Mt 24

Yerusalem ayi siliban a si

Mk 13,1; Lk 21,5

1Ndò Yesus angakui a tempel, angakë; bëyègè boe bëngalëdë nyè mëloṅ më tempel#24,1—25,46 E mam më mvua. Yesus akad mbol ya bayi sili Yerusalem a si, ai mbol ya mam mëte mayi bòban, a «amos Nti».. 2Ndò angayalan bò na: Të miafyaṅan kombo mëloṅ mala! Makad mina bëbëla na, to akòg da layi ki ligi abëdë e di avòg a yob, së na mëmana sulan a si.

Mintye miayi bò osusua mëmana

Mk 13,3-13; Lk 21,7-19

3Atòbò bëngatòbò a nkol bile bi mbòn, ndò bëyègè bëngasubu nyè babi, bò bò, bò na: Kada bia, e mam ma mayi yenëban eyòṅ efe? Ndò ki ndëm asò-lë doe ai amana si enë ya? 4Yesus nyè ai bò na: Boan okala na të badug mina. 5Abui dzam layi sò a dzoe dama, bò na: Ma mënë Kristus; bayi dug abui bod. 6Miayi wog mëfoe bitaṅ ai mëndum. Mikalëga, të miaku wòṅ. Amu nala wayean bòban, dzam da, së ki amana dili. 7Ayòṅ layi luman ai e di avòg, edzoe eluman ai e dzi evòg, zie yayi bi bod, si etigëdan a mëboda meziṅ. 8E mam mësë mala mënë hë mintye mi nkogolo. 9Eyòṅ te bayi kuan ai mina a mintye, bëwoe mina, mëyòṅ mësë mayi mina fëm asu dzoe dama. 10Abui bayi dzaṅ ekoa, bëkuan bò bò, bëfëman bò bò. 11Abog te abui bëprofet mëdugan bayi kodo a si, bëngadug abui bod. 12Asu abui minsëm di, ediṅ yayi mana abui bod a minnëm. 13E nyò ayi dzibi akui a mëmana, ayi kodeban. 14Abog te mbëmbë foe edzoe nyò ayi yëdan a si esë. Mëyòṅ mayi yen mbòòlan te. Abog te hm amana si layi bò.

Mintye minen

Mk 13,14-23; Lk 21,20-24

15Eyòṅ miayi yen e bidim bialod bidim biyenëṅan a tempel, anë profet Daniel angatil, e nyò alaṅ, awogo! 16Eyòṅ te, e bod ya Yudea bëtubu a minkol. 17E mod abëdë a ndil a yob abë bad sus akë nòṅ byem ya nda dzie, 18e nyò ki anë a afub abë dugan ai mvus n'akë nòṅ ewòman. 19Amala ai e bininga bënë mëbum, ai mindzidzie ya mëmos mëte. 20Kogëlan na, të mintubug mian miatoban ai abog ahëb ngë ki amos sabbat. 21Amu amala layi kui e kan yabëki kui akègè a mëtari më si azaa kui etoa dzi, a langa bad ki yënan nala#24,21 Da 12,1; Yoe 2,2. 22Ngë mëmos mëte mëbò të tsigëban etun, tò mod mbòg ayi ki kodeban. Asu e ba ya bëngatòban, ngò mëmos mëte mayi tsigëban nala. 23Eyòṅ te, ngë mod adzo ai mina na: Kristus nyò anë ha, ngë ali, të miayëbë. 24Abui bë Kristus mëdugan ai beprofet mëdugan bayi sò, bëbòò biyëṅ bi mam asu yë na, ngë atoa ebugbu, bëngadug tò e ba bëngatòban. 25Ndò hm dili matari mina beme. 26Ngë bëkad mina na: Anë a nkod-nnam, të miakë, bò ki na, anë a fud nnam ali, mibë yëbë. 27Amu e kan felfes yatye a nnam kidi ekui a nnam ngoge, nala ngò asò-lë mòn mod layi bò. 28Kë ndoe yakoan e hom mbim onë a?

