Jako 2

Khimi üng mimai kheng y hethang sädi py saite

1Kai üng kangby jä-ai na ä, nang ce lä phung-ang aesang saite mä-ai üng Areng Isu Khrista tea yng te phüng-a ämi üng mimai tea la kheng ö hang. 2Sui kösübü aecö kha kä-o ävang käting na hai aelawng saite khimi lawngtä lä nang ce üng aecö saite mityng-a kung vi nämai si. Mätang kha kä-o nitha kangrüng aena saite khimi lawngtä la kung te by vi. 3Nang ce ma kä-o ävang käting na aelawng saite khimi tea tämö khai te hai, “Hawi saite mityng hi-a aety lawi” näkha nang ce lä thui te vi nämai si. Tungaila nang ce ma khimi kangtang tea lä, “Nang lä honi mityng-a aedaw. Y dylä kai üng khokung-a aety” näkha thui nämai si. 4Hini kätyng nang ce sa dylä, khimi ce üng mimai tea kheng te y mei. Nang ce lä käsi na dawng saite tärae cei kung-a lawng ö te vi dy.

5Kai üng bälung aevaw saite kangby jä-ai na ä, tängai ö! Säthaw lä hini älawngpre-a khimi kangtang na bung re te vi. Äni ce lä Isu tea yng te phüng-a, tätang tawngnang saite na vi. Säthaw lä äma tea bälung aevaw saite khimi na tea lä äma üng pre py hethang älo aedo te kätyng khimi kangtang na tea äma üng pre dang te thung-a qa hai ö te vi. 6Tungaila nang ce lä khimi kangtang na tea mäthi ö te y vi. Nang ce bung sakälö khü kha tärae cei te mityng-a nähai prae saite na lä khimi tawngnang saite na ö y mei. 7Äni ce lä nang ce hai aesui saite Isu Khrista üng ämüng kähawi tea käsi thui ö te y mei.

8Caekäcai thung-a awng saite lengky saite Sanphrang Säthaw üng Ubädi-a, “Nang ma tea nang ma bälung aevaw te kätyng nang üng kangby jä-ai tea bälung aevaw hethang kae” näkha thui te vi. Honi Ubädi tea nang ce tängai tätang dylä hawiky ö te vi. 9Tungaila nang ce lä khimi ce üng mimai kheng dylä, hunghö sa ö te vi. Säthaw üng Ubädi lä nang ce tea hui y saite khimi na kätyng mäthi ö te vi. 10Khimi lawngtä lä Ubädi angxynlyng na tea tängai kha särilo haetä tea sa tämang dylä, äni lä Säthaw üng maw-a Ubädi angxynlyng na tea sa tämang te kätyng vi dy. 11“Khimi lawngtä lä khimi kälang lawng lawngtä üng nawngpui tea y dylä nawngpaw tea täkübäjang sa hang” näkha thui te Areng lä, “Khimi bung bädü hang” näkha la thui te by vi. Tukätephüng-a nang ce lä khimi lawng lawngtä üng nawngpui y dylä nawngpaw hai täkübäjang sa y ngaila, khimi tea bädü dylä, nang ce lä Ubädi angxynlyng na tea sa tämang ö te vi dy. 12Khimi ce tea aelawi hai saite Ubädi kätyng nang ce lä Säthaw ma tärae cei saite khimi na kätyng älo aepe kha sa ö ba. 13Khimi lawngtä lä äma üng kangby jä-ai na tea bäheng y dylä, Säthaw ma tärae cei te kätü-a, äni tea la bäheng y by ai. Bäheng saite lä tärae cei saite qawng-a haidae awngky te vi.

Yng saite hai kälu sa saite

14Yng saite kangby jä-ai na ä, khimi lawngtä lä yng näkha thui ea hawi saite kälu na sa y dylä, honi lä äma tähang ävang ting te y vi. Hini kätyng yng saite lä äma tea aeqang haw y lyng. 15Nang ce kangby jä-ai na thung üng lawngtä lä käni qütä ca nei hethang hai aekhu aena hethang awng y näkha thui ö vi nämai si. 16Äni tea nang ce lä, “Kawng bärai te hai ma ly lawi. Bi üng-a awng kha äjo kawi hethang ca lawi” näkha thui ngaila, nang ce lä äni tähang aely ngai saite na tea py y dylä, äte la ävang ting te y vi. 17Honi kätyng Isu Khrista tea yng ngaila, hawi saite kälu na sa y dylä, yng saite lä kädü kae vi.

18Tungaila khimi lawngtä ma, “Nang lä yng saite awng vi. Kai lä hawi saite kälu sa vi. Tudylä nang lä hawi saite kälu sa y käla nang üng yng saite kai tea mätü lawi. Kai lä kälu kähawi na sa te hai-a kai üng yng saite nang ce tea mätü ai” näkha thui he awng vi. 19Nang ce lä Säthaw lawngtä xyng awng näkha yng ö te vi. Hini lä hawi vi. Tungaila angra na mäteng ma yng kha ri te hai-a käsawtho ö te by vi. 20Nang ce lä kangthö na vi. Khimi lawngtä lä Säthaw tea yng kha hawi saite kälu sa y dylä, ävang ting te y vi näte kai ma nang ce tea mätü ai mei. 21Mä-ai üng kangsi Abraham üng phüng tea aedawng ö lawi. Äni tea Säthaw lä khimi käcüng-a mäthi te lä äni üng kälu phüng-a vi. Abraham lä äma üng cäpaw Isaika bung maicang qawng-a thyng kha Säthaw tea löci kätyng sa rüng te vi dy. 22Abraham lä Säthaw tea tengxyng y yng vi näte äni üng kälu hai mätü te vi näte tea nang ce lä nung haw ö te y mei. Äni üng yng saite lä äni üng sa saite hai-a cungrü hai te vi. 23Caekäcai thung-a, “Abraham lä Säthaw tea yng te phüng-a, Säthaw lä äni tea khimi käcüng-a mäthi te vi” näkha thui rüng saite tea lä cungrü hai te vi. Tukha Säthaw lä äni bung kangby jä-ai-a mäthi te vi dy. 24Säthaw ma khimi lawngtä bung äni üng yng saite xyngtä phüng-a khimi käcüng kätyng mäthi te y vi näkha nang ce lä mäny haw ö te vi. Säthaw lä äni üng sa saite kälu phüng-a, äni bung khimi käcüng-a mäthi te vi.

25Nawngmädi kangdei Raha mäteng ma, hini kätyng sa te by vi. Äni lä Isrelae khimi na üng sämeng mätaw saite bung äma üng ing-a lady kha kangkhüng mang-a lä lolang kälang mang hai mätaw ja pa te vi dy. Hini kätyng sa te phüng-a, äni tea Säthaw lä khimi käcüng-a mäthi pa te vi dy.

26Muilaw awng y saite ätabung lä kädü kätyng-a, kälu na sa y käla yng saite lä kädü kae vi.

Currently Selected:

Jako 2: cekNT

Highlight

Copy