Emĩbĩrĩ 13

Bakayisoga Barnaba na Saũlo nʼeritumabo

1Nĩkwa eAntĩokĩa yabya abamĩnyererĩ nʼabakangĩrĩrya omo kanĩsa eyabyayo. Ye Barnaba, na Sĩmeonĩ oyukahulawa mo Mwĩragũlũ, na Lũkĩo wʼeKũrene, na Manaenĩ oyo walemberawa haguma nʼomwami Herode, na Saũlo. 2Neryo omugulu babya bakakolera Omukama nʼeritsira akalyo, Omũlĩmũ Abũyĩrĩre mwabũga ati, Munyisombolere Barnaba na Saũlo busana nʼomũbĩrĩ ogo nabirikirirabo. 3Neryo babere batsira akalyo nʼerisaba, mobahĩra kubo kwʼebyala, mobatumabo.

EKĩpũro

4Neryo Omũlĩmũ Abũyĩrĩre abere abituma Barnaba na Saũlo, mobandagalira eSeleũkĩa, nʼerĩlũa eyo mobaya omo bwato oko kitsira kyʼeKĩpũro. 5Neryo babere bahĩka eSalamĩ, mobatũla ekĩnywa kya Nyamuhanga omo manyũmba wʼerĩhĩndanamo wʼAbayũda. Kandi Yoane Marĩko abya mũwatĩkya wabo oko mũbĩrĩ.

6Neryo babere babirendera omo kitsira ekyo kyʼeKĩpũro kyosĩ erĩhĩka ePafo, mobahĩndana nʼomũkũmũ muguma, omũmĩnyererĩ wʼamabehĩ wʼAbayũda, erĩna liwe Bara-Yesu. 7Omũkũmũ oyo abya haguma nʼomũtabalĩ Sergĩo Paũlo, omundu wʼamenge. Nĩkwa Sergĩo Paũlo oyo mwabirikira Barnaba na Saũlo iniakasonda erĩowa ekĩnywa kya Nyamuhanga. 8Nĩkwa omũkũmũ Elema (erĩna liwe omo Kĩgĩrĩkĩ lyabya litya) mwalwa nabo, iniakasonda eribindula omũtabalĩ oyo syĩkĩrĩraye. 9Nĩkwa Saũlo, oyo wahulawa mo Paũlo, ĩnĩoswĩre nʼOmũlĩmũ Abũyĩrĩre, mwatungerera Elema, 10nʼerimubwira ati, Uwe, goswĩre mwʼeriteba lyosĩ nʼobũlĩbalĩbanĩa, uwe mugala wʼeSatanĩ, uwe nzĩgũ yʼebitunganene byosĩ! Sĩwendĩsyũmbya erĩhengemya esyonzira situnganene syʼOmukama kwehĩ? 11Na lino lebaya! ebyala byʼomukama bikalwa nawe, Ukandibya ndĩmatĩme isiwendisyalangira ekyakakala oko katambĩ. Neryoneryo ekihohe nʼomwĩrĩmya mobyamubyako, neryo Elema mwalendera akamatamata oyo wangamuwatako oko byala erimusondola. 12Neryo omũtabalĩ oyo mwĩkĩrĩrya, abere alangira ebyakolawa. Kandi mwasweka busana nʼerĩkangĩrĩrya lyʼomukama.

Paũlo na Barnaba bakahĩka eAntĩokĩa yʼePĩsĩdĩa

13Nĩkwa Paũlo nʼabalĩkyabo mobalũa ePafo omo bwato mobahĩka ePerga omo kihugo kyʼePamfĩlĩa, nĩkwa Yoane Marĩko mwasĩgabo mwasuba eYerũsalema. 14Kandi mobalũa ePerga mobaya eAntĩokĩa yʼePĩsĩdĩa. Neryo oko kiro kyʼeSabato mobaya omo nyũmba yʼerĩhĩndanamo, mobĩkala. 15Neryo enyũma wʼerisoma omo Migambo ya Musa, nʼamasako wʼabamĩnyererĩ, abakulu bʼenyũmba yʼerĩhĩndanamo mobatuma uku Paũlo na Barnaba bati, Balĩkyetu, mwamabya muwite ekĩnywa kyʼerihana bandu, mũbũgekyo. 16Neryo Paũlo mwahangana, mwakoheryabo omo byala ati,

