Lk 6

Bëyègè bakoe fes a amos sabbat

Mt 12,1-8; Mk 2,23-28

1Ndò angabò na, akëlë awulu a amos sabbat a afub, ndò bëyègè boe bëngawòndi fes, bëmana fig ai mò, bëngadi. 2Bëfarisea bëvòg bò na: Asu dze miabò e dzom enë eki a amos sabbat? 3Yesus nyè ai bò na#6,3Kòm esë, Yesus akaman ai e bod ya baloe na bënë bësëm minsëm.: Nga mingalaṅ e dzam David angabò eyòṅ angawog zie, nyè ai e bod bëngabë ai nyè esamba? 4Akyaè ya anganyian a nda Zamba, anòṅò bëmbaṅëla mëtunëṅa, angadi, avëë fë e bod bëngabë ai nyè esamba? Bëmbaṅëla bëte bënë eki të di, hë bëfada etam mbò badi bò! 5Nyè ai bò na: Mòn mod adzoe tò sabbat.

Yesus asye mod abëlë nkot enam

Mt 12,9-14; Mk 3,1-6

6A amos sabbat mfë, ndò anyian a nda bikoan, angayëgëlë. Mod ziṅan gabë hala, wò mbo-nnomo woe ongabë nkat. 7Bësaṅa bëkalara ai bëfarisea bëngabë bëfòmbògò nyè, kamëna ayi sye mod a sabbat, asu yë na bëyëm mbol basòman nyè. 8Nyè ayëmë të mintsogan miaban, ndò adzo ai e mod angabë abëlë nkot wò na: Kodogo a si, otëbë a zaṅ ha. Ndò angakodo a si, atëbë. 9Yesus nyè ai bò na: Masili mina na, dze mod ayean bò a amos sabbat, yë abe yë mbëṅ, yë anyii enyiṅ yë adzèè dzò? 10Ndò abëbë bò bësë, nyè ai e mod nyò na: Sama wò woe. Ndò angasam wò, wò odugan nyè bò mvoè. 11Bò bëdzie ai olun, bëngabui mëfëg bò bò mbol bayi bò ai Yesus.

Yesus atòb bë awom ai bëbè

Mt 10,1-4; Mk 3,13-19

12Mëlu mëte, ndò Yesus angakë a nkol na akogëlan, ndò angakogëlan ai Zamba nguma ntye alu. 13Eyòṅ amos ongabò, ndò angaloe bëyègè boe, ndò atòb awom ai bëbè abë bò, ndò ayole bò na apostel: 14Simun ya angayole na Petrus, ai Andreas manyaṅ woe, Yakobus ai Yohannes, Filip ai Bartolomeus, 15Mateus ai Tomas, ai Yakobus man Alfeus, ai e Simun bëloege na Zelot#6,15Zelot bëngabë nguma ekoan bod ya bëdzoo na bayean tsidan edzoe Roma a si Palestina a ngul mëkòṅ., 16Yudas man Yakobus ai Yudas Iskariot, ya angakuan ai nyè.

Yesus abò mod nkunda bod mvoè

Mt 4,23-25

17Ndò angasigi ai bò, atëbë a nkol a si; mod nkunda bëyègè boe ai abui bod ya Yudea osë ai Yerusalem ai a ntsag maṅ më Tir ai Sidon antoa ha. 18Bëngasò na bazu nyè vogolo ai na basyeban akòn daban. E ba bësë bëbe minsisim bëngabë ndëgëlë bëngasyeban, 19nkunda osë ongayi na bënamba nyè, amu ngul engabë ekui nyè a nyòl, esye bësë.

Yesus atam bod mvoè, akubu fë amala

Mt 5,1-12

20Ndò angabede mis a yob mfa bëyègè boe bëngabë, nyè na:

Bësòmbòg, mina mimbubua,

Amu edzoe Zamba yawoge ai mina.

21Bësòmbòg, e mina miawu zie etoa dzi,

Amu miayi dzie.

Bësòmbòg, e mina ya miayon etoa dzi,

Amu miayi woe.

22Mina bësòmbòg, eyòṅ bod basiṅ mina, bëtimiṅi mina, bëkòṅan ai mina, bëkiligi dzoe dan etòm

mòn mod hë anë anë mbë dzam. 23Fonan amos te, mitaag, amu maan man mënë abui a yob. Amu

nala ngò fë bëngabëlan ai bëprofèt.

24Amala ai mina ya mibëlë akuma,

Amu mimbëlë ya maan man.

25Amala ai mina ya minada etoa dzi,

Amu miayi wog zie.

