Yohana 7
7
Tawalakaini Yesu e diri e yimi pini kai
1Asakal hanɗa, Yesu a paya midini afti na Galeliya, buri ɓa a firiya a paya midini afti na Yudiya kai, buri Yudiyakai e firiyi e fiɗiŋ edi.
2-3Amma fet na wiini gumu na wiiɗi Yudiyakai e ɗi fu gobi, tawalakaini e miɗini: Faka won na par, hala war Yudiya kapai ɗaiku zi hiri lai e tili sdaku na ku na zaŋ ɗa. 4Ɗif n'a firiya a siŋka sini edi ɗa a za wala war ŋoyai kai, na ɓa ku na za wazagai hanɗa, siŋka suku edi arɗi ɗai. 5Buri ɓa koo tawalakaini tekeɗeɗi, e ɗiyi yimiɗi miɗini kai. 6Yesu a miɗiɗi: Hlai na wiya a cosi kai hai, amma na wiiki a na ɵa kureɗ. 7Ɗai na yai e kiɗi e bili gaw siki kai buri mu na za zaida ɓa sdaɗi a meefeŋ. 8Tiki ɗa, hili amai miɗi fet ɗa, Ta ɗa mu halaɗi a hili miɗi fet hanɗa kai buri ɓa hlaiŋa a vasi amai kai hai. 9Asakal n'a muɗa hanɗa ya, a sumna war Galeliya.
Yesu miɗi fet na wiini gumu
10Amma won hlai na tawalakaini e hili amai miɗi fet ɗa ya, Ni lai a hala, a hala edi papɗak kai, amma war kuɗuhai. 11Yudiyakai e piyiŋ miɗi fet ɗa, e miɗi: Ɗif ni ɗa aŋ wata ɗa? 12Arbani vok ɗa, ɗai e miɗi gaini viya, zamai e miɗi ɓa: Zamai e miɗi ɓa a ɗif na pɗem, na zamai pra e miɗi ɓa, a ɗif zi wili ɗai edi. 13Paŋktai ɗif n'a muɗa wala gaglai midini nɵa aŋ kai, e hiini buriɗi Yudiyakai.
14Won hlai na fet te co haa arba ta ɗa, Yesu a halasi amai warni tempel woni a hitriɗi ɗai. 15Yudiyakai e bindi hiyak e zilbi siɗi ɓa, ɗif hanɗa a hitra kaalai ɗa a sɗa ɗû ɵa maɵa maɵa ɗa? 16Yesu a waya seŋ a miɗiɗi: Hitri na wiya ɗa mu navaŋsi gaini mada dama kai, amma a halasi sini Ni n'a ɵinaŋasi ɗa par. 17Na ɓa ɗif a dara a za diri na wiini Alaw ɗa aga a sɗa ɓa, hitriŋa aŋ sini Alaw par, zaw, mu zaŋ ɗa gaini mada dama ɗi? 18Ni n'a muɗa gaini midini dama ɗa, a paya ɗa a kol na wiini, amma ni n'a paya kol na wiini Ni n'a ɵinaŋasi ɗa, a na jre, meefeŋ warni kai.
19Musus a siki gadai zi ɗû kai ɗi? Paŋktai, ktai n'a za pini gadai zi ɗû aŋ kai, ki piyi aŋ fiɗiŋa edi buri maɗa? 20Firiɗi ɗai e wiyini seŋ e miɗi: Ksalai aŋ muduku, n'a paya aŋ fuɗuku ɗa asiya ɗa? 21Yesu a waya seŋ a miɗiɗi: Mu za na ɗa a sɗa ktai, tiki paŋ ki bindi hiyak burini. 22Musus a siki ɵini-gurgle, a na sini Musus par kai, buri ɓa aŋsi haa siɗi tiyakaiki par, tiki ki ɵi wiini ɗif war mefeŋ na wiini Sabbat. 23Na ɓa ɗif a nava ɵini gûrgûle war mefeŋ ni Sabbat kapai gadai na wiini Musus ɗa a fuɗa edi kai, nɵa tiki ki zi hiy sa buri mu zuula ɗif war Sabbat ɗa buri maɗa? 24Ki ɗûklûti sariya pini arai kadai kai, a juva ɓa sariyaki ɗa a za war jre. 25Yesu a Kristu ɗi? Ɗai zamai na Yeruzalem e miɗi: Hanɗa a ni n'e ɗa piyiŋ aŋ fiɗi edi ɗa kai ɗi? 26A muɗa na edi papɗak, ɗif a na miɗini seŋ kaalai koo! N'abakai na wimu ɗa, e siɗi ya jre ɓa, Ni a Kristu tiɓ. 27Ɗif hanɗa, tiyi mi siɗi hlai n'a halasi woni par ɗa, amma Kristu won hlai n'aga a halasi ɗa, ɗif a sɗa hlai n'a halasi woni par kai. 28Nɵa Yesu won hlai n'a na hitra warni tempel ɗa a ɗuula a muɗa: Tiki ki siɗiŋa, ki siɗi hlai na mu halasi woni par lai, paŋ ktai mu halasi gaini mada dama kai, Ni n'a ɵinaŋasi ɗa a jre, tiki ɗa ki siɗiŋ kai. 29Ta mu sɗaŋ buri mu halasi sini par, a ɵinaŋasi ɗa a ni lai.