Ĩnywe balume ba Ĩsraelĩ, ĩnywe mukakenga Nyamuhanga, muhulikirire! 17Nyamuhanga wʼabandu ba Ĩsraelĩ, mwayisoga abotata-kulu wetu, mwayirabo mo bandu bakulu omugulu babya babunga omo kihugo kyʼeMĩsĩrĩ, omo maka wuwe manene. 18Neryo omo myaka makũmĩ ani mwalemberabo omo mbwarara. 19Neryo Nyamuhanga abere abĩherya ebihanda birinda omo kihugo kyʼeKanana, neryo mwaha Ĩsraelĩ ebitaka byabo omo myaka magana ani nʼamakũmĩ atanu.

20Kandi enyũma wʼemyatsi eyĩ, mwahabo abatswerĩ erĩhĩka oko mũmĩnyererĩ Samwelĩ. 21Neryo mobabũlya bati bahabawe omwami, neryo Nyamuhanga mwahabo Saũlo omugala wa Kĩsĩ, omundu wʼekihanda kya Benyamĩna eribya mwami wabo emyaka makũmĩ ani. 22Neryo abere abĩmũlũsyaho, Nyamuhanga mwayira Dawĩdĩ mo mwami wabo. Kandi Nyamuhanga mwabũga busana na Dawĩdĩ ati, Nabiribana Dawĩdĩ mugala wa Yese mo mundu oyo nyanzĩre, oyo wasyakola erisonda lyage lyosĩ. 23Neryo ni Yesu wʼoko lubuto lwa Dawĩdĩ, oyo Nyamuhanga aha oko Baĩsraelĩ eribya Mũlamya, ngoko alagabo. 24Embere wʼerĩhĩka lya Yesu, Yoane mwatũla omwatsi oko bandu ba Ĩsraelĩ bosĩ, ati babindule emitima yabo erireka ebibi, babatĩsĩbawe. 25Neryo Yoane abere asonda eribuga omũbĩrĩ wuwe, mwabũlya bandu ati, Mũkaganĩraya muti Ĩngyendi kwehĩ? Ĩngye Sindi oyo mũlĩndĩrĩre. Nĩkwa mũlebaye! Oyukasa enyũma kwĩngye, sinyitolere erĩkũndũla esyongendero syʼebisando biwe.

26Balĩkyetu, abana bʼekĩtũnga kya Abrahamũ, nenyũ abandi mukakenga Nyamuhanga, engulu eyĩ yʼerĩlamya yabiritumwa ũkwʼĩtwe. 27Kusangwa bandu abĩkere eYerũsalema, nʼabatabalĩ babo, mobataminya Yesu, kutse ebĩnywa byʼabamĩnyererĩ ebikasomawa obuli kiro kyʼeSabato. Nĩkwa mobaberererya Amasako ibakatswera Yesu yo lubi. 28Kandi nomo banabula ekyangamwĩtĩsya, mobabũlya Pilato bati, Ĩtawe. 29Neryo babere babĩberererya ebyosĩ ebyasakawa busana naye, mobamubambula oko musalaba, mobamũhĩra omwʼisinda. 30Nĩkwa Nyamuhanga mwamũlũbũkya oko baholĩ. 31Neryo oko biro bingi mwabutukira abandu abasa naye eYerũsalema bakalũa eGalĩlaya. Nabo nĩ balangĩrĩ buwe lino oko bandu. 32-33Netu tũkabatũlĩra Engulu Yowene eyo Nyamuhanga alaga abotata-kulu wetu. Lino Nyamuhanga abĩrĩberererya erilaga erĩ ũkwʼĩtwe bana babo, ĩnĩakalũbũkaya Yesu omo ngebe. Ngoko kĩsakĩre omo Lwimbo lwʼakabiri kiti,

Uli Mugala wage,

Namakubuta mũnabwĩre.

