Emĩbĩrĩ 10

Petero na Kornelĩo

1Neryo Ekaĩsarĩa yabya omundu oyukahulawa mo Kornelĩo. Abya mukulu wʼekisambala kyʼabasĩrĩkanĩ erĩgana, abakahulawa mo mulondo wʼeĩtalĩa. 2Abya mundu wʼeKisomo, oyo wabya akaramya Nyamuhanga, iye nʼenyũmba yiwe yosĩ. Kandi mwabya akaha ebindu byʼoko bera bʼAbayũda, kandi abya akasaba Nyamuhanga emigulu yosĩ. 3Neryo hakũhĩ nʼesaa mwenda yʼeritungi, mwalangira ndeke omo bũlĩme omũlaĩka wa Nyamuhanga akamũhĩkako, nʼerimubirikira ati, Kornelĩo! 4Neryo mwasamalira omũlaĩka oyo nʼeriubaha lĩnene, ati, Mukama, ũtĩkĩ kwehĩ? Neryo omũlaĩka mwamubwira ati, Nyamuhanga abĩrĩrĩga erisaba lyawe, nʼolũsũnzo lwawe, kandi abirikwibuka. 5Na lino Utume abandu bʼeYopa, ubirikire eyo yʼomundu erĩna liwe yo Sĩmonĩ, kandi akahulawa mo Petero. 6Ĩkere haguma nʼomũbambĩ wiebihu, oyukahulawa mo Sĩmonĩ. Enyũmba yiwe iri hakũhĩ nʼengetsi. 7Neryo omũlaĩka oyo wabũga naye abere abigenda, Kornelĩo mwabirikira abagombe buwe babiri nʼomũsĩrĩkanĩ muguma wʼekisomo, oyo wabya akamukolera. 8Neryo mwatumabo eYopa iniamabibwirabo ndeke emyatsi yosĩ eyo.

9Neryo engyakya abakwenda aba ibane omo nzira ibakasonda erĩhĩka eYopa, Petero mwaya omo kyumba kyʼendata akayasaba, hakũhĩ nʼesaa sĩta. 10Neryo Petero mwakwa enzala mwasonda erirya. Nĩkwa omugulu babya bakahũka kalyo, Petero mwayato, mwalota. 11Neryo mwalebya olubula ilukingukere, neryo ekindu ngʼolukimba lunene olũkandagalĩbawa omo syosondo ĩnĩ syalo erĩhĩka oko kitaka. 12Ituli mwʼesyonyama esyʼamagulu ani, nʼesyonzoka, nʼesyonyonyũ syʼekyanya. 13Neryo omulenge mwamũhĩkako ati, Petero, hangana, ũsĩnze, ulye. 14Nĩkwa Petero mwabũga ati, Lero iyihi, Mukama! Sindinatalya na kera ekindu kĩtabũyĩrĩre kutse ekĩtũnda-tũndĩre. 15Neryo omulenge mwamubwira engendo yʼakabiri ati, Ebyo Nyamuhanga abĩrĩerya, isiwaswahulabyo mo bĩtabũyĩrĩre. 16Omwatsi oyo mwahĩka engendo ĩsatu; neryo-neryo ekindu ekyo mokyasumbirwa omo kyanya.

17Neryo Petero mwahanga-hangya omo bũlengekanĩa buwe erilota eryo alangira nga nĩkĩ. Neryo, lebaya, abalume abo Kornelĩo atuma, babere babĩbũlya busana nʼenyũmba ya Sĩmonĩ, mobimana oko lũkyo. 18Mobabirikira Ĩbakabũlaya Sĩmonĩ Petero ngʼanĩkereho. 19Neryo omugulu Petero akĩnaganĩraya omwatsi wʼerilota eryo, Omũlĩmũ mwamubwira ati. Lebaya! abandu basatu bakakusonda-sonda. 20Nĩkwa hangana, Wandagale eyĩkwa, ugende nabo; sutika-tike, kusangwa ĩngye natumabo. 21Neryo Petero mwandagalira oko bandu abo, mwabũga nabo ati, Lebaya, ĩngye indi oyo mukasonda-sonda. Mũlĩasirakĩ kwehĩ? 22Nabo mobabũga bati, Kornelĩo, omukulu wʼerĩgana, ni mundu utunganene oyũkaramaya Nyamuhanga, kandi akakengawa nʼabandu bosĩ bʼAbayũda. Ahanawa nʼomũlaĩka wa Nyamuhanga akutumireko eriya ewuwe, owe ebĩnywa byawe. 23Neryo Petero mwakokyabo omo nyũmba mwahabo ahʼerigotsera.

