Lukas 12
12
Nagai n'e yiki siɗi ɓa e ɗi wiini Yesu
1Won hlai ni ɗa, ɗai dubu dubu e firi haa e ɗiyi maa miɗini eziɗi marɗi. Yesu a tika pini aŋ muɗa siɗi ɗaini zi hitri: Abai paŋ ɗa ki zi hangal burini is na wiiɗi Farisekai, a dara a muɗa rhai na wiiɗi Farisekai.
Mat. 10.26-33
2Wala zi ŋoyai n'aga a siŋka edi kai aŋ kai, wala n'a za war kuɗuhai n'aga a siɗa edi kai aŋ kaalai. 3Buri nɵa, na ki miɗiŋ war gegeŋ paŋ aga a ɵina edi war gaglai. Na ki miɗiŋ war helek amlai warni dalam amlai ɗa, aga a wa edi amai midini daba zi mili.
4Mu midiki tiki marmakaiya, ki hûniɗi nagai n'e fiɗi si edi, na asakal par e kiɗi e zi wala ktai sini kir kai ɗa kai. 5Mu dara mu siŋkiki Ni n'aga ki hûniŋ ɗa, ki hûni Ni na spakni a na buri a fuɗa si edi lai, asakal par a ɵiŋkaŋ warɗi avai z'afu lai ɗa, nkam mu miɗiki, ki hûni ɗa a Ni ɗa. 6Zezek ɵim a suma sulai sulu kai ɗi, amma ktai n'arbani n'Alaw miɗini a wula gaini aŋ kai. 7Ayir na midiki maa aŋ gaini piɵi tini ta, nɵa ki hûni kai, buri tiki ki nifi a suwa zezek na viya.
8Mu midiki: Asiya ɗi paŋ n'a sɗa sini ba a wiya arɗi ɗai ɗa, Ta n'Ahini ɗif aga mu sɗaŋ ba a na wiya wuzaɗi ɗai zi ɵeŋ na wiini Alaw lai. 9Amma ni n'aga a ɓuɓura mini buriya arɗi ɗai, Ta lai aga mu ɓuɓura ma burini wuzaɗi ɗai zi ɵeŋ na war fuŋ-n'Alaw.
10Asiya ɗi paŋ n'a muɗa seŋ na meefeŋ sini Ahini ɗif, Alaw aga a hinini meefeŋni ɗa, amma ni n'a tirka Seze-sɗik ɗa, Alaw aga a hinini meefeŋni kai.
11Won hlai n'aga e kiki wuzani sinagogne, wuzaɗi paakai gaiɗi n'abakai ɗa, ki giriŋi miɗini n'aga ki wiyiŋ gaini n'aga ki miɗiŋ ɗa kai aŋ pli siki edi ɗa kai, 12buri Seze-sɗik aga a hitriki warni hlai ni dama burini wala n'aga ki miɗiŋ.
Seŋ zi siŋka maini midini ɗif zi farai na tatala
13Ɗif ktai arbani firi par a miɗini: Api zi hitri, miɗini wiini tawala buri a ɓurwa bulum ɗa gaya. 14A wiyini seŋ a muɗa: Ɗif n'a tikaŋa arbaki aŋ ɗif zi ɗûklûti sariya, zaw aŋ ɗif zi ɓûrwi wazagaiki ɗa asiya ɗa? 15Asakal par a miɗiɗi: Ki zi hangal, ki giɗimi siki burini suuna na pini wazagai, buri ɓa suŋfani ɗif a za mogo ɗa burini wazagaini na viya kai, koo ɓa faraini viya tekeɗeɗi. 16A miɗiɗi seŋ zi siŋka maini ktai maini nɵa: Ɗif zi farai ktai vowaini a za gaini futini gara, 17a hiina gaini warni a muɗa: Kapai mu za maɵa buri hlai na mu mula seyemŋa woni aŋ kai? 18A muɗa: Yawwa, aga mu ho vrekaiŋa na walakai ɗa azumai, mu rga zamai n'abakai a suwa kapai mu ɵapa algama na wiya gaini wazagaiŋa paŋ woni lai. 19Aga mu muɗa sini suŋfaɗi-agula ɓa: Suŋfaɗi-agula, wazagaiku viya, a tapa li amai, a kiɗa buri buza viya, faana wiiku waŋ, ku suma gaini simi, ku ca lai, ku ɵa dawaŋ muku lai. 20Amma Alaw a miɗini: Tuku ɗif na tatala, duvuk ɗa haa, suŋfaku aga a tika edi, wazagai na ku tapaŋ amai ɗa aga ku hinaŋ wiini asiya ɗa? 21Ni n'a tapa godai amai burini sini dama, amma a zi farai burini Alaw kai ɗa aga a za sini maini nɵa.
