Jako 3

Bälai tea pä-üng saite phüng

1Kai üng yng saite kangby jä-ai na ä, nang ce thung üng khimi äje cäcaw xyngtä lä kangkawng thung-a särae na lawng hethang sa ö hang. Ätephüng-a mei nädylä, Säthaw lä mätu saite kai ce tea khimi kälang na qawng-a cang y, dengpyky vi ai näte nang ce lä mäny ö te vi. 2Mä-ai angxynlyng na lä tämang saite cawngkhang na sa ö te vi. Älo hai thui tämang y saite khimi dylä cungrü te vi. Äni lä äma üng ätabung angxynlyng na tea aeküng haw te vi. 3Mä-ai lä cäphö üng täbawng thung-a süng cäpi byng khai kha ruinawng hai sätawng ea mä-ai üng lo tea tängai hai kha ly hethang ngai saite mang-a ly hai haw ö te vi. 4Tui sangphaw käleng pui na lä aelipui na üng aethaw hai-a ly ö te vi. Sangphaw tea lä ta cäpi hai-a ly hethang ngai saite mang-a sangphaw bähawi saite kung ma mäqa te vi. 5Hini kätyng bälai lä mä-ai ätabung üng cäpi saite kaepreng haetä vi.

Tungaila äni lä äma tea tengxyng y aethaw haw te vi. Mai di cäpi lä aetö käleng pui tea kang haw vi näte aedawng haile ö. 6Khimi üng bälai lä mai kätyng vi. Mä-ai üng ätabung kaepreng thung-a bälai lä haidae käsi awng te vi. Honi bälai lä khimi angxynlyng na tea käsi na sa haw te vi. Honi lä maipui angrawng üng tho saite mai hai-a mä-ai üng hing saite angxynlyng na tea kang hai haw te vi. 7Mä-ai khimi lä tawngbawi amäjy cawngkhang na, tävaw na, kaw-va saite na hai tui thung üng mawi na tea änawng hawi rung te khytä sa haw jawjaw ö te vi. 8Tungaila bälai tea lä ämi lawngtä la änawng hawi rung khytä sa haw ö te y. Bälai lä äce kawi kha käsi sa jawjaw te vi. 9Mä-ai lä mä-ai üng Pä-ai hai Areng tea bälai hai bälaw kha Säthaw üng ämaw äcae kätyng sa saite khimi na tea lä täking ö te by vi. 10Täbawng haetä üng bälaw saite hai täking saite lo tho mei te vi. Kai üng yng saite kangby jä-ai na ä, hini kätyng mä-ai lä sa ö vi hang si. 11Vawcawng haetä üng tui kätui hai tui kälung tho mei haw mei. 12Kai üng yng saite kangby jä-ai na ä, thaidö kung-a lä olive äthai aethai haw mei. Cäpje kung-a thaidö thai aethai haw mei. Honi kätyng tui kälung tho saite vawcawng hai tui kätui lä tho haw y lyng.

Säthaw üng bälunghae saite

13Nang ce thung-a bälunghae saite lä ämi mei. Mänykaw saite lä ämi mei. Nang ce lä hawi saite kähing hai mätü hethang kae. Nang ce lä aemäneng kha hawi saite kälu na hai bälunghae saite mätü ö. 14Tungaila nang ce üng bälung thung-a tengxyng y pä-e saite, ae-aw saite na awng kha “kai lä bälunghae te vi” näkha thui te hai nang ma ce tea aethaw ö hang. Nang ce lä kaeling kaemae thui kha lo mitang thui ö te vi. 15Hokä bälunghae saite lä Säthaw te üng tho te y. Säthaw üng Muilaw lä mä-ai tea hini kätyng bälunghae hai te y vi. Honi bälunghae hai saite lä älawngpre hai aesui kha Setan angra te üng tho te kae. 16Ätephüng-a mei nädylä, pä-e saite, ae-aw saite bälung na awng dylä xhuxa saite awng haw te vi. Khimi ce lä käsi cawngkhang na sa ö te vi. 17Tungaila Säthaw te üng tho saite bälung kähae lä angcüky-a cai te vi. Honi lä awngneng saite, bälung hawi saite, khimi kälang na tähang aedawng kaw pa saite, bäheng saite hai kälu kähawi sa saite na vi. Honi lä khimi ce üng mimai kheng te hai käjüng sa te awng y. 18Khimi kälang na aede hai hethang sa saite na lä awngneng saite üng ämöti hi te khimi na kätyng vi. Äni ce lä cüng saite üng äthai na tea ae ö vi ai.

Currently Selected:

Jako 3: cekNT

Highlight

Copy