Mk 15

Bakë ai Yesus abë Pilatus

Mt 27,1-2.11-14; Lk 23,1-5; Yoh 18,28-38

1Kikidigi ai ndib, ndò bëfada bënen ai bënyia-bod-mvia ai bësaṅa bëkalara ai ekoan nnam esë babò ekoan, bëfaṅa Yesus ngadag, bëkë nyè vë Pilatus. 2Ndò Pilatus asili nyè na: Yë onë nkukuma Yuden? Ndò ayalan nyè na: Ndò wadzo dili. 3Bëfada bënen bëngasòman nyè abui. 4Ndò Pilatus adugan nyè sili: Wayalan ki tò dzom nga? Vogolo abim basòman wa. 5Yesus atoa të yalan tò dzam, e kan yë na Pilatus angakam.

Batsig na Yesus ayean ai awu

Mt 27,15-26; Lk 23,13-25; Yoh 18,39—19,16

6A abog Paska asë, akarëga bò suu e man mimbog bëdzaa nyè. 7Mod ziṅ hala angabë dzoe na Barabbas, atoa a mimbog ai bod bëkarkara ya bëngawoe mod a endudugëlan ziṅ. 8Ndò bod bëngabed, bëtari na basili nyè na abò bò anë fulu engabë nyè. 9Ndò Pilatus ayalan bò na: Yë miayi na mësoe mina nkukuma Yuden? 10Ayëmë të na bëfada bënen bëngakuan ai nyè a mbë nnëm. 11Bëfada bënen bëngabòlan bod na Barabbas ṅnyè asuu bò. 12Ndò Pilatus adugan bò yalan, nyè na: Dze hm miayi na mëbò ai e nyò mialoe na nkukuma Yuden? 13Ndò bafëdan yëdan a yob ete na: Bomo nyè a klos. 14Pilatus nyè ai bò na: Dze adaṅ abò a enë abe? Bò ha hë bëyedëgan a yob na: Bomo nyè a klos. 15Mbol Pilatus angabë ayi na bod bëtòbò mintag, ndò asuu bò Barabbas, avë na bëyid Yesus, bëbomo nyè a klos.

Bëzimbi bakpëlë Yesus

Mt 27,27-31; Yoh 19,2-3

16Ndò bëzimbi bëngakui ai nyè a nsëṅ abaa, a nda ngòmëna, bëloe esamba bëzimbi esë, 17ndò babòdò nyè eyie eviege, bëtiṅi ekada biyò, bëbede nyè dzò a nlo. 18Bëkèè hm na basug nyè: Ovuma, a nkukuma Yuden. 19Bëngabimi nyè a nlo ai engëṅ, bëtuigi nyè mëtè, bëkudu nyè mëbòṅ osu na balugu nyè. 20Eyòṅ bëngamana nyè kpëlë, bësòdi nyè evëlë eyie, bëdugan nyè bòdi biyie bie. Mbò bakë ai nyè ba na bakë nyè bomo a klos.

Babomë Yesus a klos

Mt 27,31-44; Lk 23,26-43; Yoh 19,17-27

21Ndò banòdi Simun man Sirena#15,21Sirena angabë tisòn ya si Afrika. Eyòṅ ziṅ na bod bëngabë yëmë bòn bë Simun te., ya angabë lodo hala, asòò a afub, esya Alesander ai Rufus, na abëgë nyè klos. 22Ndò bakë ai nyè a Golgota, nala watyan na, Hom Ekogolo nlo. 23Ndò bavë nyè mëyòg më saṅ. Abënë nyu. 24Ndò babomo nyè a klos, bëkaban biwòman bie, bëdoa abia. 25Engabë awola lala, eyòṅ bëbomo nyè a klos. 26Etòm awu die engabë ntilan na: Nkukuma Yuden. 27Bëngabome fë bizilngan bibè ai nyè ha, mbòg a mbo-nnomo, e nyò mbòg a mbo-ngala.#15,2728 Nala ngò ebug mfufub Ntilan engatoban na: bëngalaṅ nyè a taṅ bizilngan. 29E bod bëlodo hala bëngakpëlë nyè, bëluugu minlo bëdzo na: Bòs, a e mod wabug tempel, odugan nyè loṅ a mvus mëlu mëlè, 30susu a klos, onyii wamen. 31Dzam dëda fë, bëfada bënen ai bësaṅa bëkalara bëngakpëlë nyè a zaṅ bò a bò ha, bò na: Angakode bod bëfë, asëki dzam kode hë emen! 32Kristus, nkukuma Israel atam hm sus a klos na, biyen, biyëbë fë. E bod bëmbë mboman a klos ai nyè ha bëngakpëlë nyè.

Yesus awu a klos

Mt 27,45-56; Lk 23,44-49; Yoh 19,28-30

33Eyòṅ awola samëna angakui, ndò dibi angabò akui a awola ebulu. 34A awola ebulu, ndò Yesus angakòbò a yob ete na: Eloi, Eloi, lema sabaktani#15,34Bs 22,1? nala watyan na: A Zamba wama, a Zamba wama, a dze wadzoge ma#15,34Bs 22,1? 35Bod bëziṅ ya bëngabë tëlë hala bëngayi wog, bò na: Yënë, aloe Elias! 36Mod ziṅ hala atye mbil, akë du anya a saṅ wayn, akëlë a akòṅ, anyuu nyè, nyè na: Dzogan, biyen ngë Elias ayi nyè suu a si. 37Yesus adugan vë kiṅa yob ete, ndò asuu ṅhëbë. 38Ndò mod eye ndòmbò ya tempel angatondëban a zaṅ, atarigi a yob, akui a si. 39Ndzoe ntèd bëzimbi angabë tëlë nyè osu; e kan Yesus angasuu ṅhëbë, mod te nyè na: Bëbëla, e mod nyò ahë bë mòn Zamba. 40Bininga bëngabë bëtëlë hala oyab, bëbëbëgë, bëtoa na: Maria Magdalena ai Maria nyia Yakob mòngò ai Yoset, ai Saloma, 41mbò bëzaa batoṅ nyè eyòṅ angabë a Galilea, bësye nyè, ai abui bininga afë a bëngabed ai nyè a Yerusalem.

Edzëb-mbim Yesus

Mt 27,57-61; Lk 23,50-56; Yoh 19,38-42

42Abog ngoge ekëlë vin hali, mbol angabë okuli abog, nala onë na osusua sabbat, 43ndò Yosef ya Arimatea, mfaṅ mod ya ekoan nnam, nyè fë angabë ayanga ayòṅ Zamba, ndò angabi azombo, akëlë abë Pilatus, adzaè nyè mbim Yesus. 44Pilatus angakam na Yesus awu ya ki, ndò aloe ndzoe ntèd bëzimbi, asili nyè ngë hala awu ya eban. 45Eyòṅ angayëm ai e kan ndzoe bëzimbi angakad nyè, ndò avë Yosef mbim. 46Akusu ndòmbò eye, asuu nyè a si, awogo nyè a ndòmbò te, aboe nyè a sòṅ ya bëngabog a akòg, bëfudi ngòg a mbè sòṅ. 47Maria Magdalena ai Maria nyia Yoset bëyënë të e hom bëngafudi nyè.

Currently Selected:

Mk 15: NTE12

Highlight

Copy