Lũka 16

Omũteya mubi

1Neryo Yesu mwabũga nʼabiga buwe ati, Habya omundu wʼebindu oyo wabya awite omũteya. Neryo abandu mobamubwira bati omũteya oyo anemũtalya ebindu biwe. 2Neryo mwamubirikira ati, Ebĩ nĩ byahi ngowa busana nawe kwehĩ? Ulete emiganzo yʼebindu byage Wabere ũkateya, kusangwa siwendisyaswabya mũteya wage. 3Neryo omũteya oyo mwayibwira ati, Nasyayira nyiti kwehĩ, kusangwa omukama wage amanyinyega obũteya bwage. Sindi nʼakagala kʼeririma, kandi ngakwa esĩsonĩ syʼerihema. 4Nyĩnasĩ ekyo ngandikola, neryo omugulu nasyalũsĩbwa oko bũteya, abandu batoke erĩnyĩkokya omo manyũmba wabo. 5Neryo mwabirikira abandu bosĩ ababya kwʼemĩnda yʼomukama wuwe. Oko wʼerĩmbere mwabũga ati, Uli nʼomwĩnda gungahi gʼomukama wage kwehĩ? 6Neryo mwasũbĩrya ati, Ehĩrengĩ ĩgana hyʼamagũta. Neryo omũteya mwamubwira ati, Wĩmaye akaratasi kawe, Wĩkale lũba Usake amakũmĩ atanu. 7Neryo mwabwira ogundi ati, Nawe uli nʼomwĩnda gungahi kwehĩ? Naye mwasũbĩrya ati, Ebitiri ĩgana byʼengano. Neryo omũteya mwamubwira ati, Wĩmaye akaratasi kawe Usake amakũmĩ munani. 8Neryo omukama wʼomũteya wʼamabehĩ oyũ mwamupipa busana nʼamenge wuwe; kusangwa bandu bʼekihugo kino ni bʼamenge omo myatsi yabo kwilaba abandu bʼekyakakala.

9Neryo Yesu mwabũga ati, Ngababwira nyiti, muyire abĩra busana nenyũ omo bindu bitatunganene, neryo omugulu byasyahwa, mwasyakokĩbwa omo manyũmba wʼerikoteramo. 10Oyuteregula omo myatsi mike-mike sialiregula omo myatsi minene-minene; nʼoyutatunganene omo myatsi mike-mike, sialitunganana omo myatsi minene-minene. 11Neryo mwamabya mukalegula omo bindu byʼekihugo, nindi wasyababĩkya ebindu byʼekwenene kwehĩ? 12Kandi mwamabya mukalegula omo bindu byʼabandi, nindi asyabaha ebindu byenyũ kwehĩ?

13Sihali omugombe oyo wangatoka erikolera abakama babiri; kusangwa asyakwa omuguma yʼobusu, nʼerianza ogundi; kutse asyabegera oko muguma, iniapona nʼogundi. Simwangatoka erikolera Nyamuhanga nʼebindu.

Emĩbũyĩre ya Yesu

(Mt 11.12-13; 5.31-32; Mk 10.11-12)

14Nĩkwa Abafarĩsayo mobowa ebyosĩ ebĩ neryo mobasekererya Yesu, kusangwa babya banzĩre esyofranka. 15Nĩkwa Yesu mwabwirabo ati, Ĩnywe muli abakayĩtũngananaya omo meso wʼabandu, nĩkwa Nyamuhanga anasĩ emitima yenyũ. Kusangwa ebyo abandu bakaganĩraya nga ni binene, Sibiri na mugaso omo meso wa Nyamuhanga.

16Emigambo ya Musa nʼAmasako wʼabamĩnyererĩ mobyabyaho erĩhĩka oko mugulu wa Yoane Mũbatĩsya; erĩtsũka oko mugulu oyo Engulu Yowene yʼobwami bwa Nyamuhanga ĩkatũlawa, nʼobuli mundu akingiramo nʼamaka. 17Kandi ni ryolo busana nʼekyanya kyʼendata nʼekihugo erihwaho kwilaba erĩlũaho lyʼakatondĩ kaguma kʼEmigambo. 18Obuli mundu oyukakomola omũkalĩ wuwe akaswahĩkya ogundi mũkalĩ ĩniakasĩngĩra, nʼoyũkahĩkaya omũkalĩ oyuliakomolawa nʼĩba wuwe, ĩnĩamabĩsĩngĩra.

Omundu wʼebindu na Lazaro

19Neryo habya omundu wʼebindu iniakambala esyongimba syʼobũgũlĩ bunene syʼekĩtanĩ nʼesyʼomunyama. Kandi iniakalya ebyowenenga. 20Kandi habya nʼomundu mwera oyukahulawa mo Lazaro iniatsungene kwʼebironda, ĩnĩakahĩrawa oko lũkyo lwʼomundu wʼebindu. 21Lazaro oyũ iniakasonda erirya ebitahangukira ebikatogongera ahisi bĩkalũa oko mesa yʼomundu wʼebindu; kandi esyombwa syabya sĩkahĩkaho nʼeriryatsirira oko bironda biwe. 22Omundu mwera oyũ mwahola, mwahekwa nʼabamalaĩka oko kĩkũba kya Abrahamũ; nʼomundu wʼebindu naye mwahola nibya, mwatabwa. 23Ekũlĩmũ omundu wʼebindu mwabya akagalwa, neryo mwasumba ameso wuwe mwalangira Abrahamũ ehali, na Lazaro iniane oko kĩkũba kiwe. 24Neryo omundu wʼebindu mwabirikira kutsibu ati, Tata Abrahamũ! unyiganyire, Utume Lazaro ahĩre omutwe-mutwe wʼomunwe wuwe omo magetsi aholokaye olulimi lwage, kusangwa ngagalawa omo kirimi ekĩ kyʼomuliro. 25Nĩkwa Abrahamũ mwamubwira ati, Uwe mwana, Wibuke omugulu wabya ukiriho mowabana ebindu bibuya, na Lazaro naye mwabana ebindu bibi; nĩkwa lino Lazaro akakĩranĩbawa hano, nawe ukagalawa. 26Nʼakandi omo katĩkatĩ ketu nawe, hali kyũna kiri, neryo abakasonda erisokera eyo uli sibetoka, kandi sihali oyukasokera eno akalũa eyo uli. 27Neryo omundu wʼebindu mwabũga ati, Nĩkwa ngakulembalemba Tata, Utume Lazaro eka wa tata wage, 28eyo ngwite abagala betu batanu, abwirebo ahanebo, bakasyasyahĩka hano ahali eriagalwa. 29Nĩkwa Abrahamũ mwamubwira ati, Abagala benyũ bawite Musa nʼabamĩnyererĩ erihanabo; abagala benyũ bowebo. 30Neryo omundu wʼebindu mwasũbĩrya ati, Iyihi, tata wage Abrahamũ! Nĩkwa omundu amahĩka kubo akalũa oko baholĩ, basyabindula emitima erireka ebibi. 31Nĩkwa Abrahamũ mwamubwira ati, Bamatĩndowa Musa nʼabamĩnyererĩ, sibendisyayisinga nomo mundu angalũa oko baholĩ.

Currently Selected:

Lũka 16: KB80

Highlight

Copy