Yoh 15

Yesus anë bëbëla ele wayn

1Ma mënë bëbëla ele wayn, Tara nyè anë nkoe. 2Ntëm osë ya abë ma, a wawum ki ebuma, atsig wò, ndò fë ntëm osë wawum ebuma, atone wò asu yë na obuli wum bibuma. 3Mintoa ya mfuban, etòm ebug mëngakad mina. 4Laṅan abë ma, ma fë abë mina. Akyaè ya ntëm wasëki dzam wum ebuma ai oben ngë walaṅan ki ai ele wayn, nala fë ai mina, ngë miandzëki tòbò abë ma. 5Ma mënë ele wayn, mina ki mintëm. E nyò alaṅan abë ma, ma fë abë nyè, awum abui bibuma, amu tègè ai ma, miasëki dzam bò dzom. 6Ngë mod ziṅ nyòlò atòbò ki abë ma, awoaban a nsëṅ anë ntëm, amana kod, bëngakoan miè, bëwoa a ndoan, engadig. 7Ngë mitòbò abë ma, bibug biama bitòbò abë mina, dzagan e dzi miayaṅan ai dzò, eyòṅ te yayi yenan ai mina. 8Tara avëëban olugu asu yë na miwum abui bibuma, mibò fë bëyègë bama. 9Akyaè ya Tara angadiṅ ma, nala ngò fë mëngadiṅ mina. Laṅan a ediṅ dzama. 10Ngë mibaala mëmvende mama, miayi laṅan a ediṅ dzama, anë mëngabaala mëmvende më Tara, ndò mëtoa a ediṅ dzie. 11Makad mina e mam ma asu yë na mintag miama mitòbò abë mina, ai na mintag mian mibò ntud. 12Mvende dzama enë na midiṅan mina mina anë mëngadiṅ mina. 13Mod ziṅ abëlë ki ediṅ a lodo e dzi na mod avë enyiṅ dzie asu bëmvoe boe. 14Mina minë bëmvoe bama ngë miabò e mam mabende mina. 15Maloe ki fë mina na bëlò, amu olò wayëgan e dzi nti woe abò. Maloe mina na bëmvoe amu mabò na miyëm e dzi esë ya mëngawog abë tara. 16Së ki mina mingatòb ma, ma mëngatòb mina, ndò mëngatele mina na mikë, miwum bibuma, bibuma bian bilaṅan, asu yë na e dzi esë miadzaè Tara a dzoe dama, avë mina. 17Mabende mina na midiṅan mina mina.

Ziṅ ya si-ndon

18Ngë si-ndon yafëm mina, yëman na engatari ya ma fëm. 19Ngë miwoge ai si-ndon, ngë si-ndon yadiṅ endzie. Mbol hm miawoge ki ai si-ndon, ndò mëngatòb mina, asu te si-ndon yafëm mina. 20Tsogan ebug mëngakad mina: olò walod ki nti woe. Ngë bëngasiṅ ma, ba bayi mina siṅ. Ngë bëbaala ebug dzama bayi baala endzaan. 21Ndò bayi mina bò e mam mësë mala etòm dzoe dama, amu bayëm ki e nyò angalom ma. 22Ngë mëbò të sò, mëkòbò ai bò, ngë babëlë ki nsëm. Ndò hm, babëlë ki edzuga ziṅ asu minsëm miaban. 23E nyò asiṅ ma, asiṅ fë Tara. 24Ngë mëbò të bò mimboan ya mod mfë abë ya ki bò, ngë babëlë ki nsëm. Ndò hm, bò bëngayen, bësiṅi ai mamen, ai Tara. 25Dzam da, asu yë na ebug ya mvende dzaban edzalëban na: Bëngasiṅ ma a zëzë#15,25Sal.35,19. 69,4.. 26Eyòṅ nkè ya mayi mina lom abë tara ayi sò, nsisim bëbëla ya wayi sò abë tara, e nyòlò te ayi ma bòòlò. 27Ndò fë mina miayi bòòlò, amu mingabë ai ma atarigi a mëtari.

Currently Selected:

Yoh 15: NTE12

Highlight

Copy