Emĩbĩrĩ 5

Anania na Safira

1Nĩkwa habya omundu erĩna liwe iyo Anania, nʼerĩna lya mũkalĩwe lyabya Safira. Iye mwagũlya ekitaka kiguma kyabo, 2nĩkwa mwabika ekitswe kyʼobũgũlĩ obo busana naye, nʼomũkalĩ wuwe ĩnĩanasĩ omwatsi oyo, neryo mwaha abakwenda ekindi kitswe kyʼobũgũlĩ. 3Nĩkwa Petero mwamubwira ati, Busana nakĩ walekĩre Satanĩ iyabya omo mutima wawe eribihira Omũlĩmũ Abũyĩrĩre, nʼeribika oko bũgũlĩ bwʼekitaka kwehĩ? 4Omugulu wabya ute wagũlya ekitaka sikyabya kyawe kwehĩ? Kandi omugulu wagũlayakyo sikyabya omo hamũlĩ yawe kwehĩ? Wamaganĩrya erikola omwatsi oyũ omo mutima wawe busana nakĩ kwehĩ? Sulitabiha uku bandu, nĩkwa Ulyabiha uku Nyamuhanga! 5Anania abere owa ebĩnywa ebĩ, mwawa ahisi, mwalekula, neryo abosĩ abowakyo mobubaha kutsibu. 6Neryo abalwana mobahangana, mobamusenga, mobamuta.

7Neryo enyũma wʼesyosaa ĩsatu, omũkalĩ wuwe mwahĩkamo, ĩsĩasĩ ekyakolekĩre. 8Petero mwamũbũlya ati, Umbwire obũgũlĩ obũlyalũa oko kitaka mũlyagũlaya, bo nʼobũ kwehĩ? Naye mwabũga ati, Ega, obũgũlĩ ko na singaho. 9Neryo Petero mwamũbũlya ati, Busana nakĩ uwe nʼĩbawe, mwabirihanana haguma erirenga oko Mũlĩmũ wʼomukama kwehĩ? Lebaya, abandu abakabita ĩbawe bane oko lũkyo, kandi bakandikutwala nawe nibya! 10Neryo-neryo mwawa ahisi oko bisando biwe, mwalekula. Neryo abalwana babere bakingira mobeya iniabirihola, mobamutwala, eyĩhya, mobamuta hakũhĩ nʼĩba wuwe. 11Neryo ekanĩsa yosĩ, nʼabosĩ abowa omwatsi oyo mobubaha kutsibu.

Ebitiko-tiko nʼebyʼeriswekera

12Neryo abakwenda mobakola ebitikotiko nʼebyʼeriswekera bingi omo katĩkatĩ kʼabandu. Nʼabandu bosĩ babya bʼomutima muguma ĩbahĩndene omo baraza ya Solomono. 13Nĩkwa sihabya bandi bate bʼendeko yabo abalenga erĩyĩhĩra kubo, nʼomo abandu mobapipabo. 14Nĩkwa abĩkĩrĩraya oko Mukama babya bangi, esyondeko syʼabalume nʼabakalĩ, mobatomekera oko ndeko yabo. 15Kyaleka ibahekera abakonĩ omo syonzira, nʼerĩhĩrabo oko syongyingo, nʼoko birago, bati omugulu Petero akalabaho, kumbe ekyũtsũtsũ kiwe ikyatogera oko muguma wa kubo. 16Nʼesyondeko syʼabandu mosyalũa oko mĩyĩ hakũhĩ nʼeYerũsalema bakahĩndana, nʼerireta abakonĩ nʼabakagalawa nʼebĩrĩmũ bĩtĩsĩrĩre. Nʼabosĩ mobalamĩbwa.

Erĩendererĩbwa lyʼabakwenda

17Nĩkwa omũhererĩ mukulu, mwahangana haguma nʼabalĩkyabo bosĩ (ekyo ni kihanda kyʼAbasadũkayo), mobũsũla nʼobũha. 18Neryo mobahamba abakwenda mobahĩrabo omo nyũmba yʼomũlĩkĩ wʼomũyĩ. 19Nĩkwa omo kiro, omũlaĩka wʼomukama mwakingula esyonyũyĩ syʼenyũmba yʼomũlĩkĩ, mwahũlũkĩrya abakwenda bʼeyĩhya, mwabwirabo ati, 20Mugende, muhangane omo Hekalũ, mubwire abandu ebĩnywa byosĩ byʼeNgebe eyĩ. 21Neryo babere bowa ebĩ, mobingira omo Hekalũ omo ngyakyangyakya, mobatsũka erĩkangĩrĩrya.

