Mk 16

Akui-lë sòṅ Yesus

Mt 28,1-8; Lk 24,1-12; Yoh 20,1-10

1Sabbat angayi lod, Maria Magdalena ai Maria nyia Yakob ai Saloma bëkusu mimbòn na bakë nyè miè wòbò#16,1Bininga bakë wòbò Yesus mbòn amu bandzëki bi abog ya abò dò a amos sabbat.. 2Ndò hm ai ndib kidi, ngë sabbat alod anë angoge, ndò bakë a sòṅ, hala nlo-dzobo akui ya. 3Bëzaa basilan bò a bò na: Za amvaa bia ngòg a mbè sòṅ an a? 4A batye mis na babëbë, bëntala na ngòg engavaaban; dzò engabë hm eyëgan anen. 5Ndò banyian a sòṅ, bëyënë ndoman mod etoa efas ya mbo-nnomo, abëgë mfum ewòman, bëngakòn wòṅ a bui. 6Ndò adzo ai bò na: Mibë mbara: Yesus man Nazaret ya angabomban a klos ṅnyè miadzëṅ, së nala a? Atëbë a sòṅ, asëki ha. E hom bëngaboe nyè hi. 7Mfa waan, kaṅan kad bëyègè boe ai Petrus na akë mina osu a Galilea. Awe ngò miayi nyè yen, e kan angakad mina. 8Yë bëngayi kui a nsëṅ, ndò batub mimbil a sòṅ, amu bëngabë nyaman kam ai wòṅ osë. Ndò bandzëki kad mod tò dzom ai e wòṅ bëmbarëga. #16,8Mbëmbë Foe atili Markus akarëga mana ha na:Na ngò Mbëmbë Foe atili Markus angamana ya eyòṅ dzi.

Yesus ayene Maria Magdalena

Mt 28,9-10; Yoh 20,11-18

9Ntëban angatëbë a sòṅ ai ndib kidi a amos osu ngë sabbat alod anë angoge, ndò angayene Maria Magdalena ya angakuli bëbe minsisim zamgbal a nyòl.#16,9-20Së ki Markus ṅnyè angatil aboda di. Dzam da, mbol balèè akyaè ya Yesus angayene, ai mbol fë Nlaṅ te walèè e mam ya e bod bëvòg bëngatil, aboda te anë ebug Zamba totoe. 10E Maria nyò akë kad e ba bëngabë bëmvoe boe, bò ha hë mëlunga, hë miṅyon. 11Ṅnyie anë bëngayi wog na atala, ai na Maria angayen nyè, bëngasoo.

Yesus ayene bëyègè boe bëbè

Lk 24,13-35

12A mvus ya hala, ndò ayene bëbè ya abë bò bëkëlë bawulu, atoa nyòl kan fë, awulugu a mvus nnam. 13Ndò bakë kad e ba bëvòg. Tò nala bò të bò yëbë.

Yesus alom bëyègè boe a si esë

Mt 28,16-20; Lk 24,36-49; Yoh 20,19-23; Bap 1,6-8

14Ndò hm ladugan bò na, bëtoa na badi, ndò ayene b'awom ai mbòg, akòṅan ai bò asu bisoo biaban ai alèd-nnëm daban, amu bandzëki ṅyëbë e bod bëngayen nyè hala atëbë ya a sòṅ. 15Nyè ai bò na, kaṅan a si esë, miyedan ekokoma esë mbëmbë foe. 16E mod ayi yëbë, aduban fë, ayi kodeban; e nyò ayi ki yëbë, ayi ku a nkad. 17E ba bayi ṅyëbë bayi bò e mësimba ma: Bayi tsidan bëbë minsisim a dzoe dama, bayi kòbò minkòbò mifë, 18bayi bi nyò ai mò, ndò fë tò bënyu ngul nsul, wayi ki bò bò tò dzom, bayi bede minkokòn mò, mingabò mvoè.

Akë-lë yob Yesus

Lk 24,50-53; Bap 1,9-11

19Eyòṅ hm Nti Yesus angamana lèè ai bò nala, ndò anganòṅëban a yob, atòbò a mbo-nnomo Zamba. 20Bò bëtye hm na bakë bayedan mbëmbë foe hom osë, Nti asye ai bò, ebug dzò elada minkaṅa i mësimba mëbòban ete. Amen.

Currently Selected:

Mk 16: NTE12

Highlight

Copy