Yohana 6
6
Yesu a viɗi ɗai na maɵagai dubu ɵim
Mat. 14.13-21; Mark. 6.30-44; Luk. 9.10-17
1Asakal hanɗa Yesu a bunda anene kata wulani yem-ra n'abai na Galeliya, yem-ra n'abai na Tiberiyade. 2Vok n'abai a tapa pini buri e tili wazagai zi siŋki n'a zaŋ siɗi ɗai zi veglek. 3Yesu a niya amai midiɗi huwuŋ, woni a sumna azumai gaiɗi ɗaini zi hitri. 4Won hlai ni ɗa, fet na wiiɗi Paska na wiiɗi Yudiyakai te ŋasi gobi. 5Yesu a yima arni amai, a tala firi n'abai e ɗa hilisi sini, a miɗini wiini Filip: Aga mu wurumusi peŋ na kapai ɗai hanɗa e simi paŋ ɗa wata par ɗa? 6A muɗa hanɗa buri a tetemaŋ, buri a sɗa ya buri ni a sɗa wala n'aga a zaŋ ɗa ya. 7Filip a wiyini seŋ: Koo ɓa peŋ sulai miya sulu tekeɗeɗi a kiɗa a ɓurwa miɗi paŋ kai. 8Ktai arbaɗi ɗaini zi hitri, Andre na tawalni Simun Peter a miɗini: 9Ahiyagwi ktai aŋ won na na peŋ na wiini orge aŋ tini ɵim, hilif sulu lai. Hanɗa a kiɗa ɗa a maɗa buriɗi ɗai na e ɗiŋ ɗa? 10Yesu a muɗa: Miliɗi ɗai hanɗa azumai, hlai ni ɗa evek a na fu woni viya, nɵa e simni azumai, pɵaɗi a za gobi maɵagai dubu ɵim. 11Yesu a mula peŋ ɗa, a sa tese, a ɓurwaŋ wiiɗi nagai n'e ɗa taaha ɗa, a za gaini hilif ɗa nɵa lai, e nivi paŋ maini n'e diri nɵa. 12Won hlai n'e vi li paŋ, a miɗiɗi wiiɗi ɗaini zi hitri: Pini n'a hina ki tipiŋ amai kapai wala a ba kai. 13Nɵa e tipiŋ amai, e vi dologo doogo pi sulu, gaini kolkoɗaini peŋ na wiini orge na ɵim n'a hinasi piɗi ɗai n'e simi ɗa.
14Won hlai n'e tili siŋki n'a zaŋ ɗa, ɗai e miɗi: Ni ɗa, a ɗif na mini Alaw n'aga a halasi warɗi yai ɗa jre jre.
15Won hlai na Yesu a sɗa ɓa aga e hilisi e yimiŋ buri e tikiŋ aŋ pai ɗa, a yima sini edi kiini amai midiɗi huwuŋ pra.
Yesu a hala amai midini yem-ra n'abai
Mat. 14.22-33; Mark. 6.45-52
16Hlai na futi te za li koskoi ɗa, ɗaini zi hitri e hili agoɗom wulani yem-ra n'abai. 17E niyi amai war hulum n'abai buri e hili a Kapernahum, anene kata wulani yem-ra n'abai ɗa par, hlai a za gegeŋ ta, Yesu a cosi siɗi kai hai. 18Smer na gdaŋ a vuvuwa, mayaw a tika pini a za. 19Asakal na ɗai zi hitri e fili haa a za kilometir ɵim zaw ɵaara ɗi ɗa, e tili ɗa Yesu a na midini yem blaŋ, a n'a halasi sini hulum n'abai ɗa sek, hunai a yimiɗi. 20Amma a miɗiɗi: Mu ta, ki hûni kai. 21Nɵa e firiyi e tikiŋ amai warni hulum n'abai ɗa, yafai kai, hulum a yima amai war hlai n'e firiyi e hili woni ɗa.
