Matewus 10
10
Yesu a viriɗi ɗai zi hitri na doogo pi sulu
Mark. 3.16-19; Luk. 6.14-16; Sdaɗ. Apost. 1.13
1Asakal par a yikiɗi ɗaini zi hitri na doogo pi sulu sini, a siɗi spak aŋ birga ksalai na haharai edi, aŋ zuula pinzibani veglek paŋ gaini huruf paŋ lai. 2Yikiɗi apostelai na doogo pi sulu a na maini nɵa: n'avut ɗa a Simun na zinani ɓa: Peter, gaini Andreya na tawalni, Yakob n'ahini Sebedewus gaini Yohana na tawalni. 3Filip gaini Bartelemawus, Tomas gaini Matewus ɗif zi tiri lambu, Yakob n'ahini Alfewus gaini Tadewus, 4Simun na Kanane gaini Yudas Iskariyot, ni n'a saŋ edi.
Sda zi ɵeŋ na wiiɗi na doogo pi sulu
Mark. 6.7-13; Luk. 9.2-5; 10.3-12
5Hanɗa e ɗi na doogo pi sulu na Yesu a ɵiniɗi edi, a gidiɗi, maini nɵa: ki hili warɗi futi na wiiɗi ɗai n'e ɗi pinzibaɗi Yudiyakai kai ɗa kai, ki niyi aha warni fuŋ n'abai na wiiɗi Samariyakai kaalai. 6A pɗem ɓa ki hili sini adumai na war pinzibaɗi Izrayel n'a ba edi. 7Won hlai na ki ɗa hili ɗa, ki ɓiki labar hanɗa edi ki miɗi: paini fuŋ-n'Alaw te ŋasi gobi. 8Ki zûûliɗi zi veglek, ki ɵiyiɗi ɗai zi mri amai, ki bindiɗi zi dugomai hilu, ki birgi ksalai edi lai. Tiki ki niviŋ kadai, aga ki siŋ kadai lai. 9Ki mili or zaw arzaŋ, zaw sulai zi kiya warni guɓaki kai, 10sak burini morkoiki kai, gumazi sulu kai, harabak kai, amaraŋa kai, buri ɗif zi sɗa a kiɗa aŋ nava simini. 11War fuŋ n'abai zaw n'agwi paŋ na ki niyi li warni ɗa ki yimi labar pɗem, na ɓa ɗif n'a kiɗa a yimiki sini a na ɗa, ki simni ahani haa sini hiliki na warni par ta. 12Ki niyifu aha war dalam paŋ ɗa ki ɵiɓi wuti. 13Na ɓa dalam hanɗa a kiɗa aŋ nava ɵeɗ hanɗa, ɵeɗ na wiiki aga a halasi miɗini, amma na ɓa, a kiɗa aŋ nava kai ɗa, ɵeɗ na wiiki a wayasi siki lai. 14Won hlai n'e yimiki siɗi kai, na e ɵini seŋki kaalai ɗa, ki hili edi warni dalam hanɗa par, zaw war fuŋ n'abai hanɗa par ɗa ki ɵiɓi alogodo n'eziki edi. 15Jre, mu miɗiki war mefeŋ zi sariya, afti na Sodoma gaini na Gomora aga a siɗa gir maini fuŋ n'abai hanɗa nɵa kai.
Gir n'aga a halasi
Mark. 13.9-13; Luk. 12.11-12; 21.12-19
16Ta mu ɵiniki maini adumai n'arbani belemke nɵa, buri nɵa ki bindi yalakai maini wala meefeŋ nɵa, hilu maini dere nɵa lai. 17Ki giɗimi siki pɗem buriɗi ɗai, buri aga e siki edi miɗi sariya, aga e ɵûɗi siki edi gaini daɓala warni sinagogne na wiiɗi. 18Aga e kiki wuzaɗi Lawanai gaiɗi paakai buriya ta, aga a za aŋ zaida buriɗi gaiɗi pinziba na Yudiyakai kai ɗa lai. 19Amma won hlai n'e siki li edi ɗa, aga ki giriŋi burini miɗi n'aga ki miɗiŋ ɗa kai, buri seŋ n'aga ki miɗiŋ ɗa kaalai. Seŋ n'aga ki miɗiŋ ɗa aga a sa siki war hlai ni tizaw, 20buri aga ki miɗi ki ɗi tiki kai, amma seze na wiini Epiki n'a na warki ɗa aga a muɗa ɗa a ni. 21Tawal aga a sa tawalni edi mini mri, api aga a sa ahini edi lai, ali aga e fiki amai siɗi tamaiɗi, e siɗi mini mri, 22ɗai paŋ aga e bili gaw siki burini yikiŋa, amma ni n'a siika pini yimi haa hlai zi dibi, ni aga a kora.
