Lũka 15

Embũlĩ eyatala

(Mt 18.12-14)

1Neryo abasolesya bosĩ nʼabakolanabi mobahĩka hakũhĩ na Yesu erĩmowa. 2Neryo Abafarĩsayo nʼabakangĩrĩrya bʼEmigambo mobayikuna bati, Omundu oyũ akakokaya abakola-nabi nʼerirya haguma nabo. 3Kyaleka Yesu ĩnĩatwĩrabo omũsyo oyũ ati, 4Omundu ũkwʼĩnywe amabya awite esyombũlĩ ĩgana, amatalya enguma, akakolakĩ, kwehĩ? Akasĩganaya esyombũlĩ amakũmĩ mwenda nʼomwenda omo mbwarara, akayakwamirira embũlĩ eyitere erĩhĩka aho asyabanirayo. 5Omugulu akabanayo, akatsema, ĩnĩahĩrayo oko bitigo biwe, 6nʼeritwalayo eka wuwe. Neryo akabirikira bĩra buwe nʼabalĩkyabo haguma, iniabwirabo ati, Mutseme haguma nage, kusangwa namabana embũlĩ yage eyĩlwe yitere! 7Ngababwira nyiti, Litya obutseme bunene bwasyabya elubula busana nʼomukola-nabi muguma oyukabindula omutima nʼerireka ebibi kwilaba obutseme busana nʼabandu batunganene amakũmĩ mwenda nʼomwenda abate nʼobwaga bwʼeribindula emitima nʼerireka ebibi.

Esyofranka esyatala

8Kutse omũkalĩ oyuwite esyofranka ĩkũmĩ amatalya oluguma, akakolakĩ kwehĩ? Akakaya etala, nʼerĩbĩrya enyũmba yiwe, nʼerikwesa ndeke erĩhĩka aho akandibaniralo. 9Omugulu akabanalo, akabirikira abĩra buwe nʼabalĩkyabo ati, Mutseme haguma nage, kusangwa nabiribana olufranka olo natalaya! 10Ngababwira nyiti litya hali obutseme haguma nʼabamalaĩka ba Nyamuhanga busana nʼomukola-nabi muguma oyukabindula omutima nʼerireka ebibi.

Omwana oyo watala

11Kandi Yesu mwabũga ati, Habya omundu oyuwite abagala babiri. 12Omulere mwabwira tata wuwe ati, Tata, gumbe erĩgabo lyʼebindu ebikandisyabya byage. Neryo ĩse wabo mwagabirabo ebindu biwe. 13Neryo enyũma wʼebindi biro, omwana mulere oyo mwasengasenga ebyosĩ abya awite, mwaya omo kihugo mo hali, nʼeyo mwapanza-panza ebindu biwe omo migendere mityamitya. 14Kandi omugulu atalaya ebyosĩ, neryo enzala nene moyahĩka omo kihugo ekyo. Neryo omwana oyo mwatsũka eribya nʼobwaga. 15Neryo mwayabungira ahali omundu wʼekihugo ekyo, nʼomundu oyo mwamutuma omwʼirima liwe erĩrĩsya esyongulube. 16Neryo mwasonda erĩũgũta oko bisugu ebyo esyongulube syabya sikalya, kandi sihabya mundu Ukamuha kindu. 17Nĩkwa abere ibuka, mwabũga ati, Abagombe ba tata wage ni bangi abawite akalyo akatolere, nʼakandi kakasaka, nĩkwa ĩngye ngaholera eno nʼenzala! 18Ngandihongoka eriya eyiri tata wage nʼerimubwira nyiti, Tata, nabĩrĩhalya embere sya Nyamuhanga nʼembere syawe. 19Sinyikitolere eriahulwa mo mwana wawe; unyiyire ngʼomuguma gʼoko bagombe bawe. 20Neryo mwahongoka mwaya eyiri tata wuwe. Nĩkwa omugulu abya akine ekyaswa, ĩse wuwe mwamulangira, neryo omutima wuwe mwamuganyira, neryo mwatibita eyo ali, mwamubagalira, mwamulyatsirira. 21Neryo omwana oyo mwabũga ati, Tata, nabĩrĩhalya embere sya Nyamuhanga nʼembere syawe; sinyikitolere eriahulwa mo mwana wawe. 22Nĩkwa ĩse wuwe mwabwira abagombe buwe ati, Mulete lũba ekanzu eyowene eyĩlabĩre esindi, mũmwambalayeyo, kandi mũhĩre embũka yʼoko munwe wuwe, nʼesyongendero oko bisando biwe. 23Neryo mulete ekyana kyʼende ekĩnenehĩre; mũsĩnzekyo, tulye, tutsange! 24Kusangwa omwana wage ono abya aholĩre, lino aneho; abya ĩnĩaherĩre, neryo lino abiribanika. Neryo mobatsũka eritsema.

25Nĩkwa omwana wuwe akambere, kabya omwʼirima. Omugulu asa, abere ahĩka hakũhi nʼenyũmba, mowa esyonanga nʼerisata. 26Neryo mwabirikira omuguma gʼoko bagombe, mwabũlya ebyabere. 27Naye mwamubwira ati, Mugala wenyũ abĩrĩhĩka, na tata wawe abĩrĩsĩnza ekyana kyʼende ekĩnenehĩre, kusangwa abĩrĩmũkokya nʼobuholo ĩnĩanakalĩre. 28Nĩkwa mugala wabo oyo mwahitana, mwagana eriya omo nyũmba. Neryo ĩse wuwe mwahuluka mwamulemba-lemba ati ayemo. 29Nĩkwa mwasũbĩrya ĩse wuwe ati, Lebaya, nabirikukolera emyaka mingi isindinatagana erihana lyawe. Nĩkwa sulitamba nʼakahene nʼakaguma inatoka eritsanga haguma nʼabĩra bage. 30Nĩkwa omwana wawe oyũ amabya ahĩka, oyo wabuga ebindu byawe haguma nʼabaragane, wabĩrĩmũsĩnzĩra ekyana kyʼende ekĩnenehĩre! 31Neryo tata wuwe mwamubwira ati, Mwana wage, uli haguma nage ebiro byosĩ, nʼebyosĩ ngwite ni byawe. 32Nĩkwa lĩwe litolere itwalya nʼeritsema, kusangwa mugala wenyũ oyũ abya aholĩre na lino aneho, kandi abya ĩnĩaherĩre, neryo lino abiribanika.

Currently Selected:

Lũka 15: KB80

Highlight

Copy