Yoane 19

Pilato nʼabasĩrĩkanĩ bakanũbaya Yesu

1Neryo Pilato mwĩmya Yesu mwamũswĩrya omo mikoba. 2Nʼabasĩrĩkanĩ mobaluka emisaki-saki mo mbĩta, mobahĩrayo oko mutwe wuwe, kandi mobamwambalya ekanzu yʼOmunyama. 3Neryo mobamũhĩkako bati, Wabũkĩre uwe Mwami wʼAbayũda! Neryo mobamũswĩrya ebĩkũndĩ byʼomo bũsũ.

4Neryo Pilato mwaswahulukira eyĩhya, mwabwira endeko ati, Mũlebaye, ngabaleteraye, imwatoka eriminya ko ndetamubana ko musango. 5Neryo Yesu mwahulukira eyĩhya, inianambite embĩta yʼemisakisaki, nʼolukimba lʼomunyama. Neryo Pilato mwabwirabo ati, Lebaya! Omundu yoyũ! 6Neryo omugulu abahererĩ bakulu nʼabateya balola uku Yesu mobabirikira bati, Abambawe oko musalaba! Abambawe oko musalaba! Neryo Pilato mwabwirabo ati, Mũmwĩmaye ĩmwebene, mumubambe oko musalaba, Ĩngye sinditamubana ko musango. 7Abayũda mobamũsũbĩrya bati, Tuwite omugambo owakabũga ati atolere ĩnĩakwa, kusangwa mwayiyira mo Mugala wa Nyamuhanga.

8Omugulu Pilato owa ekĩnywa ekĩ mubaha kutsibu kwʼaho. 9Neryo Pilato mwasuba omo kikali kyʼomũtabalĩ, mwabũlya Yesu ati, Walũa hahi kwehĩ? Nĩkwa Yesu mwatamũsũbĩrya. 10Neryo Pilato mwabwira Yesu ati, Sĩwendĩbũga nage kwehĩ? Sĩwasĩ ko ndi nʼehamũlĩ yʼerikubohola, kandi nyiwite ehamũlĩ yʼerikubamba oko musalaba kwehĩ? 11Yesu mwamũsũbĩrya ati, Siwangabya nʼehamũlĩ ũkwʼĩngye utalyahabawayo na Nyamuhanga. Kikaleka omundu oyo wanyihotera ukʼuwe iniabya ko musango wʼebibi binene kwʼaho. 12Neryo Pilato abere owa ekyo, mwasonda eribohola Yesu. Nĩkwa Abayũda mobatsumira bati, Wamabohola omundu oyũ isuli mwĩra wa Kaĩsarĩ! Omundu oyukayiyira mo mwami iniakalwa na Kaĩsarĩ! 13Neryo Pilato abere abĩowa ebĩnywa ebĩ, mwaleta Yesu yʼeyĩhya, neryo mwĩkala oko kĩtũmbĩ kyʼomũtswerĩ, ahakahulawa mo Kibuga kyʼAmabwe, nĩkwa omo Kĩebranĩa ni Gabata.

14Neryo yabya hakũhĩ na saa sĩta oko kiro kyʼerĩkokotya busana nʼEkiro Kikulu kyʼErikiruka. Neryo Pilato mwabwira Abayũda ati, Mũlebaye, omwami wenyũ oyũ! 15Nabo mobatsumira bati, Ĩtawe! Ĩtawe! Abambawe oko musalaba! Neryo Pilato mwabũlyabo ati, Nyibambe omwami wenyũ yʼoko musalaba kwehĩ? Abahererĩ bakulu mobasũbĩrya bati, Situwite mwami nina Kaĩsarĩ ĩyowene. 16Neryo Pilato mwahereryabo Yesu ati abambawe oko musalaba.

Yesu akabambawa oko musalaba

(Mt 27.32-44; Mk 15.21-32; Lk 23.26-43)

17Neryo mobahamba Yesu, naye mwahuluka, inianayihekere omusalaba wuwe, erĩhĩka ahakahulawa mo Aherĩhanga, ahakahulawa omo Kiebranĩa mo Golgota. 18Eyo mobamubamba oko musalaba. Kandi mobabamba abandi bandu babiri kuguma naye oko misalaba, oko lundi luhande muguma, nʼoko lundi luhande muguma, na Yesu omo katĩkatĩ kabo. 19Neryo Pilato mwasaka ekĩmĩnyĩsyo, neryo mwahĩrakyo oko musalaba. Kyabya kĩsakĩre kiti, YESU Mũnazaretĩ, omwami wʼAbayũda. 20Neryo Abayũda bangi mobasoma amasako ayo, kusangwa aho Yesu abambirawa habya hakũhĩ nʼomũyĩ. Ekĩmĩnyĩsyo ekyo kyasakawa omo Kiebranĩa, nʼomo Kiroma, nʼomo Kĩgĩrĩkĩ. 21Neryo abahererĩ bakulu bʼAbayũda mobabwira Pilato bati, Susake Omwami wʼAbayũda, nĩkwa uti, Omundu oyũ mwabũga ati, Ĩngye indi mwami wʼAbayũda. 22Pilato mwasũbĩrya ati, Ebyo nabirisaka, inabirisakabyo.

