Yoane 20

Eyisinda eyite mo mundu

(Mt 28.1-8; Mk 16.1-8; Lk 24.1-12)

1Neryo oko kiro kyʼerĩtsũka kyʼeYenga, omwĩrĩmya iniakineyo, Marĩa Magdalene mwasa okwʼisinda, neryo mwalangira erĩbwe ĩryabĩrĩlũsĩbwa okwʼisinda. 2Nĩkwa mwatibita mwaya eyiri Sĩmonĩ Petero nʼogundi mwiga oyo Yesu abya anzĩre, neryo mwabwirabo ati, Balũsĩrye Omukama yʼomwʼisinda, kandi Sĩtwasĩ aho bamũhĩrĩre! 3Neryo Petero mwahongoka nʼogundi mwiga oyo, mobaya okwʼisinda. 4Nĩkwa ababiri bosĩ mobatibitira iguma, nʼogundi mwiga oyo mwalengya Petero yʼamagulu, mwamutanga okwʼisinda. 5Neryo mũnama mwasamaliramo, mwalangira esyongimba syʼekĩtanĩ ĩsĩnĩkĩryeho, nĩkwa mwatingiramo. 6Neryo Sĩmonĩ Petero mwahĩkaho, ĩnĩanakwamĩre ogundi oyo, neryo mwingira omwʼisinda. Naye mwalangira esyongimba syʼekĩtanĩ ĩsĩnĩkĩryeho, 7nʼekitambala ekyabya oko mutwe, ĩsĩkĩkĩrye haguma nʼesyongimba syʼekĩtanĩ, nĩkwa ĩkĩrĩngĩre aho wakyo. 8Neryo ogundi mwiga oyo watsũka erĩhĩka okwʼisinda mwingiramo nibya, naye mwalangira kandi mwĩkĩrĩrya.

9Kusangwa isibebaminya Amasako, kwʼatolere erĩlũbũka oko baholĩ. 10Neryo abiga abo mobasyasuba eka wabo.

Yesu akabutukira Marĩa

(Mt 28.9-10; Mk 16.9-11)

11Nĩkwa Marĩa abya imene eyĩhya okwʼisinda akalira. Neryo abere anemulira, mũnama mwasamalira omwʼisinda. 12Neryo mwalola oko bamalaĩka babiri ibambite esyongimba nyeru-nyeru, ĩbanĩkere aho mubiri wa Yesu abya ĩkĩrye, omuguma aho musegemo, nʼogundi aho bĩlambĩryo. 13Nabo mobamũbũlya bati, Mũkalĩ, busana nakĩ ukalira kwehĩ? Naye mwabwirabo ati, Kusangwa batwere Omukama wage, nage Sĩnyasĩ aho bamũhĩrĩre. 14Neryo abere abĩbũga atya, mwakeba, mwalangira Yesu inianimeneho, nĩkwa ĩsĩasĩ kwʼali ini Yesu. 15Yesu mwamũbũlya ati, Mũkalĩ, ukalira busana nakĩ kwehĩ? Ukasonda-sondayandi kwehĩ? Naye mwaganĩrya ati yo mũlĩmĩ wʼeririma, mwamubwira ati, Mukama, wamabya ini we wamutwere ehandi, unyibwire aho wamũhĩrĩre, nage ngandimutwala. 16Neryo Yesu mwamubwira ati, Marĩa! Naye mwamukebera, mwamubwira omo Kiebranĩa ati, Rabonĩ, kiti, Mũkangĩrĩrya. 17Yesu mwamubwira ati, Sũnyĩtũleko Kusangwa sindinahetukira ewa Tata. Nĩkwa ugende oko bagala betu ubwirebo uti ngahetukira uku Tata wage, na Tata wenyũ, nʼuku Nyamuhanga wage, nʼuku Nyamuhanga wenyũ. 18Neryo Marĩa Magdalene mwayabwira abiga ati, Nabirilola oko Mukama. Kandi ati Omukama mwamubwira emyatsi eyĩ.

Yesu akabutukira abiga buwe

(Mt 28.16-20; Mk 16.14-18; Lk 24.36-49)

19Neryo omwʼĩgolo-golo lyʼekiro ekyo, ekyʼerĩtsũka eyenga, abiga mobahĩndana omo nyũmba nʼesyonyũyĩ ĩsĩnakĩngĩre, busana nʼeriubaha Abayũda. Neryo Yesu mwasa, mwahangana omo katĩkatĩ kabo. Mwabwirabo ati, Obuholo ũkwʼĩnywe! 20Neryo abere abĩbũga atya, mwakangyabo ebyala biwe, nʼolukanga luwe. Neryo abiga mobatsema omugulu balangira Omukama. 21Neryo Yesu mwaswabwirabo ati, Obuholo kwʼĩnywe. Ngoko Tata anyituma, nage ko ngabatuma nyitya. 22Abere abĩbũga atya, mwahumulira kubo ati, Mwangirire Omũlĩmũ Abũyĩrĩre. 23Mwamabuyira ebibi byʼabandu, ibyamabibuyirwa kubo; mwamatendibuyira ebibi byʼabandu, ibyamabyegekwa kubo.

Yesu na Toma

24Nĩkwa Toma, omuguma gʼokwʼĩkũmĩ nʼababiri, oyo wahulawa mo Muhasa, siabya haguma nabo omugulu Yesu ahĩka. 25Neryo abandi biga mobamubwira bati, Twabirilola oko Mukama! Nĩkwa Toma mwabwirabo ati, Namatendilangira engolũ yʼemĩsũmalĩ omo byala biwe, nʼerĩhĩra omunwe wage gʼomo myanya yʼemĩsũmali nʼerĩhĩra ebyala byage omo lukanga luwe, sindiendĩsyĩkĩrĩrya nʼahake.

26Neryo enyũma wʼebiro munani abiga buwe babya omo nyũmba, na Toma haguma nabo. Neryo esyonyũyĩ ĩsĩnakĩngĩre, Yesu mwasa, mwahangana omo katĩkatĩ kabo, ati, Obuholo ũkwʼĩnywe! 27Neryo mwabwira Toma ati, Leta omunwe wawe, ulangire ebyala byage. Leta ebyala byawe, ũhĩrebyo omo lukanga lwage, subye bũtĩkĩrĩrya, nĩkwa Wĩkĩrĩraye! 28Toma mwamũsũbĩrya ati, Omukama wage na Nyamuhanga wage! 29Yesu mwamubwira ati, Wabĩrĩkĩrĩrya kusangwa wabirinyilolako kwehĩ? Obutseme buli oko bakanyĩkĩrĩraya bate banyilolako.

Enzumwa yʼekitabu ekĩ

30Yesu mwakola ebindi bitiko-tiko bingi embere syʼabiga buwe, ebĩtasakĩre omo kitabu ekĩ. 31Nĩkwa ebĩ bĩsakĩre imwatoka erĩkĩrĩrya Yesu kwʼali Kristo, Omugala wa Nyamuhanga, neryo omwʼĩkĩrĩrya erĩ imwabana engebe omo lĩna liwe.

Currently Selected:

Yoane 20: KB80

Highlight

Copy