34Kandi Nyamuhanga mwahula erĩmũlũbũkya oko baholĩ,

Eritindasuba okwʼihonda ati,

Nasyabaha omũyĩsa abũyĩrĩre nʼowʼekwenene

Ogo nalaga Dawĩdĩ.

35Kandi akabũga omo lundi Lwimbo ati,

Sĩwendĩsyalĩga Omũbũyĩrĩre wawe akalola okwʼihonda.

36Kusangwa Dawĩdĩ mwakola erisonda lya Nyamuhanga oko mugulu wuwe, neryo mwahola, neryo mwatabwa hakũhĩ nʼaboso-kulu wuwe, neryo mwahonda. 37Nĩkwa oyo Nyamuhanga alũbũkaya oko baholĩ mwatahonda. 38-39Neryo balĩkyetu, muminye ndeke ngoko busana na Yesu, omwatsi wʼeribuyirwa lyʼebibi akatũlawa ũkwʼĩnywe. Kandi muminye ngoko buli mundu Oyũkĩkĩrĩraya Yesu akaboholawa kwʼebibi byosĩ ebyo Migambo ya Musa itetoka eribabohola. 40Neryo mũtegaye omwatsi ogo abamĩnyererĩ bahula akasyabahĩkako, bati,

41Mũlebaye ĩnywe basũnatĩ! Musweke, muhole!

Kusangwa omũbĩrĩ ngakola oko biro byenyu

Nĩ mũbĩrĩ mũtendĩsyĩkĩrĩrya na kera,

Nomo mundu angabakanĩryago!

42Neryo Paũlo na Barnaba babere bakalũa omo nyũmba yʼerĩhĩndanamo, abandu mobahatikanabo bati babwirawe kandi emyatsi eyĩ oko yindi Sabato. 43Neryo abandu babere babĩlũa okwʼĩhĩndana omo nyũmba yʼerĩhĩndanamo Abayũda bangi nʼabandu bʼEbihanda ababinduka eribya Bayũda, mobakwama Paũlo na Barnaba. Neryo abakwenda mobakanĩa nabo nʼerihatikanabo erikwamirira olukogo lwa Nyamuhanga.

44Nʼoko Sabato yʼakabiri hakũhĩ nʼabandu bosĩ bʼomũyĩ mobahĩndana erĩowa ekĩnywa kya Nyamuhanga. 45Nĩkwa omugulu Abayũda balangira esyondeko, mobũsũla nʼobũha, mobatsũka erĩyĩhanangya bakagana ebĩnywa Paũlo abũga, kandi mobamutsuma. 46Nĩkwa Paũlo na Barnaba mobabũga nʼeritendiubaha bati, Lyabya litolere ekĩnywa kya Nyamuhanga ĩkyatsũka erĩbũgwa ũkwʼĩnywe. Nĩkwa kusangwa mukaganakyo, kandi mũkaganĩraya muti Simutolere engebe yʼerikota, lebaya, tukandibaleka, itwaya oko Bihanda. 47Kusangwa Omukama abirituhana ati,

Nabĩrĩkũhĩra eribya kyakakala kyʼEbihanda,

Imwaleta omulamo oko kihugo kyosĩ.

48Ebihanda byabere byowa ebĩ, mobatsema nʼeripipa ekĩnywa kyʼomukama, nʼabosĩ abayisogawa busana nʼengebe yʼerikota, mobĩkĩrĩrya.

49Kandi ekĩnywa kyʼomukama mokyapanzikanira omo kihugo kyosĩ ekyo. 50Nĩkwa Abayũda mobalwĩsĩsanĩa abakalĩ bʼekisomo abakakengawa, nʼabalume bakulu bʼomũyĩ. Neryo mobatsũka erĩendererya Paũlo na Barnaba, mobahigabo, erĩlũsyabo omo kihugo kyabo. 51Nĩkwa abakwenda mobakungutira kubo kwʼolũtũtũ lwʼebisando byabo, neryo mobaya eĨkonĩo. 52Kandi abiga bʼeAntĩokĩa mobũsũla nʼobutseme nʼOmũlĩmũ Abũyĩrĩre omugulu gosĩ.

Currently Selected:

Emĩbĩrĩ 13: KB80

Highlight

Copy