Yoh 14

Yesus anë e zen yakë abë Tara

1Të nnëm wakòbò mina a abum abui. Yëbëgan Zamba, yëbëgan fë ma. 2Mëdzogëbo mënë abui a nda tara. Ngë tègè ai nala, yë ngë makad mina na makë mina komëzan etoa? 3Layi bò na: eyòṅ mëkë ya nala, mëkomëzan mina etoa, mayi dugan sò, mënòṅò mina abë ma, asu yë na, e hom ya mënë, mina mitobò fë ete. 4Ndò fë, e hom makë, miayëm zen ya ete. 5Tomas nyè ai nyè na: A Nti, biayëm ki mfag wakë. Eyë binë dzam yëm zen ya? 6Yesus nyè ai nyè na: Ma mënë zen, mëtoa bëbëla, mëtoa enyiṅ. Mod ziṅ azu ki abë Tara së na alod abë ma. 7Ngë miayëm ma, miayëm hm fë Tara. Akèègè etoa dzi, miayëm nyè, ndò fë mingayen ya nyè. 8Filip nyè ai nyè na: A Nti, lëdëgë bia esoa, nala wayean ai bia. 9Yesus nyè ai nyè na: Dze yë mëtòbò ya ai mina abog asë di, wa tègè ma yëm nga, a Filip? E nyò ayen ya ma, ayen ya fë Tara; Asu dze wadzo na, lëdëgë bia esoa? 10Dze yë wayëbë ki na mënë abë Tara, Tara atoa abë ma? E bibug makad mina, makòbò ki biè ai mamen; e Tara atoa abë ma abò esye dzie. 11Yëbëgan ma na mënë abë Tara, Tara atoa abë ma. Ngë miayëbë ki nala, yëbëgan hm të hë asu e mimboan mi. 12Bëbëla emen, makad mina: e mod ayëbë ma, ayi bò e mimboan mabò mi, abò fë alodo nala, amu makë abë Tara. 13Ndò e dzi miayi dzaè a dzoe dama, mayi dò bò, asu yë na Tara avëëban olugu abë mòn. 14Ngë midzaè ma dzom ziṅ a dzoe dama, mayi dzò bò.

Yesus akag bëyègè boe Mfufub Nsisim

15Ngë miadiṅ ma, miayi baala mëmvende mama. 16Mayi hm dzaè Tara, alomo mina nkè mfë, asu yë na atòbò ai mina kole, 17nsisim bëbëla, a si-ndon yasëki dzam nòṅ, amu yayen ki nyè, të nyè yëm. Mina miayëm nyè, amu alaṅan abë mina, ndò fë ayi tòbò ai mina. 18Malig ki mina nyui, mazu abë mina. 19Hë man eban, si-ndon tègè ma bad yen; mfag waan, miayi ma yen, amu manyiṅ, ndò fë miayi nyiṅ. 20Amos te, miayi yëm na mënë abë Tara, mina abë ma, ma fë abë mina. 21E nyò abëlë mëmvende mama, abaala fë mò, e nyòlò te ṅnyè adiṅ ma. E nyò hm adiṅ ma, Tara ayi nyè diṅ, ma mayi fë nyè diṅ, ndò fë mayi nyè kulan mamen. 22Yudas, -së ki man Iskariot- nyè na: A Nti, dze etam bò a wayi na wakulan wamen hë abë bia, të kulan a si-ndon? 23Yesus nyè ai nyè na: Ngë mod ziṅ adiṅ ma, ayi baala ebug dzama, ndò Tara ayi nyè diṅ, ndò biayi sò abë nyè, bikomo etoa abë nyè. 24E nyò adiṅ ki ma, abaala ki bibug biama. Ndò hm fë, ebug miawog esëki endzama, enë ebug e Tara angalom ma. 25Mëngakad mina e mam ma mëtoa abë mina. 26Mfag nkè, Mfufub Nsisim, e nyò Tara ayi lom a dzoe dama, ayi mina yëgëlë bisë, adugan mina baala e ma mësë mëngakad mina. 27Malig ai mina mvoè, mavë mina mvoè dzama; mavë ki mina akyaè ya si-ndon yavë. Nnëm obë mina sigan a abum, mibë kòn wòṅ. 28Miawog anë makad mina na: Makë, ndò fë mazu abë mina. Ngë midiṅi ma, ngë miafon na makë abë tara, amu Tara alod ma. 29Ndò hm, etoa dzi, makad mina osusua yë na nala wayënan, asu yë na, eyòṅ layi bòban, miyëbë. 30Mayi ki mina bad kad abui mam, amu ndzoe si-ndon azu. Abëlë ki ngul a nyòl dzama. 31Dzam da, asu yë na si-ndon eyëm na madiṅ Tara, ai na mabò e dzi Tara angabende ma: Tëbëgan, nkodan va.

Currently Selected:

Yoh 14: NTE12

Highlight

Copy