Yesu, a peŋ n'amai par
Mat. 14.34-36; Mark. 6.53-56
22Dawaini, faraɗi ɗai n'e hinisi anene kata ɗa wulani yem-ra n'abai ɗa par ɗa, midiɗi a kɵa ɓa hulum n'abai ɗa a na ka ɗa ktai, Yesu a niya amai warni gaiɗi ɗaini zi hitri ɗa kai, ɗaini zi hitri ɗa e hili kiiɗi. 23Amma hulamai zamai n'abakai a halasi a Tiberiyade par gobi gaini hlai n'e limi peŋ woni, asakal n'EPIƊ-ƊAI a sa tese ya. 24Won hlai na firiɗi ɗai e tili ɓa Yesu lai, ɗaini zi hitri lai, e ɗi kai ɗa, nagai dama e niyi warni hulamai n'abakai hanɗa, e hilisi a Kapernahum aŋ piyi Yesu. 25E niviŋsi anene kata wulani yem-ra ɗa, e miɗini: Rabbi, ku cosi won na kas wa? 26Yesu a waya seŋ a miɗiɗi: Jre, jre, mu miɗiki Tiki, ki piyiŋa na ɗa buri ki tili wazagai zi siŋki ɗa kai, amma buri ki limi peŋ, ki vi lai. 27Ki zi sɗa burini simi n'a vada edi ɗa kai, amma burini n'a na haa sini suŋfa n'a vada kai. Simi na Ahini ɗif aga a siŋki buri ɓa A ni n'Api Alaw a tika tanpoŋni miɗini. 28E miɗini: Aga mi zi ɗa a maɗa, kapai mi zi sɗa na wiini Alaw ɗa? 29Yesu a waya seŋ a miɗiɗi: Sdani Alaw a na ɗa ɓa, ki yimi warni Ni n'a ɵinaŋsi.
30Nɵa, e miɗini: Wala zi siŋki n'aga ku za ɗa a na wata ɗa? Na kapai mi tiliŋ, kapai mi yimi puku ɗa a na wata ɗa? Aga ku za ɗa, a sɗa maɗa? 31Tamaiyi e simi manna edi war basga na kaɗataŋ, maini n'aŋ gaini ɗû ɵa ɗa, a siɗi peŋ n'amai par aŋ simi. 32Yesu a miɗiɗi: Jre, jre, mu miɗiki, a siki peŋ n'amai par ɗa a Musus kai, a siki peŋ n'amai par na jre ɗa a Apa. 33Buri ɓa peŋ n'Alaw a saŋ ɗa, a n'a halasi amai par aŋ sa suŋfa wiiɗi ɗai na warɗi yai ɗa. 34E miɗini: Epiɗ-ɗai, siyi peŋ ni ɗa kûreɗ-kûreɗ. 35Yesu a miɗiɗi: Ta mu peŋ n'a sa suŋfa, ni n'a halasi sa, wiyamai aga te zaŋ kir kai, ni n'a yima wara sai aga te zaŋ kir kaalai.
36Amma mu miɗiki ya ɓa: Ki tiliŋa, amma ki yimi kai. 37N'Apa a saŋa paŋ aga a halasi sa. Ni n'a halasi li sa ɗa aga mu birgaŋ edi duk kai zaŋ. 38Buri mu halasi amai par ɗa aŋ zi diriŋa kai, amma aŋ zi dirini Ni n'a ɵinaŋasi. 39Dirini Ni n'a ɵinaŋasi ɗa, a na ɗa ɓa: Ktai arbaɗi nagai n'a sɗiŋa ta ɗa a ba edi kai, amma mu ɵiyiɗi amai war mefeŋ na asakal ɗa. 40Buri dirini apa a na ɗa ɓa: Asiya ɗi paŋ n'a tala ahi li, a ɗiya yimini li warni lai ɗa, a nava suŋfa n'a vada kai, Ta aga mu ɵiyaŋ amai war mefeŋ na asakal.
41Yudiyakai e ŋûriyi pini buri a muɗa ɓa, Ta mu peŋ n'a halasi amai par. 42E miɗi: Hanɗa a Yesu n'ahini Yosef ɗa kai ɗi? Na mu suɗumu epini gaiɗi emini kai ɗi? 43Yesu a waya seŋ a miɗiɗi: Ki ŋûriyi arbaɗi marki kai. 44Ɗif a kiɗa a halasi sa kai na ɓa Api a gidiyaŋsi kai ɗa, nɵa aga mu ɵiyaŋ amai war mefeŋ na asakal. 45Aŋ gaini ɗû war maktuɓ na wiiɗi ɗai na mini Alaw maini nɵa: Ɗai paŋ Alaw aga a hitriɗi, Asiya ɗi paŋ n'a ɵina seŋ na mini Api par, n'a yima hitrini lai ɗa, aga a halasi sa. 46Ɗif n'a tala Api aŋ kai, sai Ni n'a halasi sini Alaw par, Ni a tala Api ɗa ya. 47Jre jre mu miɗiki Ni n'a yima, suŋfa n'a vada kai a wiini. 48-49Ta mu peŋ n'a sa suŋfa, tamaiki e simi mana edi war basga na kaɗatan, e mri lai. 50Peŋ n'a na ɗa a n'a halasi amai par kapai asiya ɗi paŋ n'a sumaŋ li a mra kir kai. 51Peŋ na karni n'a halasi amai par ɗa Mu ta, ɗif n'a luma peŋ hanɗa li ɗa, aga a sumna karni pra. Peŋ na ta aga mu siŋni ɗa, a neŋ-sa kapai ɗai na yai e simni karɗi gaini.
