alaw e miisiŋ war hlai zamai kai, sai midini aftini, warni dalamni lai. 58A za sda zi spak woni viya kai burini yimi kai na wiiɗi.
Currently Selected:
Matewus 13: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
