Mk 1

Yohannes Ndu-bodo ayedan Mbëmbë Foe

Mt 3,1—6,11; Lk 3,3-6.15

1Mëtari më mbëmbë Foe Yesus Kristus #1,1-8Bëkristen bë osu bëngabë yii na bayëm esye Yesus mbëṅ mbëṅ. Abyali Nti lasëki ai bò mfi. Asu te Markus alèè ki bò Nlaṅ abyali Yesus., (mòn Zamba), 2anë angatilban abë profet Isaias na: Yënë, malom wa englès wama osu, ayi wa kom zen. 3Kiṅ e mod abam a nkod-nnam: Koman zen Nti, limëṅan mindzòṅ mie#1,3Mal 3,1; Is 40,3.. 4Yohannes Ndu-Bodo angabë a nkod-nnam, ayedëgan ṅduan avëṅan asu evaa minsëm. 5Ndò nnam Yudea osë ai bod bësë ya Yerusalem bëngabë këlëg abë nyè, bëduuban abë nyè a osoe Yordan, bëmëmë minsëm miaban. 6Yohannes angabë abëgë mimvòt mi kamele, ai kanda ekob a angëdëg, adzaa bëmbasana ai woe afan. 7Ndò angabë ayëdëgan, nyè na: Mod azu ma a mvus, anë ngul alodo ma, mëbëlë ki ngul ya alumbu a si na matii nyè minkòl mi ngob. 8Ma madu mina ai mëndim, nyè ayi hm mina du ai Mfufub Nsisim.

Ṅduan Yesus

Mt 3,13-17; Lk 3,21

9Mëlu mëte, ndò Yesus angasò a Nazaret ya Galilea, ndò angaduban abë Yohannes a Yordan. 10Ndò etye etye ya angakodo a mëndim, ndò angayen yob oyaaban, ai nsisim osusu abë nyè anë obëṅ. 11Ndò kiṅ engasò a yob na: Onë mbòs ediṅ mòn wama, mëngafuu ya wa nnëm.

Yesus abi mëbobëla a nkod-nnam

Mt 4,1-11; Lk 4,1-13

12Etye etye, ndò Nsisim ongatindi nyè a nkod-nnam. 13Ndò angatobò a nkod-nnam mëlu mëwom mënyii, Satan abobolo nyè; angabë atoa ai tsid mëfan, benglès bësye nyè.

Yesus atari esye dzie a Galilea

Mt 4,12-17; Lk 4,14-15

14A mvus yë na bëkuan ya ai Yohannes, ndò Yesus angakë a Galilea, ayëdegan mbëmbë foe Zamba na: 15Abog akpaèn ya, ndò edzoe Zamba esubu ya babi: Tsendëgan, miyëbë mbëmbë foe#1,15Mbëmbë Foe Yesus atyan na mam matsende ai na bod bayean nyè yëbë..

Yesus aloe bëlòb bë kòs bënyii

Mt 4,18-22; Lk 5,1-11

16Ndò hm, alodo a ntsag ma më Galilea ha, ndò angayen Simun ai Andreas, manyaṅ Simun, bëwoaga mëvòt a maṅ; amu bëngabë bëlòb bë kòs. 17Ndò Yesus adzo ai bò na: Zaan miabie ma, eyòṅ te mayi bò na mibò bëlòb bë bod. 18Ndò bëngadzoge mëvòt maban, bëngabie nyè. 19Angayi subu man oyab, ndò ayen Yakob, mòn Zebede, ai Yohannes, manyaṅ woe, bò bëkomo mëvòt a efunga, 20ndò angaloe bò etye te. Ndò bëngalig esya waban Zebede a efunga ai bëlobele, ndò bëngakë babie nyè.