Asò-lë mòn mod

Mk 13,24-27; Lk 21,25-28

29Etye etye, a mvus mindzug ya mëmos mëte, nlo-dzobo ayi ku dibi, ngòn tègè bad fyè, atitie angasulan#24,29 Is 13,10; 34,4; Yoe 2,10; Ag 2,6.21 a yob, ngul esë ya yob engatigëdan. 30Abog te hm ndëm mòn mod yayi yenëban a yob, abog te mëyòṅ mësë ya si mayi tòbò a mëlunga#24,30 Zak 12,10.12, bëngayen mòn mod azaa a minkut ya yob #24,30Dan 7,13. Profet Daniel ṅnyè abëlan ai ebug «mòn mod» eyòṅ osu. Yesus ayene na dzoe te ndò angabulu diṅ, alodo e moe ya bod bëvaa nyè. ai ngul, ai duma asë. 31Abog te ayi lom benglès boe ai mod tòṅ, abog te bayi koan e bod angatòb a mëbug më si mënyii#24,31 Zak 2,10 , akègè a abug yob di, akui e di avòg.

Nòṅan ayègè ai ele tòli

Mk 13,28-32.35; Lk 17,26-36. 21,29-33

32Nòṅan ayègè ai ele tòli. Eyòṅ kie yasòman dzò mingayëm na esëb entoa ya babi. 33Dzam dëda ai mina. Eyòṅ miayi yen e mam mësë ma, miyëmë na, antëlë ya a mbè. 34Makad mina bëbëla na, e ngongo bod nyi yayi ki lod, së na mam mëte mësë mëyënan. 35Yob ai si biayi lod, bibug biama biangalod ki.

Mod ayëyëm tò amos, tò awola

36Mfa amos te ai awola te, tò mod ziṅ ayëyëm; tò benglès ya yob, tò mòn, hë Tara etam. 37Dzam dëda anë a mëmos më Noe, nala ngò asò-le mòn mod layi bò. 38Amu, e kan bod bëngabë të mëmos mëte osusua mvëṅ endëgëlë, bëdzaa, bënyaa, fam elugu, bininga bëkëlë a mëlug, akui amos ya Noe anganyian a arka#24,38 Ab 7,7, 39bò ha të buni tò dzam, ndò mvëṅ endëgëlë engamana bò bëse ai si, nala ngò asò-lë mòn mod layi bò. 40Layi bò na, bod bëtoa bëbè a afub, mbòg anòṅëban, e nyò mbòg aligi. 41Bininga bëbè bëkoa fon, bënòṅò mbòg, e nyò mbòg aligi. 42Tòbëgan a ngomëzan, amu miayëyëm amos ya Nti waan ayi sò. 43Miayëm ki dò, amu ngë mod-dzal ayëmë awola ya wuwub wayi sò ai alu, ngë ayanga ana, te dzoge na bëbug nyè nda. 44Asu te, mina fë tòbëgan a ngomëzan, amu mòn mod ayi sò awola ya miabuni ki.

Mbëmbë mod bisye ai mbë mod bisye.

Lk 12,42-46

45Za anë mfëfëg ai mbëmbë mod bisye ya esya nti atele na abaala nyè akuma, avaa bod ya nda bidi a abog layean? 46Mvòm ai mod bisye te ya esya nti ayi sò kòb atoa a asu esye die. 47Makad mina bëbëla na ayi nyè tele nkala byem bie bisë. 48Ngë mbë mod bisye ahë kë dzo a nnëm woe na: Esya nti wama angënë oyab, 49akaè na ayit e bod bisye bëvòg, adzaa, anyaa fë ai bësòg mëyòg, 50esya nti mod te ayi sò amos ya abuni ki ai awola ya ayëm ki, 51abog te hm ayi nyè vë ngul endëgëlë, alom nyè mfa bod bë mvol bënë. Awe, hë miṅyon, hë Nladan mëkëg.

Currently Selected:

Mt 24: NTE12

Highlight

Copy