Yoh 13

Yesus asob bëyègè boe mëkol

1Osusua abog Paska, mbol Yesus ayëmë na awola die asò ya na akodo e si nyi, adugan abë esya, mbol angadiṅ emboe ya bëngabë a si-ndon, ndò angadiṅ fò bò akui a mëmana. 2Abog bidi bi ngoge, hala Satan anyian ya Yudas man Simun Iskariot a nnëm na akuan ai nyè, 3mbol ayëmë na esya angavë nyè dzom esë a mò, ai na angasò abë Zamba, ndò fë adugan abë Zamba, 4a bëdzaa ha, ndò atëbë, asòdi biwòman, anòṅò etun eyie, atindi a angëdëg. 5Ndò asoe mëndim a basin, akaè na asob bëyègè mëkol#13,5Yesus ayëgëlë bëyègè boe fulu edzòdi-nyòl., angafimi mò ai etun eyie engabë etii nyè a angëdëg. 6Ndò azu abë Simun Petrus. Petrus nyè ai nyè na: A Nti, dze yë wayi ma sob mëkol? 7Yesus nyè ai nyè na: E dzam mabò di, wawog ki dò etoa dzi, wayiyi yëm a mvus hala. 8Petrus nyè ai nyè na: waangâsob ki ma mëkol tò eyòṅ. Yesus nyè ai nyè na: Ngë mandzëki wa sob mëkol, wabëlë ki ngab ai ma. 9Simun Petrus nyè ai nyè na: A Nti, së a hm ki hë mëkol etam, sobo fë tò mò ai nlo. 10Yesus nyè ai nyè na: E mod awòbò ya ayaṅan ki ai mëwòbò, ayaṅan hë ai nsoban mëkol, amu anë mfuban mfuban. Ndò fë mina minë mfuban; së hm ki mina bësë. 11Amu angabë ayëmë e mod ayii kuan ai nyè. Asu te angakad na së ki mina bësë minë mfuban. 12Eyòṅ hm angamana bò sob mëkol, ndò adugan bòd biyie bie, adugan kom etoa, nyè ai bò na: Yë miayëm e dzam mëbò mina di? 13Mialoe ma na: ṅyëgele ai Nti; miabò fò mbëṅ, amu anë nala. 14Ndò hm, ngë e ma ya mënë ṅyëgele ai Nti, mëhë sob mina mëkol, mina fë miayean soban mina mina mëkol. 15Amu mëvë mina mvulna asu yë na, e kan mëhë bò, mina fë mibò nala. 16Makad mina bëbëla na: Olò walod ki nti woe, ndò fë mod minloman alod ki e nyò alom nyè. 17Ngë miayëm e mam ma, minë mvòm ngë miabò mò. 18Makòbò ki ai mina bësë. Mayëm e ba mëngatòb; Dzam da, asu yë na Ntilan odzalëban na: E mod adi bidi biama, abede ma etindi dzie a nyòl#13,18Sal.41,9. 19Etoa dzi, makad mina osusua yë na labòban, asu yë na, eyòṅ layi bòban, miyëm na mënë. 20Makad mina bëbëla na, e mod abëlan ai e nyò malom, ma abëlan ai nyè; e nyò hm abëlan ai ma, abëlan ai e nyò angalom ma.

Yesus adzo na bayi kuan ai nyè

Mt 26,20-25; Mk 14,17-21; Lk 22,21-23

21Akòbò Yesus angakòbò nala, ndò nnëm wasigan nyè a abum ete, nyè na: Bëbëla emen, makad mina na, mbòg ya abë mina ayi kuan ai ma. 22Bëyègè bëngabëban bò bò, bò të yëm e mod adzo ai nyè. 23Mbòg ya bëyègè angabë ayëgë Yesus a toe, ṅnyè Yesus adiṅi. 24Simun Petrus abòò nyè ndëm ai nlo, na asili nyè e mod adzo ai nyè. 25Ndò atoan yëm etoa a toe Yesus, nyè ai nyè na: A Nti, za? 26Yesus nyè na: E nyò mayi vë etun mbaṅëla ya mayi du a bidi. Ndò adu etun mbaṅëla a bidi, anòṅò, avëë Yudas, man Simun Iskariot. 27A mvus etun mbaṅëla dzi, ndò Satan anyian nyè a nyòl. Yesus nyè ai nyè na: Vologo bò e dzam wayean bò. 28E bod bëngabë ai nyè a bidi ha, tò mbòg të yëm e dzam adzoo ai nyè. 29Bëvòg bëdzoo na, mbol Yudas angabë abëlë nkòb mòni, ndò Yesus adzo ai nyè na: Kusu e byem biayaṅan ai biè asu abog, ngë ki na: Vaa mimbubua dzom ziṅ. 30Anòṅan ganòṅ etun mbaṅëla, ndò akë a nsëṅ. Së alu lëvini ha.

Mkpamaṅ mvende

31Eyòṅ angakui, Yesus nyè na: Eyòṅ dzi, mòn mod avëëban ya olugu, ndò fë Zamba avëëban ya olugu abë nyè. 32Ngë Zamba avëëban ya olugu abë nyè, Zamba ayi nyè vë olugu abë nyè emen, avë fë nyè olugu etye etye. 33A bòngò, mëngëne ai mina etun abog. Miayi ma dzëṅ, ndò e kan mëngadzo ai Yuden na: E hom makë, miasëki dzam kë, nala ngò madzo ai mina etoa dzi. 34Mavë mina mkpamaṅ mvende, na midiṅan mina mina, akyaè ya mëngadiṅ mina, asu yë na mina midiṅan fë mina mina. 35Eyë bësë bayi yëm na minë bëyègè bama ete, ngë mibëlë ediṅ asu mina mina.

Yesus adzo ai Petrus na ayi nyè sie

Mt 26,31-35; Mk 14,27-31; Lk 22,31-34

36Simun Petrus nyè ai nyè na: A Nti, eyë wakë ve? Yesus nyè ai nyè na: Wasëki ma dzam bie e hom makë etoa dzi. Wayi ma bie a mvus. 37Petrus nyè ai nyè na: Asu dze masëki wa dzam bie etoa dzi? Mayi vë enyiṅ dzama asu doe! 38Yesus nyè na: Wadzo na wayi vë enyiṅ dzoe asu dama a? Ndò makad wa di na: Nnom kub ayi ki lòṅan a, së na osie ma biyòṅ bilè.

Currently Selected:

Yoh 13: NTE12

Highlight

Copy