Emĩbĩrĩ 8

1Neryo Saũlo abya akalĩga erĩĩta Setefano.

Saũlo akendereraya ekanĩsa

Oko kiro ekyo, erĩendererya lĩnene molyatsũka busana nʼekanĩsa eYerũsalema. Kandi abandu bosĩ bʼekanĩsa mobapanzikanira omo bihugo byʼeYũdea nʼeSamarĩa, abakwenda bate kubo. 2Nʼabandu bagenge mobata Setefano, mobamulira kutsibu.

3Nĩkwa Saũlo mwatsũka erĩherya ekanĩsa yo kutsibu, mwingira omo buli nyũmba akakura abalume nʼabakalĩ, nʼerĩhĩrabo omo mũlĩkĩ.

Fĩlĩpo akatũla Engulu Yowene eSamarĩa

4Neryo abapanzikana mobaya eyĩ nʼeyĩ bakatũla Engulu Yowene. 5Fĩlĩpo naye mwandagalira oko mũyĩ wʼeSamarĩa, neryo mwakangĩrĩryabo Kristo. 6Neryo esyondeko syako mobatega matwĩ wabo oko byo Fĩlĩpo abũga. Abosĩ mobahulikirira, nʼerilangira ebitiko-tiko ebyo akola. 7Ebĩrĩmũ bibi mobyalũa oko bandu bangi ĩbĩkabũga nʼomulenge munene; kandi abandu bangi ababasĩre nʼebirema, mobalamĩbwa. 8Nĩkwa mohabya obutseme bunene eSamarĩa.

9Neryo habya mundu muguma oyukahulawa mo Sĩmonĩ, oyutula akakola obusaki omo mũyĩ oyũ wʼeSamarĩa. Abya akaswekya Abanya Samarĩa, iniakayahula mo mundu mukulu. 10Neryo abandu bosĩ, bʼomo mũyĩ oyo, abakebake, nʼabakulu-bakulu, mobamuhulikirira bati, Omundu oyũ, yo yukahulawa mo Bũtokĩ Bunene bwa Nyamuhanga. 11Neryo babya bakamuhulikirira kusangwa abya ĩnĩakaswekayabo ebiro bingi omo busaki buwe. 12Nĩkwa omugulu bĩkĩrĩraya erĩtũlaganĩa lya Fĩlĩpo lyʼEngulu Yowene yʼobwami bwa Nyamuhanga, nʼeyʼerĩna lya Yesu Kristo, mobabatĩsĩbwa, abalume nʼabakalĩ. 13Sĩmonĩ naye mwĩkĩrĩrya neryo abere abĩbatĩsĩbwa, mwĩkala hakũhĩ na Fĩlĩpo, iniakasweka akalangira ebiminyikalo, nʼebitiko-tiko ebyakolawa.

14Neryo abakwenda ababya eYerũsalema babere bowa ngoko abandu bʼeSamarĩa babiriangirira ekĩnywa kya Nyamuhanga, mobatuma kubo ko Petero na Yoane. 15Nabo mobandagalirayo, mobasabirabo bati bangirire Omũlĩmũ Abũyĩrĩre. 16Kusangwa Omũlĩmũ Abũyĩrĩre abya ĩsyalĩahĩka kubo. Babya ĩbamatabatĩsĩbwa lisa omo lĩna lyʼomukama Yesu. 17Neryo Petero na Yoane mobahĩra kubo kwʼebyala, neryo mobangirira Omũlĩmũ Abũyĩrĩre.

18Nĩkwa Sĩmonĩ abere alangira ngoko Mũlĩmũ Abũyĩrĩre ahabawa busana nʼerĩhĩra lyʼebyala byʼabakwenda, Sĩmonĩ mwahererya Petero na Yoane bʼobũgũlĩ. 19Ati, Nage, mumbe ehamũlĩ eyĩ, neryo ukwʼoyo nasyahĩra kwʼebyala asyangirira Omũlĩmũ Abũyĩrĩre. 20Nĩkwa Petero mwamũsũbĩrya ati, Obũgũlĩ bwawe buhere haguma nawe, kusangwa waganĩraya uti wangabana olũsũnzo lwa Nyamuhanga lʼomo bũgũlĩ! 21Suwite ekihande kutse erĩgabo omo mũbĩrĩ oyũ, kusangwa omutima wawe siatunganene embere sya Nyamuhanga. 22Neryo ubindule omutima wawe uleke obubi bwawe obũ, usabe Omukama, erisonda lyʼomutima wawe, libuyirawe ukʼuwe. 23Kusangwa namalangira goswĩre mʼobũha bũkalĩre, nʼomo mũlĩkĩ wʼebibi. 24Neryo Sĩmonĩ mwabwira Petero na Yoane ati, Ĩnywe munyisabire oko Mukama, emyatsi mũkabĩbũga eyĩ sĩyĩmbĩkeko nʼomuguma.

