Mt 27

Bakë ai Yesus abë Pilatus

Mk 15,1; Lk 23,1; Yoh 18,28

1Ai mëlende më kidi, ndò bëfada bënen bësë ai bënyia-bod-mvia bë nnam bëngakui kiṅ na bawoe Yesus. 2Ndò bëngafaṅ nyè ngadag, bëkë vë Pilatus, asu-zoa.

Awu Yudas

3Ayënë e Yudas angakuan ai nyè angayen na bëkpè nyè a adzo, angasingi dò, akë hm ai minsaṅ mi mòni mëwom mëlè a bëfada bënen ai bënyia-bod-mvia, nyè na: 4Masëm abui amu makuan ai mëki mënë tègè ai etòm. Bò ai nyè na: Yë e dili labëbë bia? Kë adzo doe! 5Ndò angawoa mòni a tempel, atye, akë timbi a ekoe. 6Ndò bëfada bënen bënganòṅ mòni, bò na: Biayean ki nyè fudi a nkòb tempel, amu anë mòni mëki. 7Ndò babò esòg, bëkusu afub mmè mëmvie ai mòni te, na bayi kad dzëb bëyëṅ ete. 8Asu te bëngaloe afub te na: «Afub meki», azaa kui amos di. 9Nala ngò hm ebug profet Yeremias engadzalëban na: Ndò bënganòṅ minsaṅ mi mòni mëwom mëlè, e taṅ ya bòn bë Israel bëngavëg nyè, 10ndò bëngavë mòni te asu afub mmè mëmvie, nala ngò Nti angabende ma#27,10: Zak 11,12..; Ye 18,2..; 32,8..;.

Pilatus asili Yesus minsili

Mk 15,2-15; Lk 23,2-5.13-25; Yoh 18,29—19,1

11Ndò bëngatele Yesus a mis më asu-zoa#27,11Pilatus angabë bëlë ngul ya awoe bod., angasili nyè na: Yë wa onë nkukuma Yuden? Yesus nyè na: Ndò wadzo dili. 12Hë da, ntye osë bëfada bënen ai bënyia-bod-mvia bëngabë sòman nyè, nyè tègè yalan tò dzom. 13Ndò Pilatus adzo ai nyè na: Wawog e mam mësë balaṅ wa ma a? 14Nyè tègè nyè yalan tò dzam dëda, asu-zoa angakam dò eyëgan.

Batsig na Yesus ayean ai awu

15Tum engabë na, a abog Paska asë, asu-zoa akadëgë soe man mimbog mbòg ya bod bëngabë hana. 16Ewolo man mimbog mbòg engabë we mëlu mëte, dzoe na: Barabbas. 17Eyòṅ bod bëngakoan ha, Pilatus nyè ai bò na: Za miayi na mësoe, yë (Yesus) Barabbas,#27,171 Ye yë e Yesus baloe na Kristus? 18Amu angabë ayëmë na bëngakuan ai nyè a mbë nnëm. 19Atòbò angatòbò a batsig mëdzo ha, ndò ngal angalom nyè kad na: «Të wakalan adzo ai e sosoo mod nyòlò. Amu nlo obëb ma ai alu ana etòm dzie.» 20Bëfada bënen ai mvindi bod bëngalëb bod na bëyèt Barabbas, Yesus ṅnyè bëwoe. 21Ndò asu-zoa akad bò na: Za miayi na mësoe mina, a bò bëbè? Bò na: Barabbas. 22Pilatus nyè ai bò na: Mayi hm bò ai e Yesus baloe na Kristus ya? Bò bësë bò na: Bomo nyè a klos! 23Nyè ai bò na: Za etòm asie? Bëngayedan fò a yob ete na: Bomo nyè a klos! 24Ayënë Pilatus angayen na nala watsende ki dzom, hë etotog endzò ebian, ndò anòṅ mëndim, asobo mò a mis më bod ha, nyè na: Mabëlë ki adzo ai e meki ma. Anë adzo daan. 25Ndò nkunda bod osë wadzo na: Mëki moe mësoege ai bia ai bòn ban a nyòl. 26Ndò hm azu bò soe Barabbas; amana bëngamana yid Yesus, ndò angakalan bò nyè na bëbomolo nyè a klos#27,26Awu ya klos angabë mintye abui. Bëlò mbò bëdaṅa woe nala..