52Yudiyakai e zi hiy arbaɗi marɗi: Ɗif hanɗa a sumu neɗ-sini aŋ limi ɗa maɵa maɵa ɗa?
53Yesu a miɗiɗi: Jre, jre, mu miɗiki Na ɓa ki limi neŋ-si na wiini Ahini ɗif kai, ki ci felni Ahini ɗif kaalai ɗa, tiki suŋfa aŋ warki kai. 54Ni n'a luma neŋ-sa, n'a ca fel ɗa lai ɗa, suŋfa n'a vada kai a wiini, Ta aga mu ɵiyaŋ amai war mefeŋ na asakal. 55Buri neŋ-sa ɗa a wala zi simi na gaini futini, fel ɗa ɗa a wala zi ci na gaini futini lai. 56Ni n'a luma neŋ-sa, n'a ca fel ɗa lai ɗa, a sumna wara ta, maini na ta m'aŋ warni ni nɵa. 57Api n'a ɵinaŋasi ɗa a na karni, Ta mu na kara burini Api lai, nɵa ni n'a luma li sa ɗa aga a sumna karni buriya. 58Hanɗa a peŋ n'a halasi amai par ɗa, a na maini na tamaiki e limiŋ e mri lai ɗa nɵa kai, ni n'a luma peŋ hanɗa li ɗa, aga a sumna karni haa hlai n'a vada kai.
59Hanɗa a wala n'a muɗaŋ won hlai n'a na hitra war sinagogne a Kapernahum.
Seŋ n'a sa suŋfa n'a vada kai
60Asakal n'e ɵini seŋni ya, viya arbaɗi ɗaini zi hitri e miɗi: Seŋ hanɗa gdaŋ koo, ɗif n'a yimaŋ ɗa asiya ɗa? 61Won hlai na Yesu a tiliɗi ɗaini zi hitri e ɗa ŋûriyi a miɗiɗi: Hanɗa a wala zi dibi azi buriki ɗi? 62Kapai ki tili li Ahini ɗif a niya amai war hlai n'a nasi ka warni avut ɗa koo! 63A sa suŋfa ɗa a Seze, neŋ-si ɗa a nafa wala kai. Seŋ n'a mu miɗiŋki hanɗa a Seze, a suŋfa lai. 64Amma zamai e ɗa arbaki e diri e yimi kai ɗa haa war pi zi tiki par gaini ni n'aga a saŋ edi lai. 65A miɗiɗi: Mu miɗiki ɓa, ɗif a kiɗa a halasi sa kai, na ɓa a sa sini sini Api par kai ɗa buri hanɗa.
66Woni par, viya arbaɗi ɗaini zi hitri e wiyi duɓaɗi kir kai.
Mat. 16.13-20; Mark. 8.27-30; Luk. 9.18-21
67Nɵa Yesu a miɗiɗi wiiɗi na doogo pi sulu: Tiki ɗa ki firiyi ki hili. 68Simun Peter a waya seŋ a miɗini: Epiɗ-ɗai, tiyi kapai mi hili pini asiya ɗa? Seŋ n'a sa suŋfa n'a vada kai ɗa aŋ muku koo! 69Tiyi ɗa a yima midiyi ya, mi siɗi ɓa na sɗik na wiini Alaw ku tuku. 70Yesu a waya seŋ a miɗiɗi: Mu virikisi mu ta kai ɗi, tiki na doogo pi sulu ɗa, paŋ ktai ktai arbaki a Mat. 71A muɗa ɵa na ɗa miɗini Yudas, n'ahini Simun Iskariyot, buri a ni n'aga a saŋ edi, ni a ktai arbaɗi na doogo pi sulu lai.
Currently Selected:
Yohana 6: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
