Matewus 14
14
Mrini Yohana zi Baptisme
1Won hlai na Herod, n'a sumna aŋ pai midini galni afti n'ag'aŋ puɗu, a ɵina labarni Yesu, 2a miɗiɗi wiiɗi ɗaini zi ɵeŋ, hanɗa a Yohana zi Baptisme n'a ɵiyasi amai war mri par, buri nɵa gadaŋ hanɗa a za warni. 3Buri Herod a yima Yohana, a naggaŋ, a ɵaŋ warɗi daŋgai lai, burini seŋɗi Herodiade munini Filip, na tawalni. 4Buri Yohana a miɗini ɓa, seŋ zi gadai a hinuku aŋ tikiti kai. 5A dara aŋ fuɗaŋ edi, amma a huna firiɗi ɗai, buri e tiliŋ maini ɗif na min Alaw nɵa 6Amma war mefeŋ n'a wa warni ɗa, Herod, ahiɗi Herodiade te didima wuzaɗi ɗai n'e yikisi, Herod arni a yimiti gara. 7Buri nɵa a ha wala mini, buri a dara a siɗi wala paŋ na te zilbaŋ miɗini. 8Na, pin seŋ na wiiɗi emiɗi, te muɗa, ku saŋa homokni Yohana zi Baptisme warni tasa. 9Pai sini a kwima, amma burini wala n'a haŋ mini, buriɗi ɗai n'e ɗa gaini lai, a muɗa buri a sa siɗi. 10A ɵina ɗif buri a ɗuklasi homokni Yohana warɗi daŋgai par. 11E kisi homokni warni tasa, e siŋɗi wiiɗi ahiyagwi, na te kaŋ siɗi emiɗi. 12Ɗaini zi hitri, e hilisi e tiki sini e piŋ, e hili e miɗi hanɗa wiini Yesu.
Yesu a viɗi ɗai na dubu ɵim
Mark. 6.30-44; Luk. 9.10-17; Yoh. 6.1-14; tw. Mat. 15.32-39
13Won hlai na Yesu a ɵina hanɗa, a zogo edi woni par gaini hulum, a yima sini edi war hlai zi baŋa. Won hlai na ɗai e ɵini hanɗa, e hili pini gaini eziɗi war fuŋ-fuŋ. 14Won hlai n'a niyasi amai gdaŋ, a tala firi n'abai, a hiina haw gara buriɗi, a zuuliɗi ɗai zi veglek n'e kiɗisi sini ɗa. 15Amma won hlai na futi-koskoi te zali, ɗaini zi hitri e hilisi sini e miɗi, hlai hanɗa a baŋa, futi te hala li lai, nɵa ku miɗiɗi e hili war fuŋ-fuŋ kapai e wûri wala zi simi miɗi kaalai ɗi. 16Amma Yesu a miɗiɗi, e hili buri ma ɗa? Tiki dama ki siɗi simi kai ɗi. 17E miɗini, aŋ tiyi na ɗa a peŋ ɵim gaini hilif sulu lai bas. 18A miɗiɗi: Kiŋasi. 19A muɗa wiini firiɗi ɗai buri e simni azumai arni evek ɗa, a mula peŋ na ɵim gaini hilif na sulu, a bunda arni amai war fuŋ-n'Alaw, a sa tese sin Alaw, asakal par, a ɗukla peŋ a siŋɗi wiiɗi ɗai zi hitri, ɗai zi hitri e siŋɗi wiiɗi firiɗi ɗai. 20Nagai paŋ e simi, e vi lai, e mili n'a hina warni dologo, a va dologo doogo pi sulu. 21Nagai n'e simi e ɗa maɵagai dubu ɵim, falakai gaiɗi aliyagoi e piɵiɗi kai.
Yesu a hala midini yem-ra n'abai
Mark. 6.45-52; Yoh. 6.15-21
22Tizaw tar, a saiya piɗi ɗaini zi hitri buri e niyi warni hulum, e hili wuzani anene kata. Won hlai ni a tika pin firiɗi ɗai buri e hili. 23Won hlai n'a tikɗi piɗi ɗai edi li, a hala amai midiɗi huwuŋ, edi war baŋa aŋ siiwa. Won hlai na futi-koskoi te za li, ni a hina kiini woni. 24Hulum n'abai a ɵiɓa edi arbani yem-ra-n'abai ɗa ka, maiyaw a ɵiɓa sini gdaŋ gara, buri ɓa smer a pasi arɗi tiɓ. 25Amma gorof n'abai sek ɗa, Yesu halasi siɗi, a hala amai midini yem blaŋ. 26Won hlai na ɗai zi hitri e tiliŋ a hala midini yem, hunai te yimiɗi, e miɗi, hanɗa a ksalai, e ɗûûli gaiɗi hunai. 27Amma Yesu a miɗiɗi seŋ war hlai ni tar, a muɗa, ki hûni kai, mu ta, yimiti agulki. 28Teena Peter a waya seŋ a muɗa, Epiɗ-ɗai, na ɓa ku tuku mal, hinaŋa buri mu halaɗi suku midini yem lai. 29A miɗini: halasi. Peter a niyasi edi warni hulum par, a ɵa amai midini yem buri a hala sin Yesu sek. 30Amma won hlai n'a tala smer na gdaŋ a huna, a tika pini aŋ buɗuha azumai a ɗuula a muɗa: Epiɗ-ɗai, koraŋa. 31Tizaw tar, Yesu a wa tini edi, a yimaŋ a miɗini: tuku na gaini yimi n'agwi, ku giriŋa buri ma ɗa? 32Won hlai n'e niyi warni hulum, smer a tika azumai. 33Amma nagai n'e ɗa warni hulum e hilisi e hûrgû azumai wuzani aŋ firiyiŋ e miɗi, jre, tuku k'Ahini Alaw.
Yesu a zuuliɗi ɗai zi veglek war Genezaret
Mark. 6.55-56; tw. Yoh. 6.22-25
34Won hlai n'e gi anene kata e hilisi midini afti na Genezaret. 35Won hlai na ɗai na woni e siɗiŋ, e ɵini ɵeŋ midini afti na ɵimaɗi paŋ, e kiɗisi ɗai zi veglek paŋ sini. 36Nagai e siiwiŋ buri a siɗi futi aŋ titimi koo ɓa a merfeŋni sapani tekeɗeɗi, nagai paŋ n'e titimiŋ, e bindi pɗem.
Currently Selected:
Matewus 14: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
