Lũka 17

Ebibi

(Mt 18.6-7,21-22; Mk 9.42)

1Yesu mwabwira abiga buwe ati, Emyatsi eyĩkakolesaya abandu bʼebibi ikandisyasa kwenene, nĩkwa obũlĩge oko yukaletayo! 2Kumbe ryowene busana nʼomundu oyo oluso lunene ilwaboherwa oko bĩkya biwe, iniaguswa omo ngetsi; kwilaba erireka omuguma gʼoko bana balere aba akakola ebibi. 3Mũyĩtegaye! Omugala wenyũ amakola ebibi, umukunge; amabindula omutima erireka ebibi iwamubuyira. 4Kandi amakukola nabi ngendo sirinda oko kiro kiguma, neryo akaswakũhĩkako ati, Namabindula omutima erireka ebibi, litolere iwamubuyira.

Erĩkĩrĩrya

5Nĩkwa abakwenda mobabwira Omukama bati, Ũkanyaye erĩkĩrĩrya lyetu! 6Omukama mwasũbĩryabo ati, Kumbe muwite erĩkĩrĩrya ngʼembuto yʼeharadalĩ, mwangabwira omuti wʼomukuyu oyũ muti, Uyikule, uyayihere omo ngetsi, nago ĩnĩabowa.

Omũbĩrĩ wʼomugombe

7Nindi ũkwʼĩnywe oyuwite omugombe Oyukalima kutse akalĩsaya esyombũlĩ. Omugombe omugulu akalũa omwʼirima ukamubwira uti, Wase lino Wĩkale ulye kwehĩ? 8Iyihi, nĩkwa Wasyamubwira uti, Ũkokotaye ebyalya byage byʼerirya, Ubohe embindi, ũhũkũle, unyikolere erĩhĩka aho namabirira nʼerĩpũlya, neryo enyũma wasyalya nʼerĩpũlya. 9Akaha ewasĩngya oko mugombe oyo kusangwa akola ebyo ahanawa kwehĩ? 10Nenyũ nibya, omugulu mwamabikola ebyosĩ mwategekawa, mũbũge muti, Tuli bagombe abatatolere; twabirikola ebyo tutolere itwakola bisa.

Yesu akalamaya abahaga ĩkũmĩ

11Neryo Yesu abere akaya eYerũsalema, mwalaba omo katĩkatĩ kʼeSamarĩa nʼeGalĩlaya. 12Nĩkwa abere, akingira omo mũyĩ muguma, neryo abahaga ĩkũmĩ mobahĩndana naye. Mobahangana ehali nʼeribirikira bati, 13Yesu, Omukama, utuganyire! 14Neryo omugulu Yesu alangirabo, mwabwirabo ati, Mugende mũyĩkanganaye oko bahererĩ. Neryo babere banemugenda, mobalamĩbwa. 15Nĩkwa omuguma wa kubo abere abilangira kwʼamabĩlamĩbwa, mwasubula iniakapipa Nyamuhanga nʼomulenge munene. 16Neryo mwakũkama ahisi embere syʼebisando bya Yesu, nʼerimuha ewasĩngya. Omuhaga oyo abya Mũsamarĩa. 17Neryo Yesu mwabũlya ati, Abosĩ ĩkũmĩ mobatalamĩbwa kwehĩ? Nĩkwa abandi mwenda bali hahi kwehĩ? 18Sihetabanika abakasubula nʼeripipa Nyamuhanga yo nʼowʼehandi oyũ musa kwehĩ? 19Neryo Yesu mwamubwira ati, Uhangane, ugende; erĩkĩrĩrya lyawe lyamabĩkũlamya.

Erĩhĩka lyʼobwami

20Abandi Bafarĩsayo mobabũlya Yesu Obwami bwa Nyamuhanga nga bwasyasa mugulu wahi. Yesu mwasũbĩryabo ati, Obwami bwa Nyamuhanga sibwendisyasa mo biminyikalo ebikalolawako. 21Kutse sihali mundu oyo wasyabũga ati, Ulangire, Obwami buli hano, kutse, Halya ho buli! Kusangwa lebaya, Obwami bwa Nyamuhanga buli omo katĩkatĩ kenyũ.

22Neryo mwabwira abiga ati, Ebiro byasyasa omugulu mwasyanza erilangira ekiguma kyʼebiro byʼomugala wʼOmundu, simwendisyalola kukyo. 23Basyababwira bati, Ulangire halya! kutse, Ulangire hano! Simuyeyo, simutibite eyo bali. 24Kusangwa ngoko akarabyo kakapalaya erĩtsũka oko luhande lwʼekyanya nʼerĩhĩka oko lundi luhande, litya Omugala wʼOmundu asyabya atya oko kiro kiwe. 25Nĩkwa litolere ĩnĩatsũka eriagalwa omo myatsi mingi nʼeriganwa nʼabandu ba sesene. 26Ngoko byabya omo biro bya Noa, ko bikandisyabya bitya omo biro byʼomugala wʼOmundu. 27Mobalya, mobapũlya, mobahĩkya, mobaherũkanĩa erĩhĩka oko kiro Noa ingira omo bwato, nʼerigunga lyʼamagetsi molyasa nʼerĩherya abosĩ. 28Kandi ngoko byabya omo biro bya Lotĩ, mobalya, mobapũlya, mobagula, mobagũlya, mobabiba, mobahĩmba. 29Nĩkwa oko kiro Lotĩ alũa eSodomo, moyawa omuliro nʼeripumuka lyʼomuliro bĩkalũa elubula, mobyaherya abandu bosĩ. 30Ko bikandisyabya bitya oko kiro Mugala wʼOmundu asyabĩsũlwa.

31Oko kiro ekyo, omundu oyuli endata oko nyũmba yiwe, ĩsĩangasyakĩmĩra omuwe erienda ebindu biwe ebirimo eritwalabyo; kandi oyuli omwʼirima siasube enyũma eka wuwe. 32Mwibuke omũkalĩ wa Lotĩ! 33Oyukasonda erĩlamya engebe yiwe, asyatalyayo, nĩkwa Oyũkatalaya engebe yiwe asyabikayo ndeke. 34Ngababwira nyiti, Oko kiro ekyo hasyabya abandu babiri ibagotsere oko ngyingo nguma, omuguma asyatwalwa, nʼogundi asyasĩganĩbwa. 35Hasyabya abakalĩ babiri abakaswa eyĩsyano yo haguma, omuguma asyatwalwa, nʼogundi asyasĩganĩbwa. [ 36Abalume babiri basyabya omwʼirimai omuguma asyatwalwa, nʼogundi asyasĩganĩbwa.] 37Neryo abiga mobamũbũlya bati, Mukama ni hahi kwehĩ? Yesu mwasũbĩryabo ati, Ahali ekĩnda, ho amahungu asyahĩndana.

Currently Selected:

Lũka 17: KB80

Highlight

Copy