Yesus asye mod abëlë mbë nsisim

Lk 4,31-37

21Ndò bënganyian a Kafarnao; anyian bënganyian a nda-bikoan (sinagoge) a amos sabbat, angayëgëlë. 22Bod bëngakam ayëgëlë die, amu angabë ayëgëlë bò anë e mod abëlë edzoe, së ki anë bësaṅa bëkalara. 23Mod ziṅan gabë a nda-bikoan ha, abëlë mbë nsisim, ndò angabam, 24nyè na: Dze enë a zaṅ bia wa, a Yesus man Nazaret? Yë wasò na wazu bia mana? Mayëm wa, onë mfufubu ya abë Zamba. 25Ndò Yesus angakòṅan ai nyè na: Dibi anyu, okui nyè a nyòl! 26Ndò mbë nsisim ongasuguzu nyè, ndò ongabam a yob ete, okui nyè a nyòl. 27Bësë bëngakam, bësiligi hm bëben na: Dze dzi? Mkpamaṅ dòkten ai edzoe esë; adzoe tò bëbe minsisim, mia miwogo nyè. 28Ndò e foe nyi engayaman a nkòṅ nnam Galilea osë.

Yesus abò abui bod mvoè

Mt 8,14-17; Lk 4,38-41

29Etye etye, ndò bëngakui a nda-bikoan a nsëṅ, ndò bakë a nda Simun ai Andreas, bò ai Yakob ai Yohannes. 30Hë da, nkyè mininga Simun angabë adzogo ai fiba, ndò bëngakad nyè dò. 31Ndò angasubu nyè babi, abii nyè a wò, ndò atele nyè. Ndò fiba engakodo nyè a nyòl, angabëlan ai bò. 32Abog ngoge engabò, abog nlo-dzobo alumbu#1,32Bazu ai minkokòn ngongole amu amos wamana ngongole, nala watyan na sabbat amana ya., ndò bëngabëgë e bod bësë bëngabë wogo mintye ai e ba bëngabë bëlë bëbe minsisim. 33Ndò tisòn esë engazu koan a mbè a yob. 34Ndò angatëbë na alëdë abui bod abëlë akòn kan kan, akuligi bësatan, të dzoge na bësatan bëkòbò, amu bëyëmë nyè#1,34Yesus akili bod ai bësatan kòm esë na të bakad a yob ete na anë Messias, amu ambarëga na bod bëzaa tsog na anë e Messias azu luman ai edzoe ya Roma. Nyè azu dzoe minsisim..

Yesus akë ayedan mbëmbë foe

Lk 4,42-44

35Kikidigi ai ndib, ndò adugan kodo a si, akëlë e hom angabë etam, angakogëlan we. 36Simun, ai e bod bëngabë ai nyè bëngadzëṅ nyè; 37Ayen bëngayen nyè, bò na: Bod bësë badzëṅ wa. 38Nyè ai bò na: Nkodan ha, bikë e mal mëvòg ya ngòdò va, asu yë na ma mëyëdan fë mbëmbë foe we. Amu asu te ndò mëngasò. 39Ndò angakë ayëdan mbëmbë foe a mënda-bikoan maban a Galilea osë, atsidëgan bëbe minsisim.

Yesus abò nzëzam mvoè

Mt 8,1-4; Lk 5,12-16

40Ndò nzëzam#1,40: Minzëzam mingabë ai eboe a nyòl asu Yuden. Asu yë na nzëzam odugan nyiṅ ai e bod bëvòg fufulu, hë fada atari yen na abò ya mvoè. Asu Yuden, Yesus asëki fada. Eboe yayean nyè zu a nyòl ai nnamban ya anamba nzëzam, dzam da nyè afubu nyè. ongazu abë nyè, ongakogëlan ai nyè, (akudu mëbòṅ a si), nyè ai nyè na: Ngë wadiṅ, onë ma dzam fubu. 41Ndò Yesus angayen nyè ngòl, asama wò, anamba nyè, nyè ai nyè na: Owe, mayi nala, bò mfuban. 42Etye etye te, ndò zam engakodo nyè a nyòl, ndò e mod nyò angabò mfuban. 43Ndò asoe nyè, abende nyè ai ngul esë 44na: Bò okala na të wakad tò mod ziṅ tò dzom, hë da okë lëdë nyòl abë fada, okë fë tuni asu mfuban, akyaè Moses angabende, asu yë na bëyen. 45Yë e mod nyò angayi tam kui, atari fò na abëgëlë dò abui, akë atsam e foe nyi, tègè fë yë na Yesus angabë dzam nyian tisòn ziṅ a ngëṅ, angakë a tòbò e hom ongabë të ai bod. Bod ba bëtyege hom osë, bëzaa abë nyè.

Currently Selected:

Mk 1: NTE12

Highlight

Copy