23Neryo abasĩrĩkanĩ babere babibamba Yesu yʼoko musalaba, mobaheka esyongimba siwe mobagabasyo mo magabo ani, oko buli mũsĩrĩkanĩ erĩgabo liguma. Kandi mobaheka ekanzu eyalukawa mo lukimba luguma-guma. Ekanzu eyo yabya butsira mulando, ĩyĩlũkĩre luguma-guma erĩtsũka endata nʼerĩhĩka omo yosĩ. 24Neryo abasĩrĩkanĩ mobabwirana bati, Situtuleyo, nĩkwa tukange obukanga busana nayo ngʼikandibya yandi, erĩberererya Amasako awakabũga ati,

Mobagaba esyongimba syage omo katĩkatĩ kabo,

Mobakanga obukanga busana nʼekanzu yage.

Neryo abasĩrĩkanĩ mobakola batya.

25Neryo nyĩnya wa Yesu, na mwali wabo nyĩnya, ye Marĩa muka Kleopa, na Marĩa Magdalene, babya bimene hakũhĩ nʼomusalaba wa Yesu. 26Neryo Yesu abere alangira koyo wuwe nʼomwiga oyo abya anzĩre, inianimene kahũhĩ, mwabwira nyĩnya ati, Mũkalĩ, lebaya, mugala wawe yoyũ! 27Neryo Yesu mwabwira omwiga oyo ati, Lebaya, koyo wawe yoyũ! Nʼerĩtsũka oko ndambĩ eyo omwiga oyo mwamutwala eka wuwe.

Erihola lya Yesu

(Mt 27.45-56; Mk 15.33-41; Lk 23.44-49)

28Neryo enyũma wʼaho Yesu ĩnĩanasĩ kwʼemyatsi yosĩ yamabihwa, Amasako abererere, mwabũga ati, Nyĩkwĩre enyota. 29Neryo erĩrega lyabyaho eryoswĩre mwʼepada. Neryo mobahĩra embũhũma yoswĩre mwʼepada, mobahĩrayo oko hĩsopa, mobahĩrayo oko buno buwe. 30Neryo abere abibuga erĩpũlya epada eyo, mwabũga ati, Byamahwa. Neryo mũnamya omutwe wuwe neryo mwataswahumula.

Erĩtũmo likatsimita olukanga lwa Yesu

31Neryo Abayũda kusangwa kyabya Kiro kyʼErĩkokotya, mobabũlya Pilato bati amagulu wʼabandu abĩtawa abũnangawe, neryo balũsĩbawe oko misalaba. Kusangwa sibabya banzĩre emibiri yabo ĩkasĩgala oko misalaba omo Sabato, kusangwa ekiro kyʼeSabato ekyo kyabya kiro kikulu. 32Neryo abasĩrĩkanĩ mobasa, mobabũna emihimbi yʼomundu wʼerĩmbere, nʼemihimbi yʼogundi mundu oyo wabambawa haguma na Yesu. 33Nĩkwa babere bahĩka uku Yesu, mobalebya kwʼamabihola, mobatabũna emihimbi yiwe. 34Nĩkwa omuguma gʼoko basĩrĩkanĩ mwatsimita omo lukanga luwe mwʼerĩtũmo, neryo-neryo omusasi nʼamagetsi mobyalũamo. 35Kandi oyo walangira omwatsi oyũ abĩrĩtũlago, nʼerĩtũlago liwe ni kwenene. Kandi anasĩ kwʼakabũga kwenene, neryo imwatoka erĩkĩrĩrya. 36Kusangwa emyatsi eyĩ moyabya itya, erĩberererya Amasako awakabũga ati, Erĩkũha liwe nʼeriguma sĩryendĩsyabũnwa. 37Kandi awandi Masako akabũga ati, Basyalangira oyo batsimita.

Eritabwa lya Yesu

(Mt 27.57-61; Mk 15.42-47; Lk 23.50-56)

38Enyũma wʼemyatsi eyĩ Yosefũ wʼoko mũyĩ wʼeArĩmatea mwayabũlya Pilato yʼehamũlĩ yʼeritwala omubiri wa Yesu. Yosefũ oyũ abya mwiga wa Yesu, nĩkwa omo bũbĩso-bĩso, busana nʼeriubaha Abayũda. Pilato mwamuha ehamũlĩ, neryo Yosefũ mwasa mwatwala omubiri wuwe. 39Kandi Nĩkodemo naye mwasa oyo watsũka erĩhĩka uku Yesu omo kiro, mwaleta erĩtũlũngana lyʼamane-mane nʼobukwa, nga kĩlo makũmĩ ani. 40Abandu babiri aba mobĩmya omubiri wa Yesu, mobasengago omo myenda yʼekĩtanĩ haguma nʼamanũkato awakakumba ndeke. Eyĩ ye mitsye yʼAbayũda yʼerita omundu. 41Nĩkwa aho Yesu abambirawa oko musalaba habya eririma. Omwʼirima erĩ mwabya eyisinda nyihya-nyihya, eyite yatatabwa mo mundu. 42Neryo busana nʼeKiro kyʼErĩkokotya kyʼAbayũda, kandi kusangwa eyisinda eyo yabya hakũhĩ naho, mobahĩra Yesu yʼomo.

Currently Selected:

Yoane 19: KB80

Highlight

Copy