Emĩbĩrĩ 11

Erĩkanĩa lya Petero omo Kanĩsa yʼe Yerũsalema

1Neryo abakwenda nʼabalĩkyetu ababya eYũdea hosĩ mobowa kwʼEbihanda nibya byabiriangirira ekĩnywa kya Nyamuhanga. 2Kandi omugulu Petero ahetukira eYerũsalema, ababya babwene mobalwa naye, 3bati, Uwe mowaya omo nyũmba yʼabandu batabwene, kandi mowalya haguma nabo. 4Nĩkwa Petero mwatsũka erĩkanĩryabo, nʼeritondekago mo muguma muguma, ati,

5Nabya oko mũyĩ wʼeYopa iningasaba. Monalota omo nzolĩ. Monalangira ekindu ngʼolukimba lunene olũkandagalĩbawa omo syosondo, ĩlũkalũa omo kyanya, neryo mokyambĩkako. 6Neryo nabere ngasamalirakyo, nʼerilola kukyo, monalangira esyonyama syʼamagulu ani syʼekihugo, nʼesyonyama esyʼomolĩ nʼesyonzoka, nʼesyonyonyũ syʼekyanya. 7Kandi monowa omulenge akabũga nage ati, Petero, hangana, ũsĩnze, ulye! 8Nĩkwa monabũga nyiti, Lero iyihi Mukama! Kusangwa sindinatalya na kera ekindu kĩtabũyĩrĩre kutse ekĩtũndatũndĩre. 9Neryo omulenge mwalũa elubula mwasũbĩrya engendo yʼakabiri ati, Ebyo Nyamuhanga abĩrĩerya, isiwahulabyo mo bĩtabũyĩrĩre. 10Omwatsi oyũ mwahĩka engendo ĩsatu, neryo-neryo ekyo mokyasumbirwa omo kyanya. 11Neryo lebaya, oko saa eyo; abandu basatu mobahĩka embere wʼenyũmba eyo twabya twĩkeremo, ibabiritumwa ũkwʼĩngye bakalũa eKaĩsarĩa. 12Neryo Omũlĩmũ mwambwira ati, nyigende nabo butsira eritika-tika. Neryo abalĩkyetu ndatu aba mobagenda haguma nage eKaĩsarĩa, neryo motwingira omo nyũmba ya Kornelĩo. 13Naye mwatubwira ngoko alangira omũlaĩka inianimene omo nyũmba yiwe, oyo wamubwira ati, Utume omundu yʼeYopa ubirikire Sĩmonĩ oyukahulawa mo Petero, ase hano; 14Naye asyakũtũlĩra ebĩnywa ngoko wasyalamĩbwa, uwe nʼenyũmba yawe yosĩ. 15Neryo omugulu natsũka erĩbũga, Omũlĩmũ Abũyĩrĩre mwandagalira kubo ngoko atwandagalirako erĩmbere. 16Neryo monibuka ekĩnywa Omukama abũga ati, Yoane abatĩsaya omo magetsi, nĩkwa ĩnywe mwasyabatĩsĩbwa omo Mũlĩmũ Abũyĩrĩre. 17Neryo Nyamuhanga mwahabo olũsũnzo olo atuha twabĩkĩrĩrya Omukama Yesu Kristo, nage nabyandi nyiti nangatoka erĩkakĩrya Nyamuhanga kwehĩ? 18Neryo babere bowa ebyo, mobabya bũkũtũ, mobapipa Nyamuhanga bati, Kwesĩ, Nyamuhanga abiriha oko Bihanda nibya eribindula omutima nʼeribana engebe.

Ekanĩsa yʼeAntĩokĩa

19Neryo abĩkĩrĩrye mobapanza-panzwa busana nʼerĩendererya eryatsũka ekiro Setefano ĩtawa. Abandi mobaya eFoĩnĩkĩ, nʼeKĩpũro, nʼeAntĩokĩa, ibakabwira Abayũda basa ekĩnywa kya Kristo. 20Nĩkwa abandi ba kubo, abandu bʼeKĩpũro, nʼabʼeKũrene, mobahĩka eAntĩokĩa, ĩbakabũga nʼAbagĩrĩkĩ nibya, ĩbakatũla Engulu yʼomukama Yesu. 21Kandi Omukama abya haguma nabo, nʼabandu bangi mobĩkĩrĩrya mobabindukira Omukama.

22Nʼengulu yabo moyahĩka oko kanĩsa yʼeYerũsalema, neryo mobatuma Barnaba eAntĩokĩa. 23Neryo abere ahĩka nʼerilangira olukogo lwa Nyamuhanga, mwatsema, neryo mwahanabo ati, abosĩ bakwame Omukama nʼomutima asĩkĩre, nʼeritendiregula. 24Barnaba abya mundu mubuya, ĩnĩoswĩre nʼOmũlĩmũ Abũyĩrĩre nʼerĩkĩrĩrya. Kandi abandu bangi mobakwama Omukama.

25Neryo Barnaba mwaya eTarso erĩyasondya Saũlo. 26Neryo abere amubana eyo mwamuleta eAntĩokĩa. Neryo omo mwaka muguma mobahĩndana nʼabandu bʼekanĩsa, mobakangĩrĩrya abandu bangi. Nĩkwa eAntĩokĩa yo abiga batsũkĩra eriahulwa mo Bakristo.

27Neryo oko biro ebyo, abandi bamĩnyererĩ mobaya eAntĩokĩa bakalũa eYerũsalema. 28Neryo omuguma wa kubo erĩna liwe iyo Agabo, mwahangana, mwaminyerera omo bũtokĩ bʼOmũlĩmũ ati, Hakandisyabya enzala nene omo kihugo kyosĩ. Nĩkwa enzala eyĩ moyahĩka omwʼitabala lyʼomũtabalĩ mukulu ye Klaũdĩo. 29Neryo obuli mundu wʼoko biga mobayĩsũnza erituma esyofranka ngoko bangatoka busana nʼomũbĩrĩ wʼerĩwatĩkya abalĩkyetu abĩkere eYũdea. 30Neryo mobakola batya, mobatuma esyofranka oko bakulu bʼekanĩsa omo byala bya Barnaba na Saũlo.

Currently Selected:

Emĩbĩrĩ 11: KB80

Highlight

Copy