Neryo omũhererĩ mukulu, nʼabalĩkyabo mobabirikira erĩbũgĩro lyosĩ lyo haguma, nʼabakulu bʼekihanda kya Ĩsraelĩ, neryo mobatumira oko bakwenda omo nyũmba yʼomũlĩkĩ bati baletawe. 22Nĩkwa omugulu abalembya bahĩkaho, mobateya bakwenda bʼomo nyũmba yʼomũlĩkĩ. Neryo mobasuba okwʼĩbũgĩro bati, 23Motũkegaya enyũmba yʼomũlĩkĩ ĩnĩnakĩngĩre ndeke, nʼabateya ibanimene oko syongyo, nĩkwa motukabya twakingulamo, motutetabana mo mundu! 24Neryo omugulu omũteya wʼeHekalũ, nʼabahererĩ bakulu bowa ebĩnywa ebĩ, mobalemwa omwatsi oyũ ngʼasyabya ati. 25Neryo omundu muguma mwahĩka mwabwirabo ati, Lebaya! abandu abo mwahĩra omo mũlĩkĩ banimene omo Hekalũ banemũkangĩrĩrya bandu! 26Neryo omũteya oyo haguma nʼabalembya mobayenda abakwenda butsira mwaga; kusangwa babya bakubaha abandu, bati bakasyaguswa kwʼamabwe.

27Neryo mobaleta abakwenda mobahanganĩabo omwʼĩbũgĩro. Neryo omũhererĩ mukulu oko bahererĩ bosĩ mwabũlyabo 28ati, Motwabahana kutsibu tuti sĩmũkangĩrĩraye omo lĩna erĩ. Lebaya! mwabĩrĩũsũlya eYerũsalema mwʼerĩkangĩrĩrya lyenyũ, kandi mukasonda erĩtũhĩra kʼomusango wʼomusasi wʼomundu oyo. 29Nĩkwa Petero nʼabakwenda mobasũbĩrya bati, Litolere itwakenga Nyamuhanga kwilaba bandu. 30Nyamuhanga wʼabotata wetu mwalũbũkya Yesu, oyo mwĩta nʼerimubamba oko musalaba. 31Nĩkwa Nyamuhanga mwamũhamya oko byala biwe byʼamali mo Mukulu nʼomũlamya, ahe Ĩsraelĩ eribindula emitima yabo nʼeribuyirwa lyʼebibi. 32Netu tuli balangĩrĩ bʼemyatsi eyĩ, ĩtwe haguma nʼOmũlĩmũ Abũyĩrĩre, ogo Nyamuhanga abiriha abakamukenga.

33Nĩkwa omugulu bowa ebĩ, mobahitana ibakasonda erĩĩtabo. 34Nĩkwa Omũfarĩsayo muguma oyukahulawa mo Gamalĩelĩ, omũkangĩrĩrya wʼEmigambo, iniakakengawa nʼabandu bosĩ, mwahangana omwʼĩbũgĩro, mwahamula ati abakwenda bahĩrawe eyĩhya yo hake. 35Neryo mwabwira erĩbũgĩro ati, Ĩnywe balume ba Ĩsraelĩ, muyitondeke nga mwanzĩre erikolakĩ nʼabandu aba. 36Kusangwa oko gundi mugulu ye Teũda mwahuluka iniakayahula mo mundu mukulu. Neryo abandu nga magana ani mobamukwama. Teũda oyo mwĩtwa, nʼabosĩ abamukwama mobapanza-panzwa, nʼomwatsi wuwe mwahwa. 37Nʼenyũma wʼaho Yũda wʼeGalĩlaya mwahangana omo biro byʼetsapa. Naye mwayira abandu bangi erimukwama. Naye nibya mwĩtwa, nʼabosĩ abamukwama mobapanza-panzwa. 38Neryo omo mwatsi oyũ, ngababwira nyiti, simukwame abandu aba, mulekebo. Kusangwa kumbe amalengekanĩa aya nʼomũbĩrĩ oyũ, amabya wʼabandu, iniakandisyabulirana. 39Nĩkwa omwatsi oyũ amabya ini wa Nyamuhanga, simwendisyatoka erĩsĩngana. Kite kitya mũkandĩyĩmĩnyĩkalya ko mukalwa na Nyamuhanga. 40Neryo erĩbũgĩro molyalĩga erihana lya Gamalĩelĩ. Mobabirikira abakwenda, mobaswĩryabo omo nyambĩ, neryo mobahanabo bati sĩbabũge kandi omo lĩna lya Yesu, neryo mobalwĩkabo. 41Neryo abakwenda mobalũa omwʼĩbũgĩro ibanemutsema bati Nyamuhanga akaganzabo ngʼabatolere erihemulwa busana nʼerĩna lya Yesu. 42Neryo ebiro byosĩ, omo Hekalũ nʼomo manyũmba wʼabandu, mobatũmbya erĩkangĩrĩrya nʼerĩtũla Engulu Yowene ya Yesu kwʼali Kristo.

Currently Selected:

Emĩbĩrĩ 5: KB80

Highlight

Copy