Mt 28

Akui-lë sòṅ

Mk 16,1-8; Lk 24,1-12; Yoh 20,1-13

1A mvus sabbat, kikidigi ai ndib, a amos osu, ndò Maria Magdalena ai e Maria mbòg bëngakë na bakë yen sòṅ. 2Ndò si engatigedan eyëgan. Amu englès Nti angasò a yob, ndò angakë fende akòg, atòbò dò a yob. 3Asu die angabë anë zeyaṅ, biwòman bie bifumu anë ten. 4Bënòni bë sòṅ bënganyaman, bëntoa hë anë mimbim ai e wòṅ bëngabë mbarga nyè. 5Ndò englès azu dzo ai bininga na: Të doe miambara, amu mayëm na miadzëṅ e Yesus angaboman a klos. 6Asëki ha, amu akui a sòṅ anë angadzo. Zaan yen e hom angabë aboo. 7Eyòṅ dzi, kaṅan avol, mikë kad bëyègè boe na akui a sòṅ bëwu, ndò akë mina osu a Galilea, awe ngò miayi nyè yen. Ndò makad mina di. 8Ndò bëngakodo avol a sò, ai wòṅ a minnëm, bëtye mimbil ai abui mintag na bakë kad bëyègè boe. 9Atëm na, Yesus atoban ai bò a zen, nyè na: Miavuma! Ndò basubu babi, bëwuban ai nyè a mëkol, bëngalugu nyè, bëluu ai mësu a si. 10Ndò hm Yesus adzo ai bò na: Të miambara. Kaṅan kad babëdzaṅ na bëkë a Galilea, awe ngò bayi ma yen.

Bënòni batye minnal

11Ndò bëngakë; bod bëhòg ya bënòni bëkëlë a tisòn, ndò bamana lèè bëfada bënen e mam mëngalod. 12Ndò bakë a esòg ai bënyia-bod-mvia, bëkui kiṅ, ndò banòṅ abui mòni, bëvëë bëzimbi, bò na: 13Midzoo na «bëyègè boe bësò nyè dzib ai alu, bia bitoa oyò.» 14Ngë e dzam di akë kui a mëlò më asu-zoa, biayi dò kom, biayi fë kaman ai mina. 15Ndò bënganòṅ mòni, bëbò fë anë bëngakad bò. Ndò adzo di angatsaman a Yuden azaa kui a amos y'ana. 16Bëyègè awom ai mbògò bëkëë a Galilea#28,16Yesus alom apostel a si esë, së ki fë hë a ayòṅ Israel., e hom Yesus angalëb bò, 17ayen bëngayen nyè, ndò balaban ai mësu a si, dzam da, bëvòg ya ete bësoogo. 18Ndò Yesus angasubu bò babi, nyè ai bò na: Ngul esë engavëëban ma, tò a yob, tò a si. 19Kaṅan hm, mikë miayëgëlë mëyòṅ mësë, miduu bò a dzoe Esya, ai Mòn, ai Mfufub Nsisim, 20miyëgëlë bò na bëbaala e mam mësë mëngabende mina. Ndò fë, mamen mënë ai mina mëmos mësë, akëlë kui a amana si.

Currently Selected:

Mt 28: NTE12

Highlight

Copy