Hiini zi giriŋi
Mat. 6.25-34
22Asakal par a miɗiɗi wiiɗi ɗaini zi hitri: Mu midiki nɵa buri ɓa aga ki giriŋi burini suŋfaki kai, burini wala n'aga ki simiŋ ɗa kai, burini siki ɗa kai, burini sapa n'aga ki wiŋ siki ɗa kaalai. 23Buri ɓa suŋfa a suwa simi, si a suwa sapa ɗa lai. 24Tili sini zeleke, a suuɗa kai, a haɗa kaalai, magaziŋni n'a mula wazagaini warni aŋ kai, vreni aŋ kaalai, amma Alaw a sini simi, nɵa tiki ɗa ki sûwi wala zi ɗufli, ki siiwiŋ azi viya. 25Arbaki ɗa, n'a kiɗa a riya mogoni suŋfani edi agwi gaini giriŋini ɗa asiya ɗa? 26Na ɓa wala n'agwi hanɗa ki kiɗi miɗini kai ɗa, ki giriŋi burini wazagai na zamai ɗa buri mada? 27Tili sini miye n'edi buza, a wula ɗa a za sda kaalai, a duɓura aduzi kaalai; Salmun warɗi abaini tekeɗeɗi a wa sapa sini maini ktai arbaɗi nɵa kai. 28Na ɓa girna Alaw a gana evek n'a na edi warni basga maini hanɗa ɵa, paŋ ktai dawai aga a ɵiŋka arni afu ɗa, aga a za hanɗa siki tiki a suwa hanɗa kai ɗi? Tiki na gaini yimi n'agwi! 29Tiki ɗa, ki piyi wala n'aga ki simiŋ ɗa kai, n'aga ki ciŋ ɗa kaalai, ki hiwiyi siki kai 30buri wazagai hanɗa paŋ, ɗai n'e siɗi Alaw kai na warɗi yai hanɗa e piyiŋ wuzaɗi sek sek, amma tiki Epiki a sɗa ɓa jaaki aŋ sini wazagai hanɗa lai. 31Ki piyiti te pai n'Alaw ɗa, wazagai hanɗa paŋ ɗa aga a sa siki aŋ beste. 32Ki hûni kai fara n'agwi, buri a tala arni Epiki pɗem aŋ sitiki pai.
Godai n'amai warni fuŋ-n'Alaw
Mat. 6.19-21
33Ki wûri wazagaiki edi, ki si faraini edi aŋ like wiiɗi na murgakai, ki zizini guɓa n'a tuura kai, ki tiki godai n'a vada edi kaalai, amai warni fuŋ-n'Alaw mihill a kiɗa woni kai, bumi a lumaŋ kaalai. 34Hlai na godaiku t'aŋ woni ɗa agulku t'aŋ woni lai.
Seŋ zi siŋka maini midiɗi ɗai zi sɗa n'e simni karɗi
35Ki simni gaini zizini, wuzaki gaini rgi, lampaki gaini afu warni ta ta lai. 36Tiki lai, ki simni maiɗi ɗai n'e ɗa biyi Epin-gezaɗi n'aŋsi miɗi fet na wiini tiki ɗa nɵa, kapai hlai n'a cosi, a ɵiɓa li mini hlai ɗa, e miliŋni edi tar. 37Ɵeɗ midiɗi ɗai zi sɗa n'Epin-gezaɗi a niviɗisi karɗi won hlai n'a wayasi. Jre, mu miɗiki Epin-gezaɗi aga a wa sapani zi sɗa sini, a miliɗi azumai aŋ simi, ni dama aga a kiɗisi simii ɗa lai. 38Koo ɓa a wayasi duvuk n'arba, koo ɓa gorof n'abai sek, na ɓa a niviɗisi li maini hanɗa ɵa ɗa, ɵeɗ midiɗi.
Mat. 24.43-51
39Ki ɵini pɗem, na ɓa epini dalam a sɗa fu ler na ɗif zi mihill a halasi woni ɗa, aga a sumna karni, a hinaŋ a co dalamni kai. 40Tiki nɵa lai, ki simni gaini zizini, buri Ahini ɗif aga a wayasi warni ler na ki hiiniŋ kai.
