Emĩbĩrĩ 9

Erilama lya Saũlo

1Nĩkwa Saũlo iniakinahaya ati akĩta abiga bʼomukama, mwaya oko Mũhererĩ mukulu oko bahererĩ bosĩ! 2Neryo mwamusaba esyobarua oko manyũmba wʼerĩhĩndanamo eDamasĩkĩ, ati ameyayo abandu abakakwama Enzira yʼomukama, abalume kutse abakalĩ, iniatoka eribohabo nʼeritwalabo eYerũsalema.

3Neryo abere anemugenda akahĩka hakũhĩ nʼeDamasĩkĩ, neryo-neryo ekyakakala mokyalũa elubula mokyamũkolerya. 4Neryo mwawa oko kitaka, mowa omulenge akabũga naye ati, Saũlo, Saũlo! busana nakĩ ũkanyendereraya kwehĩ? 5Neryo Saũlo mwabũga ati, Ulindi kwehĩ Mukama? Naye mwabũga ati, Indi Yesu, oyo ũkendereraya. 6Nĩkwa uhangane, wingire omo mũyĩ, nʼeyo wasyabwirwa ebyo utolere iwakola. 7Nĩkwa abalume ababya naye oko lugendo mobahangana bũkũtũ, ĩbakowa omulenge oyo, nĩkwa isibetalangira mundu. 8Neryo Saũlo mwahangana oko kitaka, nĩkwa nomo meso wuwe abya alĩbũkere, mwatatoka erilangira kindu, mobamuwatako oko byala, mobamutwala eDamasĩkĩ. 9Neryo oko biro bisatu mwatatoka erilangira, kutse mwatalya kutse erĩpũlya kindu.

10Neryo eDamasĩkĩ habya mwiga muguma oyukahulawa mo Anania. Neryo Omukama mwabũga naye omo bũlĩme ati, Anania! Naye mwasũbĩrya ati, Lebaya, ĩngye yono, Mukama. 11Neryo Omukama mwabũga naye ati, Hangana, ugende omo nzira eyikahulawa mo Litunganene, Ũbũlaye omo nyũmba ya Yũda busana nʼomundu wʼeTarso, oyukahulawa mo Saũlo, kusangwa, lebaya, akasaba. 12Naye abirilangira omo bũlĩme omundu oyukahulawa mo Anania akingira omo nyũmba nʼerĩmũhĩra kwʼebyala, atoke eriswabana erilangira liwe. 13Neryo Anania mwasũbĩrya ati, Mukama, abandu bangi babirimbwira omwatsi wʼomundu oyo, ngoko abirikola abandu bawe eYerũsalema bo nabi kutsibu. 14Na hano eDamasĩkĩ awite ehamũlĩ yʼabahererĩ bakulu eriboha abosĩ abakalakira erĩna lyawe. 15Nĩkwa Omukama mwabwira Anania ati, Ugende, kusangwa nabiriyisogaye, erĩmĩnyĩsya erĩna lyage oko bʼEbihanda, nʼabami, nʼabana ba Ĩsraelĩ. 16Nage nasyamũkangya ebyosĩ ebyo asyagalwamo busana nʼerĩna lyage.

17Neryo Anania mwahongoka, mwingira omo nyũma eyo, kandi mwahĩra ebyala biwe uku Saũlo ati, Saũlo, mũlĩkyetu, Omukama Yesu amanyituma, oyo wakubutukirako omo nzira wasiramo. Abirinyituma iwatoka eriswabana erilangira lyawe, nʼerĩũsũlĩbwa mʼOmũlĩmũ Abũyĩrĩre. 18Neryo-neryo ebindu ebiri ngʼesyongũkũ mobyatoga bĩkalũa oko meso wuwe, neryo mwaswabana erilangira liwe, neryo mwahangana mwabatĩsĩbwa. 19Neryo Saũlo abere abirya akalyo, mwabana maka.

Saũlo akakangĩrĩraya eDamasĩkĩ

Neryo Saũlo mwasiba nʼabiga ebiro bike eDamasĩkĩ. 20Kandi mwaya neryoneryo omo manyũmba wʼerĩhĩndanamo akatũla engulu ya Yesu, ati ni Mugala wa Nyamuhanga. 21Neryo abosĩ abamowa mobasweka bati, Omundu oyũ si yo nʼoyo wĩta abandu ababya bakabirikira oko lĩna erĩ kwehĩ? Kandi, mwatahĩka enoka busana nʼomwatsi wʼeribohabo nʼeritwalabo oko bahererĩ bakulu kwehĩ?

22Nĩkwa Saũlo mwabana amaka omwʼikangĩrĩrya ĩnĩakasĩnga Abayũda ababya bĩkere eDamasĩkĩ, nʼerĩkangya ndeke Yesu kwʼali Kristo.