25Neryo Petero na Yoane, babere babĩtũla omwatsi go ndeke, nʼerĩbũga ekĩnywa kyʼomukama, mobatsũka erisuba eYerũsalema. Neryo omo nzira mobatũla Engulu Yowene omo hĩyĩ hingi hyʼAbanya Samarĩa.

Fĩlĩpo nʼOmũbĩkĩ wʼeEtĩopĩa

26Nĩkwa omũlaĩka wʼomukama mwabũga na Fĩlĩpo ati, Uhangane, ugende oko kitambi kyʼeyĩkwa oko nzira eyikandagala ĩkalũa eYerũsalema eriya eGaza. Eyĩ ni nzira yʼembwarara. 27Neryo Fĩlĩpo mwahangana mwayayo. Neryo habya omundu oyũbũnĩre owʼeEtĩopĩa, iniakasuba ewabo. Omundu oyo abya mundu mukulu oyukabika ebindu byosĩ byʼomwamikalĩ ye Kandake wʼeEtĩopĩa. Kandi abya ĩnĩayĩre eYerũsalema erĩyaramya Nyamuhanga, 28iniakasuba eEtĩopĩa omo galĩ yiwe. Omugulu abya akagenda omo galĩ yiwe eyo, abya akasoma omo kitabu kyʼomũmĩnyererĩ Ĩsaya. 29Neryo Omũlĩmũ Abũyĩrĩre mwabwira Fĩlĩpo ati, Ugende, uyitomeke oko galĩ eyo. 30Neryo Fĩlĩpo mwatibita eyo ali, nĩkwa mowa akasoma ekitabu kyʼomũmĩnyererĩ Ĩsaya, neryo mwamũbũlya ati, Unemuminya ebyo ukasoma kwehĩ? 31Nĩkwa omukulu oyo mwabũga ati, Ko nangaminya nyiti ndawite oyũkanyowĩsayabyo kwehĩ? Neryo mwabũlya Fĩlĩpo ati asambire oko galĩ nʼerĩĩkala naye. 32Nĩkwa omulondo wʼAmasako awabya akasoma waya, ati,

Abya ngʼembũlĩ eyikatwalawa erikerwa,

Abya ngʼekyana kyʼembũlĩ ekikabya bũkũtũ omugulu bakatwa obweya bwakyo.

Mwatabũga kĩnywa nʼekiguma.

33Kandi mwahemulwa, kandi mobamukaga erĩbanza.

Nindi wasyatũla omwatsi wʼabana buwe kwehĩ?

Kusangwa engebe yiwe omo kihugo yabĩrĩlũsĩbwaho.

34Neryo omukulu oyo mwabũga na Fĩlĩpo ati, Unyibwire omũmĩnyererĩ ngʼakahulandi. Akayahula kutse akahula ogundi kwehĩ? 35Neryo Fĩlĩpo mwatsũka oko mulondo oyo wʼAmasako, mwamũtũlĩra Engulu Yowene ya Yesu. 36Neryo babere bakagenda omo nzira eyo, mobahĩka ahabya magetsi, neryo omukulu oyo mwabũga ati, Lebaya, hano hali amagetsi! Ekyanganyĩkakĩrya erĩbatĩsĩbwa ni kyahi kwehĩ? [ 37Neryo Fĩlĩpo mwabũga naye ati, Wangahatĩsĩbwa Wamĩkĩrĩrya nʼomutima wawe gosĩ. Naye mwasũbirya ati, Namĩkĩrĩrya ko Yesu Kristo ni Mugala wa Nyamuhanga.] 38Neryo mwahamula ati egalĩ ihangane, neryo ababiri bosĩ, Fĩlĩpo nʼomukulu oyo, mobandagalira omo magetsi, na Fĩlĩpo mwamũbatĩsya. 39Neryo omugulu balũa omo magetsi, Omũlĩmũ wʼomukama mwabakula Fĩlĩpo, nʼomukulu oyo mwataswamulolako, nĩkwa mwaya omo lugendo luwe ĩnĩatsemĩre ndeke. 40Neryo Fĩlĩpo mwayabanika eAzoto. Neryo mwalaba omo mĩyĩ yosĩ ĩnĩakatũla Engulu Yowene, erĩhĩka e Kaĩsarĩ.

Currently Selected:

Emĩbĩrĩ 8: KB80

Highlight

Copy