Ɗif zi sɗa na jre kai
Mat. 24.45-51
41Peter a miɗini: Epiɗ-ɗai, seŋ zi siŋka maini hanɗa, ku muɗaŋ na ɗa buriyi tiyi taaha, zaw buriɗi ɗai paŋ ɗi? 42Epiɗ-ɗai a muɗa: Ɗif zi giɗimi wazagai, zi yel n'epin-gezani a pɵa miɗini, n'a kiɗa a tikaŋ aŋ abai midiɗi ɗaini zi sɗa kapai a siɗi simiɗi war hlaini ɗa asiya ɗa? 43Ɵeɗ midini ɗif zi sɗa na epin-gezani won hlai n'a wayasi ɗa a navaŋsi aŋ za maini nɵa. 44Jre, mu miɗiki Aga a tikaŋ amai midini wazagaini paŋ. 45Amma na ɓa ɗif zi sɗa hanɗa, a muɗa warɗi agulni ɓa: Epin-geza a zi wiyisi tiyina kai, a tika pini a ɵiɓiɗi ɗai zi sɗa na maɵagai gaiɗi na falakai lai, a tika pini a suma, a ca a siina lai ɗa, 46Epin-gezani ɗif zi sɗa hanɗa aga a wayasi warni mefeŋ n'a hiinaŋ kai, war ler n'a sɗaŋ kaalai. Aga a zini gir abai, a sini buri na wiini gaiɗi nagai n'e ɵini mini Alaw kai ɗa. 47Ɗif zi sɗa na sɗa dirini epin-gezani ya, amma a zizina wala ktai kai, a za wala n'a kaata pini diri hanɗa kaalai ɗa, epin-gezani aga a ɵeɓaŋ viya. 48Amma ni n'a sɗa dirini kai, a za wala n'a kiɗa a nava ɵiɓi pini ɗa, ni epin-gezani aga a ɵiɓaŋ viya kai. Ni n'a sa tini viya ɗa, aga a zilba tini viya lai, ni na sɗa a sa li tini viya ɗa, aga a zilba tini a suwa pra.
Ɓraw a za arbaɗi ɗai burini Yesu
49Mu kasi midiɗi yai ɗa a afu, mu firiya ɓa a yima amai tiyana, 50baptisme ktai aŋ mada n'aga mu navaŋ, aŋ mada guma gara. A juva ɓa a za wiini ta.
Mat. 10.34-36
51Ki hiini ɓa, mu halasi ɗa aŋ kasi ɵeɗ midiɗi yai ɗi? Zaw kai, mu miɗiki, mu kasi ɗa a ɓraw. 52Tiyana par, pakatai na ɗai warɗi ɵim ɗa, aga te ɓurwa, ɗai hu war gal ktai, sulu war gal ktai lai. 53Api aga a faka amai sini ahi, ahini sini api lai, ami siɗi ahiɗi na muni lai, ahi na muni siɗi ami, suwul siɗi munini ahi, munini ahi siɗi suwulɗi.
Mat. 16.1-4; Mark. 8.11-13
54A miɗiɗi wiiɗi ɗai pra maini nɵa: Hlai na ki tili li ɗugul a rga amai piɗi futi na koskoi par ɗa, tizaw ki miɗi ɓa: Faŋ aga a ɵa, a za ɵa lai, 55hlai na ki tili li smer a vuvuwasi war gal n'amai par ɗa, ki miɗi ɓa: Hlai ɗa aga a za afu, a za ɵa lai. 56Tiki zi rhai, ki siɗi aŋ miɗi edi midini wazagai na ki ɗa tiliŋ midiɗi yai gaini n'arbani hlai n'amai, amma ki siɗi aŋ miɗi edi midini hlai na girna kai ɗa buri mada?
Tûyi na gaini gawku
Mat. 5.25-26
57Tiki gaini midiki dama lai ki sɗi aŋ hiini kai buri wala n'a na woɗi futini kai ɗa buri mada? 58Won hlai na ku na hala gaini gawku sini Komanda ɗa, ku paya aŋ toya gaini warɗi futi par, kapai a kuku wuzani ɗif n'a ɗûklûti sariya ɗa kai, kapai ɗif n'a ɗûklûti sariya ɗa a suku tini ɗif zi giɗimiti daŋgai ɗa kai, kapai zi giɗimiti daŋgai a ɵuku warɗi daŋgai kaalai. 59Mu muɗuku: Aga ku niya edi warɗi par kai, haa ku vurga tumuŋ n'aŋ muduku paŋ, wala ktai maa a hina kai.
Currently Selected:
Lukas 12: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
