Matewus 12
12
Ɗai zi hitri e hiɗi seyem war Sabbat
Mark. 2.23-28; Luk. 6.1-5
1War mefeŋ ni ɗa Yesu a vuga arbani vowai na wiini algama, war mefeŋ na wiini Sabbat. Wiyamai te yimiɗi ɗaini zi hitri, e tiki piɗi aŋ hiɗi miɗini seyem buri e limiŋ. 2Won hlai na Farisekai e tili hanɗa, e miɗini: tala, ɗaiku zi hitri e zi wala n'aŋ gaini ɗili buri a za war mefeŋ ni Sabbat kai. 3Amma a miɗiɗi: ki tili wala na David a zaŋ won hlai na wiyamai te zaŋ gaiɗi nagai n'e ɗa gaini war ɗû kai ɗi? 4Maɵa ɗa a niya amlai warni dalamni Alaw, maɵa ɗa e limi peŋ n'a sa sini Alaw, paŋktai pini seŋ zi gadai ɗa a wala zi ɗili burini ni gaiɗi nagai na pini lai, e limiŋ ɗa e ɗi paakai zi ɓaka kiɗi! 5Zaw ki tili warni ɗû ɓa, paakai zi ɓaka war mefeŋ ni Sabbat ɗa e ɓilki Sabbat amlai warni tempel paŋktai seŋ midiɗi kai ɗa, ki tiliŋ ɵa kai ɗi? 6Amma wala n'a suwa tempel aŋ won na. 7Na ɓa ki siɗi fu ezini seŋ n'a muɗa ɓa mu dara yum, amma ɓaka kai, nɵa ki kûti sariya midiɗi nagai na seŋ na meefeŋ midiɗi kai. 8Buri Ahi a Pai miɗini Sabbat lai.
Ɗif na tini gaini mri
Mark. 3.1-6; Luk. 6.6-11
9A halaɗi edi woni par a niya warni sinagogneɗi. 10Ɗif ktai a na won na tini gaini mri. E zilbi Yesu: Seŋ zi gadai a hina ɗif aŋ zuula ɗif zi veglek war Sabbat ɗi?: Hanɗa ɓa kapai e siɗi aŋ pi seŋ midini. 11Amma a wiyiɗi seŋ a muɗa: asiya n'arbaki n'adumini te na ktai, ɓa te kɵa warni waŋ war mefeŋ ni Sabbat, aga a yimiti buri a tikiti amai kai ɗi? 12Amma ɗif ɗa a sûwiti adumi kai ɗi? Buri nɵa seŋ zi gadai a hina ɗif aŋ za pɗem war Sabbat. 13Won hlai ni a muɗa sin ɗif, maɗati tuku edi. A miɗiti edi, te bunda pɗemi, maiɗi na ktai nɵa. 14Farisekai e niyi anene, e kiti seŋ midini maɵa ɗa aga e biŋ.
Yesu a ɵeŋ na wiini Alaw
15Amma Yesu a ɵina seŋ hanɗa, a yima sini edi woni par, faraɗi ɗai viya a tapa pini, a zûûliɗi paŋ lai. 16A gidiɗi gaini gdaŋ buri e miɗiɗi wiiɗi ɗai gaini kai. 17Kapai wala na ɗif na mini Alaw Esaya a muɗaŋ ɗa aga a va amai, won hlai n'a muɗa: 18Hanɗa a ɵeŋ na wiya na mu varaŋ edi,
a ahi na mu daraŋ gara, n'a tala ara pɗem buri mu varaŋ,
aga mu hinasi Sezeŋa midini,
aga a muɗa edi wiiɗi ɗai midini jre-ɗikat
19Aga a paya sispai kai,
a ɗuula kaalai, ɗif aga a ɵina wulani warni futi kaalai.
20Vayai na gaini hûmki aga a haɗaŋ kai,
mini afu n'a ya ɗus ɗus aga a fuɗaŋ kai,
haa a ka jre ɗikat aŋ rɗa amai.
21Pinziba na zamai aga e biyi pini ɵeɗ war yikini.