23Enyũma wʼebiro bingi, Abayũda mobahĩndana, mobaya embĩta yʼerĩĩta Saũlo. 24Nĩkwa Saũlo mwabwirwa omwatsi wʼembĩta yabo. Kandi mobalĩmbya esyongyo syʼomũyĩ, omo kiro nʼomo musibo bati bĩte Saũlo. 25Nĩkwa abiga buwe mobamũtswesya omo kiro, mobamwandagalya omo kitiri bakamũlabya omo mwanya wʼolũhĩmbo lwʼomũyĩ.

Saũlo akahĩka eYerũsalema

26Neryo Saũlo mwaya eYerũsalema, nʼeyo mwalenga erĩĩkala nʼabiga. Nĩkwa abosĩ mobamubaha ĩsĩbetalĩga kwʼali mwiga. 27Neryo Barnaba mwaminya omwatsi oyo, mwamuleta oko bakwenda, mwakanĩryabo ngoko Saũlo alangira Omukama yʼomo nzira, kandi ngoko Mukama abũga naye. Kandi mwabwirabo ngoko Saũlo akangĩrĩraya omwatsi omo lĩna lya Yesu eDamasĩkĩ butsira eriubaha. 28Neryo Saũlo mwasiba nabo iniakalendera omo mũyĩ wʼeYerũsalema erĩkangĩrĩrya butsira eriubaha, omo lĩna lyʼomukama. 29Kandi mwabya akabũga nʼerikuba obuhaka nʼAbayũda abakabũga omo Kĩgĩrĩkĩ. Nĩkwa mobasonda erĩmwĩta. 30Neryo abalĩkyetu babere babĩowa omwatsi oyo mobatwala Saũlo eKaĩsarĩa, mobamutuma eTarso.

31Neryo ekanĩsa yʼeYũdea hosĩ nʼeGalĩlaya, nʼeSamarĩa moyabya nʼobuholo. Kandi ekanĩsa moyayĩhĩmba, nʼerĩyĩgenderya omʼubaha lyʼomukama, nʼomwʼĩsĩbĩkya lyʼOmũlĩmũ Abũyĩrĩre, moyakanyirira.

Petero eLũda nʼeYopa

32Nĩkwa Petero mwalendera ehosĩ-hosĩ eyo, neryo mwandagalira oko bandu ba Nyamuhanga ababya bĩkere eLũda. 33Eyo Petero mweya yʼomundu oyukahulawa mo Aĩnea, oyo wabya alwere ĩsĩalĩlũa omo ngyingo yiwe emyaka munani, kusangwa abya abasĩre. 34Petero mwamubwira ati, Aĩnea, Yesu Kristo akakũlamaya. Hangana, usese engyingo yawe. Neryo-neryo Aĩnea mwahangana. 35Neryo abandu bosĩ ababya bĩkere eLũda nʼeSaronĩ mobamulolako, mobabindukira Omukama.

36Neryo eYopa habya omwiga muguma erĩna liwe iyo Tabĩta, eribindula erĩna liwe omo Kĩgĩrĩkĩ liti, Dorĩka kutse Isaswi. Omũkalĩ oyo abya akasiba erikola emĩbĩrĩ mibuya nʼerĩwatĩkya abera. 37Oko mugulu oyo Tabĩta mwalwala, neryo mwahola. Neryo mobakosa omubiri wuwe mobahĩrago omo kyumba kyʼendata. 38Neryo kusangwa eLũda abya mũyĩ hakũhĩ nʼeYopa, abiga babere babĩowa ko Petero abya eLũda, mobamutuma kwʼabandu babiri, erimulembalemba bati, Sulindirire, wase aho tuli. 39Neryo Petero mwahangana, mwagenda nabo. Neryo abere abĩhĩka, mobamutwala omo kyumba ekyʼendata. Nʼabakwakalĩ bosĩ mobimana hakũhĩ naye, ibanemulira, nʼerĩmũkangya esyokanzu nʼesyongimba esyo Dorĩka abya akasona akine nabo. 40Nĩkwa Petero mwahigira bosĩ bʼeyĩhya wʼekyumba ekyo, neryo mwakũkama, mwasaba, neryo mwakebera ekĩnda ekyo ati, Tabĩta, hangana! Naye mwalĩbũla ameso wuwe, neryo abere alangira Petero, mwayĩkũkũma mwĩkala. 41Neryo Petero mwamuha ebyala biwe, mwamũhanganĩa. Nĩkwa Petero mwabirikira abandu ba Nyamuhanga nʼabakwakalĩ, mwahĩra Tabĩta yo kubo ĩnĩanakalĩre. 42Neryo engulu yʼomwatsi oyo moyaminyikala eYopa hosĩ, nʼabandu bangi mobĩkĩrĩrya Omukama. 43Neryo Petero mwĩkala eYopa biro bingi omwʼomũbambĩ wʼebihu, ye Sĩmonĩ.

Currently Selected:

Emĩbĩrĩ 9: KB80

Highlight

Copy