23Na ɓa e ɗa ziki gir war fuŋ n'abai ktai ɗa, ki liwi warni na zamai, jre mu miɗiki aga ki gûni fuŋ n'abakai na Izrayel ɗa wuzani gizini ahini ɗif paŋ kai.
Nagai n'e yiki siɗi ɓa e ɗi na wiini Yesu
Luk. 9.26; 12.2-9
24Ɗif zi hitri a suwa api n'a hitraŋ ɗa kai, bege a suwa Epin-gezani kaalai. 25Ɗif zi hitri ɗa, a bunda maini api n'a hitraŋ ɗa ɵa, bege maini Epin-gezani ɵa lai. Na ɓa e yiki Epini dalam ɗa ɓa: Beelzebul, aga e yikiɗi nagai n'aha war dalamni ɵa azi gama ɗa?
Ni n'aga e hûniŋ
Luk. 12.2-7; Mark. 8.38
26Buri nɵa ki hûniɗi kai, buri wala na gaini ŋûyi cok n'aga a siŋka edi kai aŋ kai, wala n'a za war kuɗuhai n'aga a sɗa edi kai aŋ kaalai. 27Buri wala na mu miɗiŋki war gegeŋ ɗa, ki miɗiŋ edi war gaglai, wala n'a muɗa ɵimaki war helek ɗa, ki miɗiŋ edi amai midini daba zi mili. 28Ki hûniɗi nagai n'e fiɗi si, amma e kiɗi aŋ fiɗi suŋfaɗi agul ɗa kai ɗa kai, amma ki hûni n'a siɗa aŋ ba suŋfaɗi agul gaini si paŋ arni afu n'a vada kai. 29Zezek sulu a suma karanga ktai kai ɗi? Paŋktai, ktai n'arbani n'a kɵa azumai midini afti aŋ kai, sai pini dirini Epiki. 30Amma tiki ɗa, koo ayir na midiki kaw aŋ gaini pɵi ta. 31Buri nɵa ki hûni kai, tiki ki sûwi zezek viya. 32Buri nɵa, asiya ɗi paŋ n'a muɗa edi wuzani arɗi ɗai ɓa: ni a wiya, Ta lai, aga mu muɗa edi miɗini wuzani Apa na war fuŋ-n'Alaw lai. 33Amma na ɓa ɗif a ɓuɓura mini buriya wuzani arɗi ɗai, Ta aga mu ɓuɓura ma burini wuzani Apa na war fuŋ-n'Alaw.
Ɵeɗ kai, amma kaɵkar
Luk. 12.46-53; 14.26-27
34Ki hiini kai ɓa mu halasi aŋ kasi ɵeɗ midiɗi yai ɗi ɗa, a na ɵa kai, mu kasi ɗa a ɵeɗ kai, amma kaɵkar. 35Buri mu kasi ɗa a ɓraw arbani ɗif gaini epini, arbaɗi ahiyagwi gaiɗi emiɗi, arbaɗi munini ahi gaiɗi suwulɗi. 36Gawni ɗif paŋ e ɗi ɗai n'ahani dama. 37Ɗif n'a dara epini zaw emini a suwaŋa ta ɗa a kiɗa buriya kai, ni n'a dara ahini na wus zaw na muni a suwaŋa ta ɗa a kiɗa buriya kaalai. 38Ni n'a tika dagrani amai aŋ tapa pa kai, a kiɗa buriya kai. 39Ni n'a godo suŋfani li ɗa aga a baŋ, ni n'a ba suŋfani li buriya ɗa aga a navaŋ.
Na a yimiki li sini ɗa, a yimaŋa mu ta
Mark. 9.37, 41; Luk. 9.48; 10.16; Yoh. 13.20
40Ni n'a yimiki li sini ɗa a yimaŋa mu ta, ni n'a yimaŋa ta li sini ɗa a yima na ɗa a ni n'a ɵinaŋasi ɗa. 41Ni n'a yima ɗif na mini Alaw sini, buri ɓa a ɗif na mini Alaw, aga a nava vrak na wiini ɗif na mini Alaw. Ni n'a yima ɗif na jre ɗikat sini buri ɓa a ɗif na jre ɗikat ɗa, aga a nava vrak na wiini ɗif na jre ɗikat. 42Asiya ɗi paŋ n'a sa yem zi ci na ɗarak wiini ktai n'arbaɗi n'agogoi hanɗa buri ɓa a ɗif zi hitri ɗa, jre mu miɗiki vrakni aga a ba edi kai zaŋ.
Currently Selected:
Matewus 10: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