Engyakya Petero mwahangana mwagenda nabo, nʼabandi balĩkyetu bʼeYopa mobagenda haguma naye. 24Neryo engyakya Petero mwahĩka eKaĩsarĩa. Nĩkwa Kornelĩo abya akalindabo, iniabiribirikira abʼekĩtũnga kiwe nʼabĩra buwe. 25Neryo omugulu Petero abya akingira omo nyũmba, Kornelĩo mwahĩndana naye, mwatũlama oko bisando biwe, nʼerĩmũramya. 26Nĩkwa Petero mwamũhanganĩa ati, Hangana, ĩngye nage indi mundu. 27Neryo Petero abere akakanĩa naye, mwingira omo nyũmba, mweya bandu bangi ĩbamabĩhĩndana. 28Neryo mwabwirabo ati, Ĩnywe mũnasĩ ngoko Mũyũda siatolere omo Migambo erisiba kutse eriyabana omundu wʼekindi kihanda. Nĩkwa Nyamuhanga abĩrĩnyĩkangya ati sinangahula omundu mo mubi kutse oyũtsandĩre. 29Kyo kyalekĩre masa, isinditagana omugulu mwanyibirikira. Neryo ngababũlaya nga mwamanyitumirako busana nakĩ?

30Neryo Kornelĩo mwabũga ati, Byamatakya biro bini, oko ndambĩ ngʼeno, nabya ngasabira omo nyũmba yage oko saa mwenda yʼeritungi, Neryo lebaya, omundu wʼesyongimba sĩhenĩrye mwimana embere syage, 31ati, Kornelĩo! Nyamuhanga abĩrĩowa erisaba lyawe, kandi abiryibuka olũsũnzo lwawe. 32Utume omundu yʼeYopa, ubirikire Sĩmonĩ oyukahulawa mo Petero, ase ewawe, Ĩkere omo nyũmba ya Sĩmonĩ omũbambĩ wʼebihu, naye ĩkere hakũhĩ nʼengetsi. 33Neryo-neryo monakutumirako, nawe wamayira ndeke ũkahĩka. Na lino ĩtwe bosĩ tune hano emuliro wa Nyamuhanga erĩowa ebyosĩ ebyo Mukama abirikuhana.

Erĩbũga lya Petero

34Neryo Petero mwatsũka erĩbũga ati, Namaminya ndeke lino ngoko Nyamuhanga siawite ebitaga. 35Nĩkwa omo buli kihanda omundu oyukubaha Nyamuhanga, nʼerikola ebitunganene akalĩgawa naye. 36Nyamuhanga mwatuma ekĩnywa oko bandu ba Ĩsraelĩ, erĩtũla Engulu Yowene yʼobuholo busana na Yesu Kristo, naye ni Mukama wʼabandu bosĩ. 37Ĩnywe mũnasĩ omwatsi owahĩka eYũdea hosĩ, erĩtsũka eGalĩlaya, enyũma wʼerĩbatĩsya eryo Yoane akangĩrĩraya. 38Kandi mũnasĩ Yesu wʼeNazaretĩ, ngoko Nyamuhanga amũtũlĩra Omũlĩmũ Abũyĩrĩre nʼobũtokĩ. Yesu mwalendera ehosĩ akakola ebibuya, nʼerĩlamya abosĩ abanũbĩbawa nʼeSatanĩ, kusangwa Nyamuhanga abya haguma naye. 39Netu tuli balangĩrĩ bʼemyatsi yosĩ Yesu akola omo kihugo kyʼAbayũda nʼeYerũsalema. Kandi mobamwĩta nibya erimukongomerera oko musalaba. 40Nĩkwa Nyamuhanga mwamũlũbũkya enyũma wʼebiro bisatu, kandi mwaleka inialolwako. 41Nĩkwa abandu bosĩ mobatamulolako, nĩna twe twabya balangĩrĩ abo Nyamuhanga ayisoga erĩmbere, Ĩtwe motwalya nʼerĩpũlya haguma naye abĩlũbũka oko baholĩ. 42Neryo Yesu mwatuhana ati tũkangĩrĩraye Engulu Yowene oko bandu, nʼerĩtũlago kwʼali Oyo Nyamuhanga ahĩra mo Mũtswerĩ wʼabaliho, nʼomũtswerĩ wʼabaholĩre. 43Abamĩnyererĩ bosĩ mobatũla omwatsi wuwe bati, Omo bũtokĩ bwʼerĩna liwe obuli mundu oyũkamwĩkĩrĩraya abiribana eribuyira lyʼebibi.

AbʼEbihanda bakangirira Omũlĩmũ Abũyĩrĩre

44Neryo Petero abere akĩnabũga ebĩnywa ebĩ, Omũlĩmũ Abũyĩrĩre mwawa oko bosĩ abowa ebĩnywa ebĩ. 45Neryo abikĩrĩrye bosĩ bʼAbayũda abasa haguma na Petero mobasweka, kusangwa Nyamuhanga mũtũlĩra abʼEbihanda nibya olũsũnzo lwʼOmũlĩmũ Abũyĩrĩre. 46Kusangwa bowabo bakabũga omo yindi mĩbũge, ĩbakahamaya Nyamuhanga. Neryo Petero mwabũga ati, 47Abandu aba babiriangirira Omũlĩmũ Abũyĩrĩre nga twe, Ko nindi angakagabo erĩbatĩsĩbwa omo magetsi kwehĩ? 48Neryo Petero mwahana ati babatĩsĩbawe omo lĩna lya Yesu Kristo. Neryo mobabũlya Petero bati ĩkale nabo ebindi biro.

Currently Selected:

Emĩbĩrĩ 10: KB80

Highlight

Copy