Matewus 9
9
Yesu a zuula ɗif na galni gaini mri su
Mark. 2.1-12; Luk. 5.17-26
1A niya warni hulum a halasi anene kata, a halasi warni fuŋ n'abai. 2Nɵa, e kinisi ɗif na galni gaini mri su, gaini fini miɗini walani zi feŋ waŋ. Won hlai na Yesu a tala yimiɗi a muɗa sini ni na gaini mri ɓa: pa arku ahiya, tuwurku mu hunuŋku li. 3Zamai arbaɗi ɗaini zi ɗû wazagai e miɗi gaini warɗi ɓa: ɗif hanɗa a miisa na ɗa a Alaw. 4Hlai na Yesu a siɗa hiiniɗi a muɗa: Ki hiini wala na meefeŋ nɵa warɗi agulki buri maɗa? 5N'a na gop ɗa a na wata ɗa aŋ muɗa: Tuwurku a hunuku li ɗa, zaw aŋ muɗa faka amai hala ɗi? 6Amma kapai ki siɗi ɓa ahini ɗif spakni a na midiɗi yai buri a hina tuwur. Nɵa a muɗa sini ɗif na galni gaini mri su: faka amai tika walaku zi feŋ, hala aha. 7Ɗif a faka amai a hala aha. 8Won hlai na firiɗi ɗai e tili hanɗa hunai n'abai te yimiɗi, e kûli Alaw n'a sa spak na maini hanɗa nɵa wiiɗi ɗai murɗakai.
Yesu a yika Matewus
Mark. 2.13-17; Luk. 5.27-32
9Won hlai na Yesu a hala wuzani sek agwi, a tala ɗif ktai yikini Matewus azumai mini bro zi tar dam. A miɗini: tapasi pa, Matewus a faka amai, a tapa pini lai. 10Nɵa, won hlai na Yesu a na suma aha warni dalamni Matewus ɗa, ɗai zi tiri kosko viya gaiɗi ɗai na tuwarai lai, e hilisi e simni azumai gaini Yesu gaiɗi ɗaini zi hitri. 11Won hlai n'e tili hanɗa, Farisekai e miɗiɗi wiiɗi ɗaini zi hitri: Api zi hitri na wiiki, a suma gaiɗi ɗai zi tiri kosko gaiɗi ɗai na tuwarai lai buri maɗa? 12Amma hlai na Yesu a ɵina hanɗa a muɗa: Ɗai n'e ɗa nga e piyi doktor kai, sai ɗai zi veglek. 13Hili, ki hitri aŋ siɗi ezini seŋ n'a muɗa ɓa: mu dara ɗa a yum, mu dara ɓaka kai. Buri mu halasi aŋ yikiɗi na jre ɗikat kai, amma na tuwarai.
Zilbi na miɗini tikini sai
Mark. 2.18-22; Luk. 5.33-39
14Won hlai ni ɗai zi hitri na wiini Yohana e hilisi sini e zilbiŋ e miɗi: tiyi gaiɗi Farisekai mi tiki sai kûreɗ-kûreɗ, amma ɗai zi hitri na wiiku e tiki sai kai ɗa buri maɗa? 15Yesu a miɗiɗi: Marmakaini Epiɗi drai e kiɗi aŋ kwimi won hlai n'Epiɗi drai aŋ gaiɗi ɗi? Amma mefeŋ aga a gizi, won hlai n'Epiɗi drai aga a yima edi arbaɗi par, won hlai ni ɗa aga e tiki sai. 16Ɗif n'a ziga sapa n'agwi na hehe arni sapa na wel aŋ kai, buri sapa n'agwi na hehe a yima sapa na wel ɗa edi pini, ɓisini a bunda a suwa. 17E yûri vin na hehe warni kenekene na wel kaalai, ɵa kai ɗa, kenekene a naɓa, vin ɗa a ma edi, kenekene ɗa a ɓulka edi lai. Vin na hehe ɗa, e yûriŋ warni kenekene na hehe lai, nɵa gaini sulini paŋ a ɓulka kai.