Bëzimbi bakpëlë Yesus

Mk 15,16-20; Yoh 19,2

27Ndò bëzimbi bë asu-zoa bënganòṅ Yesus, bëngakë ai nyè a yad bëzimbi, bëkoan nyè nkan bëzimbi a nyòl. 28Ndò bëngasòdi nyè biye, bëbòdi nyè mod ndzòmbi ewòman aviege, 29bëtiṅi ekadi-biyò, bëbòdò nyè a nlo, bëvë nyè ntum a mbo-nnomo, bëngakud nyè mëbòṅ osu, bëkpëgëlë nyè, bò na: Ovuma, a nkukuma Yuden. 30Bëngatui nyè mëndèn a nyòl, bënòṅò ntum vi, bëbimii nyè a nlo. 31Amana bëngamana nyè kpëlë, ndò bëngasòdi nyè ewòman, bëbòdò nyè biyie bie, bëkëlë ai nyè na bakë nyè bom a klos.

Babomë Yesus a klos

Mk 15,20-32; Lk 23,26.33-43; Yoh 19,16-27

32A bëkëlë a zen ha, ndò bayen mod ya Sirenea dzoe na Simun, ndò banòdi nyè na abëgë nyè klos. 33Ndò bakui e hom baloe na Golgota, nala watyan na: Hom ekogolo nlo; 34Ndò bavë nyè wayn atoa mbaman ai zòṅ na anyu#27,34Wayn ai zòṅ: Mënyu mëte mëngabë asu yë na të e mod abomo a klos adaṅ awog mintye abui.. Akiègè angakiègè, ndò angatëb nyu. 35Eyòṅ bëngamana nyè bom a klos, ndò bëngakaban biyie bie, bëdòò abia ete#27,35Bs 22,19, 36ndò bëngatòbò a si, bënganoni nyè hala. 37A nlo woe a yob, bëngabomolo etòm awu die na: Yesus nyò, nkukuma Yuden. 38Bëngabomolo fë bëbe bë bod bëbè ai nyè, mbòg a mbo-nnomo, e nyò mbòg a mbo-ngala. 39Bëlodo bë zen bëngakpëlë nyè, bësuguzu minlo 40bò na: A e mod onë dzam bug tempel, odugan nyè loṅ a taṅ mëlu mëlè, kodëge wamen. Ngë onë mòn Zamba, susu a klos. 41Dzam dëda fë, bëfada bënen ai bësaṅa bëkalara ai bënyia-bod-mvia bë nnam bëngakpëlë nyè, bò na: 42Angakode bod bëfë, asë hm fë kode emen a? Asë nkukuma Israel a? Asusu a klos etoa dzi, biyëbë nyè. 43Angafidi Zamba, akodëge nyè etoa dzi, ngë adiṅ#27,43Bs 22,9. Amu angadzo na: Mënë mòn Zamba. 44Tò e bëbe bë bod bëngabë ai nyè a klos ba, bëngabë kpëgëlë nyè hë dzam dëda.

