Lk 5

Yesus aloe e bëyègè bë osu

Mt 4,18-22; Mk 1,16-20

1Ntye bod bëvudu nyè edinga a nyòl ha, bëvogolo ebug Zamba, nyè angabë atëlë a ntsag maṅ më Genesaret, 2ndò ayen bifunga bibè babi ai kindig maṅ. Bëlòb bë kòs bëngasus ete bëngasob mvunda. 3Ndò abed a efunga dzia, e dzi Simun, nyè ai nyè na akë ai nyè man ntye ai nkot si, ndò atòbò a si, angayëgëlë minkunda, atoa a efunga. 4Amana angamana kòbò, nyè ai Simun na: Këlë mfa onë edòg, owoa mvunda dzan na obi kòs. 5Simun nyè na: A ṅyëgëlë, biwu esye nguma alu të bi dzom. Dzam da mayi woa mvunda mbol okòbò. 6A bëbò nala, ndò babi eyëgan abui kòs, mvunda engayi nyabi. 7Ndò baloe bëmoe baban ya efunga evòg na bëzu bò vòli; ndò bëngasò, bëdzala bifunga bisë bibè, bingayi yimbi. 8Simun Petrus angayi yen nala, ndò aku Yesus a mëbòṅ a si, nyè na: Kodogo të e hom mënë, a Nti, amu mënë nsëmë minsëm. 9Amu wòṅ ongabi nyè ai e ba bësë bëngabë ai nyè asu abui nlòb kòs bëngalòb hi, 10Yakob ai Yohannes, bòn bë Zebede a bëngabë fufulu ai Simun bò fë bëngakòn wòṅ nala. Yesus nyè ai Simun na, obë mbara. Akègè etoa dzi, bod mbò wayi lòb. 11Ndò bëngasò ai efunga a kindig, bëdzoge byem bisë, bëngabie nyè.

Yesus abò nzëzam mvoè

Mt 8,1-4; Mk 1,40-45

12Ndò labò na, atoa a tisòn ziṅ ha, mod antoa hala, zam ai nyòl esë. E mod nyò angayi yen Yesus, ndò aku, aluu asu a si, angakogëlan ai nyè, nyè na: A Nti, ngë wadiṅ, onë ma dzam fubu. 13Ndò Yesus asam wò, anamba nyè, nyè na: Owe, mayi nala, bò mfuban. Etye te, ndò zam engakodo nyè a nyòl. 14Ndò atëbëlë nyè na: Të wakad mod, dzam da këlë lëdë wamen abë fada, otuni fë akyaè ya Moses angabende asu mfuban woe, asu yë na bod bëbi mbòòlan. 15Foe engakë yatsaman asu die, abui minkunda angazu na bazu wog, ai na bësyeban akòn daban. 16Mfa woe, ndò atub a fëfël, e hom onë a yaaṅ, angakogëlan.

Yesus abò mbombog mvoè

Mt 9,1-8; Mk 2,1-12

17Ndò labò na, amos ziṅ, Yesus ayëgëlë, bëfarisea ai bëyëgëlë bë mvende ya bëngakë basò a nkòṅ nnam Galilea osë ai Yudea bëtoa. Ngul Zamba engatindi nyè na asye bod. 18Bod bëmbëgë mbombog a ondanga, bëngadzëṅ na banyian ai nyè, bëboe nyè nyè osu. 19Mbol tègè ai afola ya alod ai nyè a nkunda ete ha, ndò babed a ndil a yob, bëngasuu nyè a ndil a zaṅ ha ai ondanga woe osu Yesus. 20Ndò ayen ṅyëbë waban, nyè na: a mod, minsëm mie midzuban ya wa. 21Bësaṅa bëkalara ai bëfarisea bëkèè hm na balaṅëdan, bò na: Za abèan Zamba nyò? Za anë dzam vaè minsëm ngë së ki Zamba etam? 22Mbol Yesus angayen minlaṅëdan miaban, nyè ai bò na: Dze miakë mialaṅëdan a minnëm mian? 23Dze enë ebugbu abui, yë adzo na: minsëm mie mihaban wa, yë adzo na: Kodogo a si, owulu? 24Ndò hm, asu yë na miyëm na mòn mod abëlë ngul ya avaè minsëm a si, nyè ai mbombog na: Wa madzo ai nyè, tëbëgë, onòṅ ondanga woe, okë a nda dzoe. 25Ndò atëbë etye te a mis maban, anòṅò e dzom ambë boo ete, akëlë a nda dzie, akë ataman Zamba. 26Bod bësë bëkuu fò ayaa, bëngalugu Zamba, wòṅ odzie bò a nyòl, bò na: biyen eyëṅ dzam ana.

Yesus aloe Levi

Mt 9,9-13; Mk 2,13-17

27A mvus hala, ndò akui, ayënë ṅnòṅò ntòlò dzoe na Levi atoa a nda toya, nyè ai nyè na: byege ma. 28Ndò alig byem bisë, akodo a si, angatoṅ nyè. 29Ndò Levi angabò nyè mod afaṅ a nda dzie, abui bod ya bënòṅò bë toya ai bod bëfë bëtoa ai nyè ha. 30Bëfarisea ai bësaṅa bëkalara baban bënganyiṅ, bò ai bëyègè boe na: Asu dze miadi, minyaa fë fufulu ai bënòṅò bë toya ai bësëm? 31Yesus nyè ai bò na: E bod bënë mvoè bayaṅan ki ai mbëbala, minkokòn mmiè miayaṅan ai mbëbala. 32Mandzëki sòṅ na maloe bësosoo, mëngazu loe bësëm na bëvëṅan.

Adzo eki bidi ai mënyu

Mt 9,14-17; Mk 2,18-22

33Bò ai nyè na: Bëyègè bë Yohannes bafëm ki bidi, ndò fë bakogëlan fufulu; tò fë bëyègè bëfarisea babò nala, dzam da emboe badi, bënyaa. 34Yesus nyè ai bò na: Dze yë miayi bò na bëlëdë bë nlugu bëki bidi ntye nlugu anë ai bò nga? 35Mëmos mazu, a bayi bò nòṅ nlugu waban, eyòṅ te bayi ki bidi a mëmos mëte. 36Ndò aku bò nkana na: Mod ziṅ asëki dzam tsig abaag ya mkpamaṅ eyie, afudi dò a nnomo eyie; ngë ahë bò dò, mkpamaṅ eyie wayi nyabi, abaag ya mkpamaṅ eyie të yëan ai nnomo. 37Ndò fë mod ziṅ asë ki dzam soe mimkpamaṅ mëyòg a minnom mëndëg. Ngë ahë bò nala, mimkpamaṅ mëyòg miayi boe mëndëg, mëyòg mësoeban a si, ndëg endaman. 38Dzam da, bayean fudi mimkpamaṅ mëyòg a mimkpamaṅ mëndëg. 39E mod anyu ya e mëyòg mënë nnom ayi ki na anyu e ma mënë mimkpamaṅ. Amu adzo na, e ma mënë nnomo mënë mbëṅ.

Currently Selected:

Lk 5: NTE12

Highlight

Copy