Emĩbĩrĩ 12

Erĩswendererya

1Neryo oko mugulu oyo omwami Herode mwahamba abandi bandu bʼekanĩsa, erikola bo nabi. 2Neryo mwĩta Yakobo mugala wabo Yoane omo mũyalĩ. 3Neryo abere alangira ko kyamatsemesya Abayũda, mwahamba Petero nibya. Omwatsi oyũ abya omo Biro Bikulu byʼErirya Obundu Bute mo Kĩhamya. 4Neryo abere ahamba Petero, mwamũhĩra omo mũlĩkĩ, ĩnĩakamũhĩra omo byala byʼemilondo ĩnĩ yʼabasĩrĩkanĩ ati bamũtegaye. Obuli mulondo abya wʼabasĩrĩkanĩ bani. Herode aganĩraya erĩhũlũkya Petero embere syʼabandu enyũma wʼEbiro Bikulu byʼErikiruka. 5Neryo mobateya Petero yʼomo mũlĩkĩ, nĩkwa abandu bʼekanĩsa mobasaba Nyamuhanga yo kutsibu busana naye.

Petero akaboholawa

6Neryo oko kiro ekyo Herode asonda erĩmũhũlũkya, Petero abya agotsere omo katĩkatĩ kʼabasĩrĩkanĩ babiri. Nĩkwa abya abohĩre omo mahulula abiri, nʼabateya ibanimene embere wʼolũkyo bakateya enyũmba yʼomũlĩkĩ. 7Neryo lebaya, omũlaĩka wʼomukama mwabulukirabo, nʼekyakakala mokyakolerya omo kyumba ekyo. Neryo omũlaĩka mwabanda uku Petero oko lukanga, mwamũbũkya ati, Hangana lũba! Neryo amahulula mwalũa oko byala biwe. 8Neryo omũlaĩka mwamubwira ati, wambale esyongimba nʼesyongendero syawe. Neryo Petero mwakola atya. Neryo omũlaĩka mwamubwira ati, Ũyĩrĩngĩre kwʼolukimba lwawe, Unyikwame! 9Neryo Petero mwamukwama erĩlũa omo nyũmba yʼomũlĩkĩ, ĩsĩasĩ ebyo mũlaĩka akola nga ni kwenene, nĩkwa mwaganĩrya ati akakola omwʼilota. 10Neryo mobalaba oko mũteya wʼerĩmbere, nʼowʼakabiri, neryo mobahĩka oko lũkyo lwʼekyuma olukalola oko mũyĩ. Olũkyo olo molwayikingula ĩlolwenelwene, neryo mobaya eyĩhya mobalaba omo nzira nguma, neryo-neryo omũlaĩka mwasĩganĩa Petero.

11Neryo Petero abere abibuka mwabũga ati, Lino namaminya ndeke ko Mukama abirituma omũlaĩka wuwe. Kandi abĩrĩnyĩtongolya omo byala bya Herode, nʼoko myatsi yosĩ Abayũda basonda erinyikola.

12Neryo Petero abere abiminya ekyo, mwaya omo nyũmba ya Marĩa, nyĩnya wa Yoane Marĩko, aho abandu bangi babya ĩbabĩrĩhĩndana nʼerisaba. 13Neryo Petero abere ahumanga oko lũyĩ lwʼeyĩhya, omwana-muto mugombe erĩna liwe iyo Roda mwasaho oko lũyĩ. 14Neryo abere abiminya omulenge wa Petero, mwatakingula Olũyĩ busana nʼobutseme, nĩkwa mwatibita omo nyũmba mwatũlago ati, Petero animene eyĩhya oko lũyĩ. 15Nabo mobamubwira bati, Uli mũsĩre! Nĩkwa Roda mwayitsinga ati ni kwenene. Nabo bati, nĩ mũlaĩka wuwe! 16Nĩkwa Petero mwayitsinga erihumanga oko lũyĩ. Neryo mobakingulaho, mobamulolako, mobasweka. 17Nĩkwa Petero mwakoheryabo ati babye bũkũtũ, neryo mwakanĩryabo ngoko Mukama amusondola erĩmũlũsya omo nyũmba yʼomũlĩkĩ. Ati, Mubwire Yakobo nʼabalĩkyetu emyatsi eyĩ. Neryo mwalũaho mwaya ehandi.

18Neryo bwabere bwakya, mohabya eriganga-ganga omo katĩkatĩ kʼabasĩrĩkanĩ Petero ngʼayĩre hahi. 19Kandi Herode mwamusonda-sonda, nĩkwa mwatamubana. Neryo mwabũlya abateya bo ndeke, neryo mwategeka ati abateya bĩtawe.

Neryo Herode mwandagalira eKaĩsarĩa akalũa eYũdea, neryo mwasibayo ndambĩ.

Oluholo lwa Herode

20Nĩkwa Herode mwahitana oko bandu bʼeTĩro nʼeSĩdona. Nabo mobagenda haguma uku Herode ibamabisakana na Balasto ayũkategaya ekikali kyʼOmwami. Nĩkwa mobasaba Herode yʼobuholo kusangwa ekihugo kyabo kyabya kikabana akalyo kabo omo kihugo kyʼOmwami.

21Neryo oko kiro kyayisogawa, Herode mwambala olukimba lwʼobwami, mwĩkala oko kĩtũmbĩ kiwe kyʼobwami, neryo mwatsũka erĩkanĩrya bandu. 22Neryo abandu mobũta obogo bati, Ni mulenge wa Nyamuhanga, si mulenge wʼomundu! 23Neryo-neryo omũlaĩka wʼomukama mwaswĩrya Herode, kusangwa mwataha Nyamuhanga yʼolukengerwa. Neryo mwalibwa nʼemihuka, mwahola.

24Nĩkwa ekĩnywa kyʼomukama mokyakula nʼerikanyirira.

25Neryo Barnaba na Saũlo mobalũa eYerũsalema, ibamabibuga omũbĩrĩ wabo. Mobaletanĩa Yoane Marĩko haguma nabo.

Currently Selected:

Emĩbĩrĩ 12: KB80

Highlight

Copy