Ahiyagwi na Yesu a ɵiyiti amai war mri par gaiɗi muni na te tetema sapani Yesu
Mark. 5.21-43; Luk. 8.40-56
18Won hlai n'a na miɗiɗi seŋ hanɗa, paini sinagogne ktai a halasi a hurga azumai wuzani a muɗa: Ahiya te mrasi tiyana tiyana, amma ku tikiti tuku midiɗi kapai te sumna karɗi. 19Yesu a faka amai a tapa pini gaiɗi ɗaini zi hitri. 20Muni ktai na fel a na ka gaiɗi a za buza doogo pi sulu, te halasi sini duɓani par te tetema mini sapani. 21Buri te muɗa gaini warɗi ɓa: na ɓa mu tika na ta sini mini sapani ta ɗa, aga mu zuula. 22Yesu a bunda arni duɓani, a tiliti a muɗa: Ahiyagwi yimiti agulku, yimiku a kuruku li. Muni te zuula war hlai ni tizaw tar. 23Won hlai na Yesu a cosi aha war dalamni paini sinagogne ɗa, won hlai n'a tiliɗi ɗai n'e yibi faana gaini firiɗi ɗai n'e ɗa sûûri ɗa lai; 24A miɗiɗi: Niyi anene, buri ahiyagwi te mra kai, te kala ɗa a weseŋ, nagai e riyi pini gara. 25Won hlai n'a birgiɗisi firiɗi ɗai edi li, a yimiti ahiyagwi tini, ahiyagwi te faka amai. 26Labar hanɗa a wa edi midini afti ni paŋ.
Arɗi ɗai na malvanai sulu a mala edi
Mat. 20.29-34
27Won hlai na Yesu a na hala wuzani sek, ɗai na malvanai sulu e tiki futi pini, e ɗûûli e miɗi: hiina haw buriyi, tuku ahini David. 28Won hlai n'a niya aha warni dalam ya, na malvanai e hilisi sini. Yesu a miɗiɗi: ki yimi ɓa mu kiɗa mu za hanɗa ya ɗi? E wiyini seŋ e miɗi: Nkam, Epiɗ-ɗai. 29Nɵa a tetema arɗi a muɗa: A za siki pini yimi na wiiki. 30Arɗi a mala edi, Yesu a gidiɗi gdaŋ a muɗa: Ki zi hangal kapai ɗif a sɗa hanɗa kai. 31Amma e niyi anene gaini niyi kai, e tiki piɗi aŋ miɗi labar edi miɗini, midini afti hanɗa paŋ.
Ɗif na numul na ksalai aŋ miɗini
Luk. 11.14-15
32Won hlai n'e niyisi anene aŋ hili, e kinisi ɗif na numul na ksalai aŋ miɗini. 33Hlai na ksalai a birgasi li edi, ɗif na numul a tika pini aŋ muɗa seŋ. Firiɗi ɗai e bindi hiyak e miɗi: ɗif a tala ka wala na maini hanɗa ɵa a za ka warɗi Izrayel duk kai. 34Amma Farisekai e miɗi: A birga ksalai edi na ɗa war spakni paiɗi ksalai.
Yesu a hiina haw midiɗi ɗai
Mark. 6.6, 34; Luk. 10.2
35Yesu a paya arbani fuŋ n'abakai gaini fuŋ n'agogoi a hitriɗi ɗai warni sinagogneɗi, a ɓaka labar zi firiyi na midiɗi pai, a zuula pinzibani veglek paŋ, gaini huruf paŋ lai. 36Hlai n'a tala firiɗi ɗai, hiinini haw a yimaŋ buriɗi, buri e ɗi fu gaini kayai, gdaŋ warɗi kai maini adumai na ɗif zi giɗimi aŋ kai nɵa. 37A miɗiɗi wiiɗi ɗaini zi hitri: Hiɗi a na abai amma ɗai zi sɗa e ɗa agwi. 38Buri nɵa ki siiwi Epin gezani hiɗi buri a ɵinasi ɗai zi sɗa war hiɗini.
Currently Selected:
Matewus 9: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