Amala ai mina ya miawoe etoa dzi,

Amu miayi tòbò a mëyëb, ndò fë miayi yon.

26Amala ai mina ngë bod bësë balaṅ mina e mam mënë mbëṅ.

Amu nala ngò besya baban bëngabëlan ai bëprofèt mëdugan.

Odiṅi minziziṅ mie

Mt 5,38-48. 7,12

27Ndò hm, e mina ya miavogolo ma, makad mina na: Diṅan minziziṅ mian, boan e bod basiṅ mina mbëṅ, 28vaagan e ba bakag mina mëtè, kogëlan asu e ba batè mina. 29Lëdëgë e mod abimi wa amaṅ da edi avòg, të wakaman ai e mod afadi wa eyie ewòman. 30Vaa e nyò adzaè wa; të wa dali abë e nyò afadi endzoe. 31E kan miayi na bod bëbò mina, eyë fë mina boan bò nala. 32Ndò hm, ngë miadiṅ e ba badiṅ mina, za akyaè maa mibëlë ete? Amu bësëm minsëm badiṅ e bod badiṅ bò. 33Amu, ngë miabò mbëṅ hë e bod babò mina mbëṅ, za maa anë mina ete? Bësëm minsëm bò babò fë nala. 34Ngë miakole e bod miafidi na bayi mina dugan, za maa anë mina ete? Bësëm minsëm bakole e bësëm bëvòg asu yë na bëdugan nòṅ byem biaban. 35Ndò hm, diṅan minziziṅ mian, boan mbëṅ, mikolëge, të fidi dzom efë. Eyòṅ te maan man mayi bò abui, miayi bò bòn bë e nyò ya yob ete, amu anë afu-nnëm ai e bod bë ngèt ai bëbe. 36Boan ngòl anë esoa anë ngòl.

Atsig e bod bëvòg ntol

Mt 7,1-5

37Ndò fë të miatsig ntol, abog te bayi ki mina tsig ntol. Të miakpèè bod a mëdzo, abog te bayi ki mina kpèè a mëdzo. Dzuan, abog te bayi mina dzu. 38Vaan, abog te bayi mina vë. Mbëmbë abom, atoa ṅsëgëzan, ṅyinan, asoege a si, ṅnyè bayi mina vë a mò. Amu e kan miayi vëg ndzò fë bayi mina vëg. 39Ndò aku bò nkana na: Yë ndindim onë dzam lëdë ndidim mbòg zen? Nga bò bësë bëbè bayi ku a ebe? 40Ṅyègè alod ki ṅyëgëlë woe. 41Dze wabëbë ekani enë manyòṅ a dis, të yen mboṅ onë wamen a dis? 42Eyë onë dzam dzo ai manyòṅ ya na: A madzaṅ, dzoge mëvaè wa ekani enë wa a dis, wa të yen mboṅ onë wamen a dis? A mvomvol mod, tarigi vaè mboṅ onë wa a dis, abog te hm otoan yen anë wavaè ekani enë manyòṅ a dis.

Bayëm ele a bibuma bie

Mt 7,17-20. 12,34-35

43Mbëmbë ele ziṅ asëki dzam wum mbë ebuma, ngë ki na mbë ele awum mbëmbë ebuma. 44Amu ele esë yayëmban a ebuma dzie. Amu bakad ki tòb sa a ele biyò a si, ngë ki na bibuma bi wayn a biyò bi asas. 45Mbëmbë mod awum hë abëṅ a nnëm woe, ndò fë mbë mod awum abe a nnëm woe. Amu anyu lakòbò hë abui mam anë mod a nnëm.

Tin mimfim kan ebè

Mt 7,24-27

46Dze ben mialòṅ ma na a Nti, a Nti, dzam da mina të bò e mam madzo? 47E mod osë azu abë ma, awogo bibug biama, abò fë biè, mazu mina lëdë e kan mod afulan ai nyè. 48Anë anë e mod aloṅo nda, ndò angafag, adugan fag, asò sum mëndie a nkom. Ndò ndon engasò, biyëyëg bidzimbi e nda nyi, tègè dzò dzam suguzu, mbol engabë nloṅan mbëṅ. 49E nyò ki awog, të bò e mam madzo, anë anë e mod angaloṅ nda a si tègè ai mfaṅ nkom a si; eyòṅ biyëyëg biadzimbi dzò, eku fò a si; ndò nkuan nda te yaku wayi bò mfaṅ nkuan.

Currently Selected:

Lk 6: NTE12

Highlight

Copy