Emĩbĩrĩ 6

Abawatĩkya balinda

1Neryo oko biro ebĩ, omugulu eriganza lyʼabiga lyabya likakanya, Abayũda bʼekihugo kyʼAbagĩrĩkĩ mobasĩnĩngũlĩra Bayũda, kusangwa abakwakalĩ babo mobataganzwa okwʼigabirwa lyʼakalyo kʼobuli kiro. 2Neryo abakwenda erĩkũmĩ nʼababiri, mobabirikira endeko yʼabiga bati, Sĩryowene tukaleka ekĩnywa kya Nyamuhanga busana nʼerikolera akalyo. 3Nĩkwa balĩkyetu, muyisoge abandu balinda omo katĩkatĩ kenyũ, abakasĩmawa, aboswĩre nʼOmũlĩmũ Abũyĩrĩre nʼamenge, tũhĩrebo oko mũbĩrĩ oyũ. 4Nĩkwa ĩtwe twasyayĩhĩra okwʼisaba, nʼomũbĩrĩ wʼerĩkangĩrĩrya ekĩnywa. 5Neryo endeko yosĩ mobasĩma omwatsi oyo, Mobayisoga Setefano oyo goswĩre nʼerĩkĩrĩrya nʼOmũlĩmũ Abũyĩrĩre, na Fĩlĩpo, na Porokoro, na Nĩkanora, na Tĩmonĩ, na Parmena, na Nĩkolao wʼeAntĩokĩa, oyo wabinduka eribya Mũyũda. 6Neryo endeko moyahĩra aba embere wʼabakwenda, neryo babere babisaba mobahĩra kubo kwʼebyala.

7Litya ekĩnywa kya Nyamuhanga mokyakanyirira. Nʼeriganza lyʼabiga nalyo molyakanyirira kutsibu eYerũsalema, nʼabahererĩ bangi mobalĩga erĩkĩrĩrya eryo.

Abayũda bakatsimba Setefano

8Neryo Setefano, ĩnĩoswĩre nʼolukogo nʼobũtokĩ, mwabya akakola ebyʼeriswekera nʼebitiko-tiko omo katĩkatĩ kʼabandu. 9Nĩkwa abandi bandu, ababya bandu bʼenyũmba yʼerĩhĩndanamo eyikahulawa mo Bandu bʼobwĩranda. Ibo ni bandu bʼeKũrene, nʼeAlesandũrĩa, nʼabandi bʼeKĩlĩkĩa nʼeAsĩa mobatsũka erikuba obuhaka na Setefano. 10Nĩkwa Omũlĩmũ mwaha Setefano yʼamenge, kyaleka ĩnĩasĩngabo. 11Neryo mobayakulula abandu ababũga bati, Twabĩrĩowa akabũga ebĩnywa byʼeritsuma Musa na Nyamuhanga. 12Batya mobagangagangya abandu, nʼabakulu, nʼabakangĩrĩrya bʼEmigambo. Neryo mobatsimba Setefano mobamukurira embere syʼerĩbũgĩro. 13Neryo mobaleta bandu abakamũsĩngĩsĩraya bati, Omundu oyũ akabũga nabi emigulu yosĩ busana na hano ahabũyĩrĩre, na busana nʼEmigambo nibya. 14Kusangwa twabĩrĩowa akabũga ati, Yesu wʼeNazaretĩ oyũ, asyaherya hano, nʼeribindula emitsye eyo Musa atuha! 15Nʼabosĩ ababya bĩkere omwʼĩbũgĩro, mobasamalira Setefano, mobalangira obũsũ buwe ibwamasosa obũsũ bwʼomũlaĩka.

Currently Selected:

Emĩbĩrĩ 6: KB80

Highlight

Copy