Yoane 21

Yesu akabutukira abiga balinda

1Enyũma wʼemyatsi eyĩ, Yesu mwayĩkangya kandi oko biga buwe oko ngetsi yʼeTĩberĩa. Neryo mwayĩkangya kubo omo mũsĩndo oyũ. 2Sĩmonĩ Petero, na Toma oyukahulawa mo Muhasa, na Natanaelĩ wʼeKana yʼeGalĩlaya, nʼabagala ba Zebedayo, nʼabandi biga babiri, babya haguma. 3Sĩmonĩ Petero mwabwirabo ati, Ĩngye ngayasoha amahere. Mobamubwira bati, Netu tukagenda haguma nawe. Neryo mobahuluka mobingira omo bwato, nʼomo kiro ekyo mobatabana kindu. 4Nĩkwa bwabere bwasonda erikya, Yesu mwahangana oko mũsĩke wʼengetsi, nĩkwa abiga mobataminya kwʼali Yesu. 5Neryo Yesu mwabũlyabo ati, Bana, munawite amahere kwehĩ? Mobamũsũbĩrya bati, Iyihi. 6Neryo mwabwirabo ati, Muguse ebĩsohĩ byʼoko luhande lwʼamali lwʼobwato neryo mwasyabanago. Neryo mobagusa ebĩsohĩ, neryo-neryo mobataluka erikurabyo busana nʼamahere mangi. 7Neryo omwiga oyo Yesu abya anzĩre mwabwira Petero ati, Yo Mukama! Neryo omugulu Sĩmonĩ Petero owa kwʼali iyo Mukama, mwambala olukimba luwe, kusangwa abya iniabiriambula esyongimba siwe, neryo mwayigusa omo ngetsi. 8Abandi biga mobasa omo bwato buke ibanemukura obutaha-taha ĩbũnoswĩre nʼamahere, kusangwa sibabya hali oko mũsĩke, nga metre makũmĩ mwenda nʼĩbĩrĩ (92 m). 9Neryo babere bahĩka oko kitaka, mobalangira omuliro wʼamakala inianeho, nʼamahere oko muliro oyo, nʼobundu. 10Yesu mwabwirabo ati, Mulete oko mahere ago mukabisoha. 11Sĩmonĩ Petero mwayakura ebĩsohĩ oko kitaka, ĩbĩnoswĩre nʼamahere manenemanene, erĩgana nʼamakũmĩ atanu nʼawasatu (153); nomo anabya mangi, ebĩsohĩ mobitatulika. 12Yesu mwabwirabo ati, Mwase mulye. Sihabye omwiga oyo walenga erĩmũbũlya ati, Uwendi kwehĩ? Ĩbanasĩ kwʼali iyo Mukama. 13Neryo Yesu mwasa, mwĩmya obundu, mwahabobo. Kandi mwahabo nʼamahere.

14Eyĩ ni ngendo yʼakasatu Yesu akayĩkangya oko biga; abĩlũbũkĩbwa oko baholĩ.

Yesu na Petero

15Neryo babere babirya, Yesu mwabũlya Sĩmonĩ Petero ati, Sĩmonĩ, mugala wa Yoane, ũnanyanzĩre kwilaba aba kwehĩ? Naye mwamubwira ati, Ega, Mukama! Ũnasĩ ko nyĩkwanzĩre. Yesu mwamubwira ati, Ũtegaye ebyana byʼesyombũlĩ syage. 16Neryo Yesu mwamũbũlya engendo yʼakabiri ati, Sĩmonĩ, mugala wa Yoane, ũnanyanzĩre kwehĩ? Naye mwamũsũbĩrya ati, Ega, Mukama, ũnasĩ ko nyĩkwanzĩre. Yesu mwamubwira ati, Ũtegaye esyombũlĩ syage. 17Neryo Yesu mwamũbũlya engendo yʼakasatu ati, Sĩmonĩ, mugala wa Yoane, ũnanyanzĩre kwehĩ? Neryo Petero mwabya nʼobũlĩge kusangwa Yesu amamũbũlya engendo yʼakasatu ati, Ũnanyanzĩre kwehĩ? Neryo mwamubwira ati, Mukama, ũnasĩ emyatsi yosĩ, ũnasĩ ko nyĩkwanzĩre! Neryo Yesu mwamubwira ati, Ũtegaye esyombũlĩ syage. 18Kwenene, kwenene ngakubwira nyiti, omugulu wabya mũlwana, wabya igukayĩkũndĩka omo mukaba wawe, igukagenda eyo wanzĩre; nĩkwa ekiro wasyabya mũsyakulu, wasyakakya ebyala byawe, nʼogundi mundu asyakũkũndĩka omukaba, nʼerikutwala aho ũtanzĩre erigenda. 19Nĩkwa Yesu mwabũga ekĩ iniakahula omũsĩndo wʼoluholo olo Petero asyahola busana nʼeripipa Nyamuhanga. Neryo Yesu mwamubwira ati, Unyikwame!

Yesu nʼogundi mwiga

20Neryo Petero mwabinduka, mwalangira omwiga oyo Yesu anzĩre akakwamabo, yo mwiga oyo wabya akegemera oko kĩkũba kya Yesu okwʼirya lyʼerĩgolo-golo, nʼerĩbũga ati, Mukama, nindi yukakuhotera kwehĩ? 21Neryo Petero abere amulangira, mwabũga ati, Mukama, omundu oyo asyayira ati kwehĩ? 22Yesu mwamubwira ati, Namanza akasĩgalira erĩhĩka aho nasyasira, oyo ni mwatsi wawe kwehĩ? Uwe tanyikwama! 23Neryo ekĩnywa ekĩ mokyagenda-genda omo katĩkatĩ kʼabalĩkyabo, kiti ambu omwiga oyũ Siendisyahola. Nĩkwa Yesu mwatamubwira ati, Siendisyahola; nĩkwa ati, Namanza akasĩgalira erĩhĩka aho nasyasira, oyo ni mwatsi wawe kwehĩ?

24Oyũ yo mwiga oyũkatũla emyatsi eyĩ, kandi yo wasaka emyatsi eyĩ, netu tũnasĩ erĩtũlago liwe ko ni kwenene.

Eribũgabyo

25Nĩkwa hali eyindi myatsi mingi eyo Yesu akola. Kumbe eyosĩ yalisakawa mo muguma muguma, mbino ekihugo kyosĩ sĩkyangasũngĩre omwanya busana nʼebitabu ebyangasakĩrwe.

Currently Selected:

Yoane 21: KB80

Highlight

Copy