Mt 25

Nkana mintud bëngòn awom

1Edzoe ya yob yayi bò anë mintud bëngòn awom ya bëngakë ai mëlamba na bakë toban ai nlug a zen. 2Bëtan ya ete bëngabë mëkut, bëtan bëtoa fëg. 3Abog mëkut mënòṅò mëlamba maban, te nòṅ mbòn. 4Mimfëfëg minòṅò mbòn a minlòmbi, ai mëlamba maban. 5Mbol nlugu angatigbi, bësë bëngandë oyò, bëbëbiman fë oyò ben. 6Ai zaṅ alu ha, ndò kiṅ yayëdan na: Nlugu nyòli, kaṅan toban ai nyè. 7Mintud mi bininga misë mi mingakodo a si, bëngakom mëlamba maba. 8Mëkut mò ai mimfëfëg na: Vaan të bia man mbòn, amu mëlamba man mamana dim. 9Mimfëfëg miè na: Tègè fò, oza bò bia besë abòd. Kaṅan kus a bod bë makit asu dan. 10Mbò bakë ba na bakë kus mbòn, nlug nyè asò, e ba bëngabë babi bënyian ai nyè a nda-abog, bëfëdë mbè. 11Eban të kog, ndò e bëngòn bëvòg baham, bò na: a nti, a nti, yaagi bia! 12Ndò ayalan na: Makad mina bëbëla na mayëm ki mina. 13Tòbëgan hm evie, amu miandzi tò amos, tò awola.

Nkana minsaṅ mi mòni awom

Lk 19,11-27

14Anë mod ziṅ ya akëlë a dulu, ndò angaloe bod bisye boe, avë bò akuma die. 15Avëë e nyò minsaṅ mi mòni mitan, e nyò ki mibè, e nyò ki nsaṅ mòni mbòg, mod osë a nkoṅ ngul woe, nyè akë a dulu nyò. 16Etye etye, ndò e mod angabi minsaṅ mi mòni mitan nyò anganòṅ miè, asye ai miè#25,16 Asu yë na abye bòn bë mòni., ndò mingabulu nyè minsaṅ mifë mitan. 17Dzam dëda ai e nyò angabi mibè, abulu mifë mibè. 18Hë da, e nyò angabi nsaṅ mbòg nyò, ndò angakë fag si, asòli mòni esya nti woe. 19A mvus ban mëlu, esya nti e bod bisye ba asòò, angakom mam ai bò. 20E mod angabi minsaṅ mitan asòò ai minsaṅ mifë mitan, nyè na: A nti, ongavë ma minsaṅ mitan, minsaṅ mifë mitan hm mi mabede a yob. 21Esya nti woe nyè na: Abëṅ adzo, a mbëmbë ewolo mbò esye, mbol oyëm bëlan ai ban mam, mayi wa tele e mam mënë ai mfi abui. Zaa tag ai esya nti woe. 22E nyò angabi minsaṅ mibè asòò, nyè na: a nti, ongavë ma minsaṅ mibè, madugan bede mifë mibè a yob. 23Esya nti nyè na: Eyëgan mbëṅ, a mbëmbë ewolo mbò esye, wabò okala ai amëmam, mayi wa bò nkala e mam mënë anen. Zaa tag ai esoa nti. 24E nyò angabi nsaṅ mbòm mbòg ny'akë hm sò, nyè na: a nti, mazu ya mayëm wa na onë alet, wakoe e hom waandzëki bè, okoan e hom waandzëki mias; 25ai wòṅ te osë a nnëm, ndò makë wa sòli nsaṅ mòni woe a si. Ngò hi, nòṅò. 26Ndò esya nti angayalan nyè na: A mbë ntëtëg mbò-esye, ombë yëmë na makoe e hom mandzëki bè, mëwologo e hom mandzëki mias, 27kë ongabë oyean ma vë mòni a bitye, na abog makë sò, mënganòṅ mòni wama ai mvug a yob. 28Bëfadigi nyè nsaṅ mòni te a mò, bëvë e nyò abëlë minsaṅa wom. 29Amu, e nyò abëlë, bayi nyè bulu vë, abuguban; e nyò abëlë ki, bayi nyè fadi tò e dzi abëlë. 30Woan ewuwu-ntug dzi a dibi a nsëṅ: Awe, hë miṅyon, hë Nladan mëkëg.

Nkat mvua

31Eyòṅ mòn mod ayi sò a duma die ai benglès boe, ayi tòbò etoa ntomba duma die. 32Bayi sò ai nyè mëyòṅ mësë, abog te ayi mò fial, anë nnòni biyëm akanda mintomba ai bikëla. 33Abog te ayi tele mintomba a mbo-nnomo, atele bikëla a mbo-ngala. 34Eyòṅ te nkukuma ayi dzo ai e ba ya mbo-nnomo na: Zaan, a mina ya Tara angafubu, zaan nòṅ ngab-elig ya edzoe ya engakomëzan asu dan atarigi a akomo-lë yob ai si. 35Amu mëngabë wogo zie, ndò mingavë ma bidi, mëngabë wogo ekode, ndò mingavë ma mënyu, mëngabë nnë, ndò mingavë ma adzogobo. 36Mëngabë nsò, ndò mingabòdò ma ewòman, mëngabë mëkonò, ndò mingazu ma fëb, mëtoa a mimbog, ndò mingazu ma bëbë. 37Eyòṅ te bësosoo bë bod bayi nyè yalan na: a Nti, eyë bingayen wa ve, owogo zie, ndò bingavë wa bidi, ngë ki na owogo ekode, ndò bingavë wa e dzom waanyu? 38Eyë bingayen wa ve otoa nnë, ndò bingavë wa adzogobo, otoa nsò, ndò bingavë wa ewòman? 39Eyë bingayen wa okònò ve, ngë ki na otoa a nda-mimbog, ndò bingazu wa yen? 40Ndò nkukuma ayi bò yalan na: Makad mina bëbëla na, e di asë mibò mbòg ya e babëdzaṅ bama a bënë a si ba, ma miabò dò. 41Eyòṅ te ayi dzo ai e ba ya mbo-ngala na: Kodan ma a mis, a bod bë eyòk, mikë a e ndoan kòm bëngakomëzan asu Mbë Nsisim ai benglès boe. 42Amu mëngabë wogo zie, mina të ma vë bidi, mëwogo ekode, mina tègè ma vë dzom ya anyu, 43mëngabë nnë, mina tègè ma vë adzogobo; mëtoa nsò, mina tègè ma vë ewòman, mëkònò ngë ki na mëtoa a mbog, ndò miandzëki ma sòṅ fëb; 44Abog te ba bayi nyè yalan na: a Nti, eyòṅ efe bingayen wa owogo zie, ngë ki na owogo ekode, otoa nnë, ngë nsò, ngë nkokòn, ngë a mimbog, ndò biandzëki wa kè? 45Abog te ayi bò yalan na: Makad mina bëbëla na: eyòṅ esë miandzëki dò bò tò mbòg ya abobod ba, ma miandzëki dò bò. 46Nala ngò hm bayi kë a endëgëlë kòm, bësosoo bëkëlë a enyiṅ kòm.

Currently Selected:

Mt 25: NTE12

Highlight

Copy