30Nɵa e piyi aŋ yimiŋ, amma ɗif n'a tika tini sini aŋ kai, buri ɓa lerni a cosi kai hai.
31Arbani firiɗi ɗai par ɗa, viya e yimi pini, e miɗi: Won hlai na Kristu a halasi li ɗa, aga a za wazagai zi siŋki a suwa na ɗif hanɗa a na zaŋ ɗa ɗi?
E ɵiniɗi askarai aŋ yimisi Yesu
32Farisekai e ɵini wala na ɗai e ɗa ŋûriyi pini ɗa, nɵa paakai n'abakai zi ɓaka gaiɗi Farisekai e ɵiniɗi askarai zi gɗam buri e yimiŋsi.
33Yesu a miɗiɗi: Mu na gaiki burini hlai n'agwi, aga mu waya sini Ni n'a ɵinaŋasi ɗa. 34Aga ki piyiŋa, amma aga ki niviŋa kai, hlai na mu woni ɗa, ki kiɗi ki cûsi woni kai. 35Yudiyakai e miɗi arbaɗi marɗi: A hala ɗa wata ɗa, na kapai mu nuvuŋmu kai ɗa? A firiya a hala edi arbaɗi nagai n'e ɵiri edi arbaɗi grekkai, zaw, a firiya a hala a hitriɗi grekkai ɗi? 36Seŋ n'a muɗaŋ ɓa: Aga ki piyiŋa, amma aga ki niviŋa kai, hlai na mu hala woni ɗa tiki ki cûsi woni kai ɗa, a siŋka ɗa a maɗa?
Ra zi yem na karni
37Mefeŋ na asakal, mefeŋ n'abai na wiiɗi fet ɗa, Yesu a ɗiya amai zaw a ɗuula a muɗa: Ɗif na sai te na zaŋ ɗa a halasi sa aŋ ca yem, 38ni n'a tika yimini li mada, ra zi yem na karni aga a kasi edi warni par maini na ɗû a muɗa ɗa nɵa. 39A muɗa ɵa na ɗa miɗini Seze sɗik na nagai n'e ɗiyi yimiɗi miɗini aga e niviŋ ɗa, buri ɓa Seze a na fu kai hai, buri Yesu a niya warɗi abai kai hai.
Ɓraw a za arbaɗi ɗai burini Yesu
40Zamai arbaɗi firi par, won hlai n'e ɵini seŋ hanɗa, e miɗi: Jre, Ni ɗa a ɗif na mini Alaw. 41Na zamai pra e miɗi: A Kristu. Amma zamai e miɗi: Kristu ɗa a halasi a Galeliya par ɗi? 42Ɗû a muɗa ɓa: Kristu ɗa aga a halasi war pinzibani David par, war Betlehem, fuŋ na David a na ka warni par kai ɗi? 43Nɵa ɓraw a za arbaɗi ɗai burini. 44Zamai arbaɗi e piyi e yimiŋ, amma ɗif n'a tika tini sini aŋ kai.
Yimi-kai na wiiɗi n'abakai
45Askarai zi gɗam e wiyisi siɗi paakai n'abakai zi ɓaka gaiɗi Farisekai, nagai e miɗiɗi: Ki kiŋsi kai ɗa, buri maɗa? 46Askarai zi gɗam e wiyi seŋ e miɗi: Mi siɗi ka ɗif a muɗa seŋ maini ɗif hanɗa nɵa duk kai. 47Farisekai e wiyi seŋ e miɗi: Tiki lai, ki hini siki aŋ tirɗi edi pini seŋni lai ɗi? 48Arbaɗi n'abakai gaiɗi Farisekai ɗa, ktai n'a yima pini a na ɗi? 49Amma ɗai n'e siɗi gadai zi ɗû kai hanɗa, e ɗi ɗai na tusa aŋ midiɗi. 50Nikodemus, ktai arbaɗi n'a halasi sini Yesu avut par, a ktai arbaɗi Farisekai lai, a miɗiɗi: 51Gadai zi ɗû na wimu a sa futi aŋ ɗûklûti sariya midini ɗif won hlai n'e ɵini seŋ na mini par kaalai, e siɗi sdani n'a zaŋ ɗa kaalai ɗi? 52E wiyini seŋ e miɗi: Tuku ku na Galeliya par lai ɗi? Fufuka pɗem, aga ku navaŋ ɓa; ɗif na mini Alaw n'a halasi war Galeliya par aŋ kai.
Muni zi maɵara
53Ɗif paŋ a waya ahani ahani.
Currently Selected:
Yohana 7: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
