Emĩbĩrĩ 14

Paũlo na Barnaba eĨkonĩo

1Neryo eĨkonĩo Paũlo na Barnaba mobingira haguma omo nyũmba yʼerĩhĩndanamo yʼAbayũda, neryo mobabũga omo mũsĩndo owaleka endeko nene yʼAbayũda nʼeyʼEbihanda ĩbĩkĩrĩrya. 2Nĩkwa Abayũda abagana erĩkĩrĩrya mobatsotsererya amalengekanĩa wʼEbihanda, erilwa nʼabalĩkyetu. 3Nĩkwa abakwenda mobasiba eyo omugulu muli. Mobabũga busana nʼomukama butsira eriubaha. Neryo Omukama mwatũlago busana nʼekĩnywa kyʼolukogo luwe, iniakahabo obũtokĩ bwʼerikola ebitikotiko nʼebyʼeriswekera. 4Nĩkwa endeko yʼomũyĩ moyagabana, abandi mobayĩhĩra oko Bayũda, nʼabandi oko bakwenda.

5Neryo Ebihanda nʼAbayũda, haguma nʼabatabalĩ mobalenga erikola abakwenda bo nabi, nʼerĩĩtabo omo mabwe. 6Neryo abakwenda mobaminyakyo, mobatibita eLĩstra nʼeDerbe, emĩyĩ yʼeLĩkaonĩa, nʼomo kihugo ekĩhererenĩe. 7Neryo mobatũla Engulu Yowene yʼeyo.

Paũlo na Barnaba eLĩstra nʼeDerbe

8Nĩkwa eLĩstra habya mundu muguma ĩnĩabũndamĩre. Omundu oyũ abya kirema omo bisando biwe isialitatoka erigenda na kera, abutawa ikwane atya. 9Omundu oyũ mwahulikirira ebĩnywa bya Paũlo. Neryo Paũlo mwalangira ko mundu oyũ abya awite erĩkĩrĩrya lyʼerĩlamĩbwa. 10Neryo Paũlo mwamubwira nʼomulenge munene ati, Hangana, wimane omo bisando byawe! Neryo omundu oyo mwabatuka, mwatsũka erigenda. 11Neryo esyondeko syabere syalangira ekyo Paũlo akola, mobasumba emirenge yabo omo mũbũge wʼAbanya Lĩkaonĩa bati, Esyonyamuhanga syabere ngʼabandu, kandi syabiritwandagalirako. 12Mobahula Barnaba mo Zeũ, na Paũlo mobamwahula mo Herme, kusangwa Paũlo abya mbũyĩ. 13Neryo omũhererĩ wa Zeũ, ehekalũ yiwe yabya embere wʼomũyĩ, mwaleta esyonume syʼesyonde nʼobũsoyo oko syongyo syʼomũyĩ, iniakasonda haguma nʼesyondeko eriherera abakwenda. 14Nĩkwa omugulu abakwenda, Paũlo na Barnaba bowa ekyo, mobatula esyongimba syabo, mobatibita omo syondeko ibakabirikira bati, 15Ĩnywe balume, busana nakĩ mukakola mutya kwehĩ? Netu tuli bandu abalingene nenyũ! Tũkabatũlĩra Engulu Yowene imwatoka erireka emyatsi mitya-mitya eyĩ, nʼeribindukira Nyamuhanga oyuliho, oyo wabumba olubula, nʼekihugo, nʼengetsi, nʼebyosĩ ko birimo. 16Kandi, oko migulu yalaba Nyamuhanga mwaleka Ebihanda byosĩ erigenda omo mibere yabyo. 17Nĩkwa mwatayireka bute balangĩrĩ buwe, iniakakola ebibuya nʼeribaha embũla eyĩkalũa elubula, nʼeribaha ebirimo ebĩkeraya ebyalya, nʼerĩũsũlya emitima yenyũ mwʼobutseme. 18Nĩkwa nomo bakwenda babũga emyatsi eyĩ, lyabya lĩkalĩre erĩkakĩrya esyondeko erihererabo amahere.

19Neryo Abayũda mobahĩka bakalũa eAntĩokĩa yʼePĩsĩdĩa, nʼeĨkonĩo. Abayũda aba mobabindula emitima yʼabandu, mobahũtalya Paũlo yʼomo mabwe, mobamukurira ekyaswa kyʼomũyĩ, mobaganĩrya, bati abirihola. 20Nĩkwa abiga babere bakamũtĩmbako, Paũlo mwahangana mwingira omo mũyĩ. Nʼengyakya Paũlo na Barnaba mobaya eDerbe.

Paũlo na Barnaba bakasuba eAntĩokĩa yʼeSũrĩa

21Neryo Paũlo na Barnaba mobatũla Engulu Yowene eDerbe, kandi mobayira abiga bangi. Neryo mobasuba eLĩstra, nʼeĨkonĩo, nʼeAntĩokĩa yʼePĩsĩdĩa. 22Mobasĩkya emitima yʼabiga, nʼerĩhamĩryabo bati bakwamirire omwʼĩkĩrĩrya. Bati, Litolere itwingira omo bwami bwa Nyamuhanga itukalaba omo malĩge mangi. 23Kandi mobahĩra abakulu busana nabo omo buli kanĩsa, babere babisaba nʼeritsira akalyo. Kandi mobahĩrabo omo byala byʼomukama oyo bĩkĩrĩraya.

24Neryo Paũlo na Barnaba mobatwangana ePĩsĩdĩa, mobahĩka ePamfĩlĩa. 25Neryo babere batũla omwatsi wʼekĩnywa kya Nyamuhanga ePerga, neryo mobandagalira eAtalĩa. 26Neryo mobalũa eyo, mobaya eAntĩokĩa omo bwato, aho bahĩrawa oko lukogo lwa Nyamuhanga busana nʼomũbĩrĩ ogo babuga.

27Neryo babere bahĩka eAntĩokĩa, mobahĩndanĩa ekanĩsa, mobabwirabo nʼerĩkanĩryabo ebyosĩ ebyo Nyamuhanga akola haguma nabo, kandi ngoko Nyamuhanga alĩbũla enzira busana nʼerĩkĩrĩrya lyʼEbihanda. 28Nʼeyo mobĩkalayo mugulu muli haguma nʼabiga.

Currently Selected:

Emĩbĩrĩ 14: KB80

Highlight

Copy