Tirki na sin Seze sɗik
Mark. 3.6-30; Luk. 11.14-23
22Nɵa ɗai e kinisi ɗif na ksalai aŋ miɗini, na melveŋ na numul sini. A zuulaŋ haa ɗif na numul a muɗa a tala lai. 23Firiɗi ɗai paŋ e miliŋi pin ziɓiri e miɗi, ni hanɗa a Ahini David kai ɗi? 24Amma won hlai na Farisekai e ɵini hanɗa, e miɗi, ɗif hanɗa a birga ksalai edi gaini wala zamai kai, sai gaini Beelzebul, paiɗi ksalai. 25Amma won hlai na Yesu a sɗa hiiniɗi a miɗiɗi, pai paŋ na te za gaw sin siɗi dama, aga te ɓilka, fuŋ paŋ gaini dalam paŋ n'a za gaw sin sini dama a kiɗa aŋ ɗiya kai. 26“ba Satan a birga Satan edi, nɵa a za gaw sin sini dama, paini aga te ɗiya maɵa ɗa? 27‘ba mu ta mu birga ksalai edi gaini Beelzebul, aliki e birgiɗi edi gaini a ma ɗa? Buri nɵa, aga e zi aŋ paakai n'e ɗûklûti sariya midiki. 28Amma na ɓa mu birga ksalai edi gaini Sezeni Alaw, nɵa pai n'Alaw te cosi siki. 29“Ba ɗif a nagga ɗif na gdaŋ avut kai, a sɗa aŋ niya warni dalamni ɗif na gdaŋ aŋ vurma wazagaini maɵa ɗa? A naggaŋ ɓak, a sɗa aŋ vurma dalamni. 30Ni na warni aŋ gaigai gaya, a za gaw sa, ɗif n'a tapa wazagai gaya kai, a ɵara edi. 31Buri nɵa mu miɗiki, ɗai aga e nivi ni burini tuwur gaini tirki paŋ, amma burini tirki na sin Seze-sɗik, ɗif a nava ni kai zaŋ. 32Na ɓa ɗif a muɗa seŋ na meefeŋ burini Ahini ɗif, hanɗa aga a hiniŋni, amma ɓa ɗif a muɗa seŋ na meefeŋ burini Seze-sɗik, hanɗa aga a hiniŋni warɗi yai hanɗa kai, warɗi n'aga te halasi ɗa kaalai. 33Na ɓa luwuŋ a pɗem, alini pɗamai lai; amma na ɓa luwuŋ a meefeŋ, alini maafanai lai. Buri ɗif a sɗa luwuŋ sin alini par. 34Pinzibani hibe, tiki na maafanai, ki siɗi aŋ miɗi wazagai na pɗamai maɵa ɗa? Buri wazagai n'a vasi warɗi agul pulmuɗuk, miy a muɗaŋ edi. 35Buri ɗif na pɗem a kasi wazagai na pɗamai edi warni godaini na pɗem par, ɗif na meefeŋ a kasi wazagai na maafanai warni godaini na meefeŋ par. 36Amma mu miɗiki, seŋ zi miɗina kadai paŋ na ɗai e miɗiŋ, hanɗa aga a zilba tiɗi war mefeŋ sariya. 37Buri pin seŋku aga ku sɗa edi aŋ jre-ɗikat, pin seŋku sariya aga te ko muduku lai.
Pinziba na meefeŋ a paiya wala zi siŋki
Luk. 11.29-32
38Buri nɵa zamai n'arbaɗi ɗai zi ɗû wazagai gaiɗi Farisekai e wiyi seŋ e miɗini, Api-si-hitri mi diri mi tili wala zi siŋki tuku par. 39Amma a waya seŋ a miɗiɗi, pinziba na meefeŋ, zi rhai, a paiya wala zi siŋki. Wala zi siŋki aga a sa siɗi kai, sai siŋki na wiini ɗif na min Alaw Yonas. 40Buri maini Yonas a sumna mefeŋ hu, girvudi gaini duvuk, warni hilif n'abai, nɵa lai, Ahini ɗif aga a sumna mefeŋ hu, girvudi gaini duvuk, arni afti. 41Maɵagai na Ninive aga e fiki amai war mefeŋ zi sariya gaini pinziba hanɗa, aŋ kûti sariya midiɗi, buri nagai e hi-miy pin ɓikini seŋ na wiini Yonas, tili, n'abai a suwa Yonas aŋ won na. 42Muni zi pai na midini afti n'amai par, aga te faka amai war mefeŋ zi sariya gaini pinziba hanɗa, aŋ kûti sariya midiɗi, buri na te halasi war min afti zi dibi par aŋ ɵina yel na wiini Salmun, tili, n'abai a suwa Salmun a na won na.
Wiyini ksalai na hihir
Luk. 11.24-26
43Won hlai na ksalai na hihir a niyasi edi warni ɗif par, a hala arbani hlai z'alak aŋ paiya si n'amla, amma a navaŋ kai.
44A muɗa: aga mu waya warɗi dilimiŋa na mu halasi warɗi par ɗa; a waya warɗi lai. A niviti warɗi kadai su, gai dûgû edi silak, gai zizini gai futini lai. 45A hala a payasi marni zamai muguzak, na meefeŋɗi a suwa na wiini, e niyi amlai, e zizini siɗi warni. Ɗif hanɗa a bunda meefeŋ a suwa n'avut ɗa. Pinziba na meefeŋ na tiyana, aga a za siki nɵa lai.
Tamaini Yesu na jre jre
46Yesu a na fu aŋ muɗa gaini firiɗi ɗai hai, hlai n'emini gaiɗi tawalakaini e cûsi. E ɗiyi anene par, e firiyi e hiɗi kalaŋ gaini. 47Ɗif ktai a halasi a miɗini wiini Yesu, Tala, amuku gaiɗi tawalakaiku e ɗa anene, e firiyi e nivi gaiku. 48Amma a wiyini seŋ wiini ɗif n'a na miɗini seŋ ɗa: Ama te siya ɗa? Tawalakaya e ɗi miɗi siya ɗa? 49Asakal par, a maɗa tini edi midiɗi ɗaini zi hitri a muɗa, ama gaiɗi tawalakaya e ɗi na. 50Buri ɓa asiya ɗi paŋ n'a za dirini Apa na war fuŋ-n'Alaw, ni a tawala na wus gaiɗi na muni gaiɗi ama lai.
Currently Selected:
Matewus 12: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
