Jako 1

Angcü üng älo

1Säthaw hai Areng Isu Khrista üng mawsawng kai, Jaeko, lä mityng qütä-a aehi sangxang saite Isrelae ceng hawlai netä na tea kawng te lo thui te vi.

Yng saite hai bälunghae saite

2Kai üng yng saite kangby jä-ai na ä, nang ce lä the saite cawngkhang na aeting te kätü-a, anghawtho saite kätyng honi phüng tea aedawng ö ba. 3Nang ce üng yng saite tea Säthaw ma käny te phüng-a, nang ce üng khung saite ryng haw vi näte nang ce lä mäny ö te vi. 4Nang ce üng khung saite lä ryng te qawng-a ryng rae kha hing saite angxynlyng na tähang awng hethang kae. Tukä dylä nang ce üng aeme aeqa saite lä ryng kha cungrü ö ai. Tukha nang ce lä aethawdi ö y vi ai. 5Nang ce thung üng bälung kähae ngai saite khimi lä Säthaw tea mäkai sy. Säthaw lä khimi qütä tea cy y käla mäsai y te hai py khaw ai. 6Tungaila khimi lawngtä mäkai dylä, yng khü kha yng vawng y saite bälung lä awng hethang kae y. Yng khü y saite khimi lä aeli kangcai hai-a bungba saite pangle tui leng kätyng vi. 7Honi kätyng awng saite khimi lä Säthaw te üng ätete dang y lyng näkha dawng he kae y. 8Yng vawng y saite khimi lä sa saite qütä cakhi-a awng te y vi.

Mätang saite hai tawngnang saite

9Yng saite khimi kangtang lä Säthaw ma äni bung lä mäsang ai te phüng-a anghawtho rae sy. 10Tungaila tawngnang saite lawngtä lä Säthaw ma äni bung mäneng ai te phüng-a anghawtho sy. Ätephüng-a mei nädylä, äni üng hing saite lä daithung üng äpa kätyng tänaetä ma la vi ai. 11Käni lä se kha bi te kätü-a, äkung lä cei ea äpa lä aerui kha äcae kähawi lä pra te vi. Hini kätyng tawngnang saite khimi lä äma üng kälu sa te thüng-a pra vi ai.

Käny saite hai the saite

12Khimi lawngtä lä the saite hai käny saite aeting te kätü-a, äni üng yng saite cakhi dylä, äni lä anghawtho haw vi. Ätephüng-a mei nädylä Säthaw ma honi na tea bäja pyng saite khimi bung lä ävang käting dungtäsa hing saite py ai. Säthaw lä äma tea bälung aevaw saite khimi na tea lä ävang käting dungtäsa hing saite py hethang älo aedo te vi. 13The saite aeting te khimi ma, “Säthaw lä kai tea the te vi” näkha thui hethang kae y. Ätephüng-a mei nädylä Ämi lawngtä la Säthaw tea käsi sa hai hethang the haw te y. Äni la ämi tea la käsi sa hethang the te y by vi. 14Mä-ai üng ngaiphi tüng y saite bälung lä mä-ai tea the te vi. Äni ce lä mä-ai tea mäthang sa kha käsi mang-a nähai ö te vi. 15Tupyng-a mä-ai lä ngaiphi tüng y saite na thung-a hui kha hunghö sa ö te vi. Hunghö lä leng kha ryng khü te kätü-a, mä-ai bung dü hai te vi.

16Kai üng bälung aevaw saite kangby jä-ai na ä, ämi ma la nang ce tea kaeling kaemae sa ö hang sy. 17Hawi saite hai cungrü saite lasawng qütä lä Känipre üng tho te vi. Känipre kaevang tea sa saite Säthaw lä mä-ai tea hini lasawng na py te vi. Äni lä aethui saite kaekhui kätyng aemäqa te y vi. 18Äni lä äma üng mawlang kaedawng kätyng lo mitang hai-a mä-ai tea hing saite kangthae py te vi dy. Ätephüng-a mei nädylä, äni lä mä-ai bung äma sa saite na thung-a, angcüky mityng-a py hethang ngai te vi.

Tängai saite hai sa saite

19Kai üng bälung aevaw saite kangby jä-ai na ä, hini na tea nang ce lä aedawng haile ö ba. Älo na tea lä tängai dawde ö. Älo aepe saite hai kädawtho saite na tea lä kangjai-a awng hethang kae. 20Khimi lawngtä kädawtho te kätü-a, äni lä Säthaw üng ngai saite kälu käcüng-a sa haw y lyng. 21Tukätephüng-a nang ce üng pawprae saite kaedawng hai aepä-e saite angxynlyng na khaisö ö lawi. Säthaw ma nang ce üng bälung thung-a mäkung saite lo tea nang ce lä aemäneng te bälung hai täla ö. Hini lo lä nang ce bung aeqang haw te vi.

22Nang ce lä Säthaw üng lo tea tängai te qaitä y käla sa hethang kae. Khimi lawngtä ma tängai kha sa y dylä, äni lä äma tea kaeling kaemae aethui raw te vi. 23Khimi lawngtä lä Säthaw üng lo tea tängai kha äni üng lo kätyng sa y dylä, äni lä khawitälae thung-a äma üng mimai tea nung te kätyng vi. 24Hini khimi lä äma ma tea aekheng kha äni lä mityng kälang-a ly ea äma üng ämaw äcae tea qengtä ma tämang ja te kätyng vi. 25Tungaila khimi lawngtä lä Säthaw üng cungrü saite Ubädi tea khüsälü-a kheng kha tängai ea Ubädi thung-a awng saite na tämang y käla sa jawjaw dylä, Säthaw ma äni tea lä tähang kähawi na py vi ai. Ätephüng-a mei nädylä, Ubädi lä mä-ai tea bälawi saite phüng-a vi.

26Khimi lawngtä lä Säthaw tea yng te kätyng sa saite tea dawng kha äma üng täbawng tea aeküng y dylä, äni lä äma tea kaeling kaemae sa te vi. Äni üng sa saite lä Säthaw üng maw-a ävang ting y. 27Mä-ai üng Pä-ai Säthaw ngai saite kälu na lä mätang bälai saite ruicaw na hai nawngmädi lömai na tea säbawng hethang vi. Tukha hini älawngpre khimi na üng käsi sa saite hai-a, nang ce lä pawprae y hethang aethawsa ö.

Currently Selected:

Jako 1: cekNT

Highlight

Copy