Yesus awu a klos

Mk 15,33-41; Lk 23,44-49; Yoh 19,28-30

45Akègè a awola samëna, ndò dibi angasus a si esë akëlë kui a awola ebulu#27,45Asu Yuden, amos lëtarigi ai mëkui më dzobo, lëmana ai mëyimbi më dzobo, nala ontoa mëwola awom ai mëbè. Awola lala angabë mëwola ebul, amu nlo dzobo atye eyòṅ bibëlë mëwola mësaman kikidigi.. 46Abog awola ebulu hali, ndò Yesus angasëmë a yob etere na: Eli, Eli, lema sabaktani?#27,46Yesus akogëlan salmen 22. Salmen te anë salmen afidi. Alëdë na, tò abe afe lazu, Zamba ayi sò ai akode. nala watyan na: A Zamba wama, a Zamba wama, etòm dze odzoge ma? 47Bod bëvòg ya e ba bëngabë tëlë hala bëngayi wog nala, bò na: Aloe Elias. 48Ndò mbòg angabumi mbil, akë nòṅan yia, aduu a saṅ wayn, afani a akòṅ, ndò anyuu nyè. 49E ba bëhòg bò na: Dzoge, biyen, kamëna Elias azu nyè kode. 50Ndò Yesus adugan sëmë a yob ete, asuu ṅhëbë. 51Ndò eyie ya tempel engasali#27,51«Eyie ya tempel yasali»: Nnomo amvoe amana ya. Mod osë antoa ya dzam nyian a tempel. Osusua, angabë eki na ngë wasëki man Yuden, onyian a nnëm tempel ete. a zaṅ, akègè a yob, akui a si, si engatigëdan, mëkòg mëngabole. 52Mësòṅ mëngabugi; abui mimbim mimfufub mi bod bëngawu mingakui a sòṅ. 53E bod bëngakui a sòṅ ba, a mvus akui-lë sòṅ die, ndò bënganyian a mfufub dzal, abui bod bëngayen bò.#27,53Yenë afëb 695 54Ndzoe ntèd bëzimbi ai e bod bëngabë ai nyè, bënòniṅi Yesus, bëngayi yen anë si yatigëdan ai e mam mësë mëngabòban, bëngambara abui, bò na: E mod nyò ahë bë mòn Zamba mfaṅ. 55Abui bininga bëngabë hala, bëfòmbògò, bëtëlë oyab, mbò bëngazu babye Yesus akodogo a Galilea, bësye nyè. 56Bëngabë na: Maria Magdalena, Maria, nyia Yakob ai Yosef, ai nyia bòn bë Zebede.

Edzëb-mbim Yesus

Mk 15,42-47; Lk 23,50-56; Yoh 19,38-42

57Ai mëlumbu më ngoge, ndò nkukuma mod ya Arimatea, dzoe na Yosef, angasò; nyè angabë fë ṅyègè Yesus. 58Ndò e mod nyò akë abë Pilatus, ndò adzaè nyè mbim Yesus. Ndò Pilatus abende na bëvë nyè wò. 59Ndò Yosef anganòṅ mbim, amana wogo a mkpamaṅ ndòmbò, 60ndò angafudi wò a mkpamaṅ sòṅ woe ya angaboge a akòg; ndò angadib sòṅ ai mod akòg, asobo. 61Maria Magdalena ai e Maria mbòg bëngabë bëtoa osu sòṅ hala.

Bëzimbi banòni sòṅ

62E kidi lende ya hala, a amos ongabë amos mëfaṅ më Paska, ndò bëfada bënen ai befarisea bëngakoan abë Pilatus, 63bò na: A Nti, bidugan tsog na, hala angënë atala, e mod minnal nyò angadzo na: Mayi kui a sòṅ a mvus mëlu mëlè. 64Bendëge hm na bënòni sòṅ a këlë kui a amos lala; bëyègè boe bëza kë dzib mbim woe, bëngakad bod na: Akui ya a sòṅ bëwu. Minnal mite miayi lod e mi mi osu. 65Pilatus nyè ai bò na: Kaṅan ai e bod ban banoni, mifëb sòṅ e kan miadiṅ. 66Ndò bëngakë, bëngafëb sòṅ ai e bënòni bëngatele a mbè sòṅ.

Currently Selected:

Mt 27: NTE12

Highlight

Copy